1/2 கப் வேர்க்கடலையும், வெண்டைக்காயும் இருந்தா.. ஈவ்னிங் இந்த ஸ்நாக்ஸ் செய்யுங்க... செம டேஸ்ட்டா இருக்கும்...

Ladies Finger Peanut Pakoda Recipe In Tamil: குழந்தைகளுக்கு கோடை விடுமுறை ஆரம்பித்துவிட்ட நிலையில், வீட்டிலேயே எப்போதும் இருப்பதால், எந்நேரமும் ஏதாவது சாப்பிட கேட்டுக் கொண்டே இருப்பார்கள். இந்நிலையில் கடைகளில் எவ்வளவு தான் வாங்கி கொடுக்க முடியும். இப்படிப்பட்ட நேரத்தில் வீட்டிலேயே இருக்கும் பொருட்களைக் கொண்டு ஸ்நாக்ஸ் செய்து கொடுப்பது தான் சிறந்தது.

இன்று உங்கள் குழந்தைகளுக்கு ஒரு சத்தான, அதே சமயம் சுவையான ஒரு ஸ்நாக்ஸ் செய்து கொடுக்க நினைக்கிறீர்களா? உங்கள் வீட்டில் வேர்க்கடலையும், வெண்டைக்காயும் இருந்தால், சூப்பரான ஸ்நாக்ஸ் செய்யலாம். இந்த ஸ்நாக்ஸ் குழந்தைகள் அடிக்கடி கேட்டு விரும்பி சாப்பிடக்கூடியவாறு இருக்கும்.

உங்களுக்கு வெண்டைக்காய் வேர்க்கடலை பக்கோடாவை எப்படி செய்வதென்று தெரிந்து கொள்ள வேண்டுமா? கீழே வெண்டைக்காய் வேர்க்கடலை பக்கோடா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* வறுத்த வேர்க்கடலை - 1/2 கப் (100 கிராம்)
* வெண்டைக்காய் - 1/2 கிலோ
* கடலை மாவு - 1/2 கப்
* பச்சரிசி மாவு - 1/2 கப்
* கறிவேப்பிலை - 1 கொத்து (நறுக்கியது)
* பூண்டு - 6 பல் (தட்டிக் கொள்ளவும்)
* மிளகாய் தூள் - 1 டீஸ்பூன்
* கரம் மசாலா - 1/2 டீஸ்பூன்
* உப்பு - சுவைக்கேற்ப
* சீரகம் - 1 டீஸ்பூன்
* எண்ணெய் - பொரிப்பதற்கு தேவையான அளவு

செய்முறை:

* முதலில் வெண்டைக்காயை நீரில் கழுவி, துணியால் துடைத்துவிட்டு, அதை சிறு துண்டுகளாக வெட்டிக் கொள்ள வேண்டும்.
* பின்னர் வறுத்த வேர்க்கடலையை மிக்சர் ஜாரில் போட்டு பொடித்துக் கொள்ள வேண்டும்.
* பின்பு ஒரு பாத்திரத்தில் துண்டுகளாக்கப்பட்ட வெண்டைக்காயை போட்டு, அத்துடன் பொடித்த வேர்க்கடலை பொடியை சேரத்துக் கொள்ள வேண்டும்.
* பின் அதில் கடலை மாவு, அரிசி மாவு, கறிவேப்பிலை, தட்டிய பூண்டு, மிளகாய் தூள், கரம் மசாலா, சுவைக்கேற்ப உப்பு மற்றும் சீரகம் சேர்த்து கைகளால் நன்கு கிளறி விட வேண்டும்.
* பிறகு லேசாக நீரைத் தெளித்து நன்கு கிளறி பக்கோடா பதத்திற்கு கலந்து கொள்ள வேண்டும்.
* பின் ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடானதும், வெண்டைக்காயை சேர்த்து பொன்னிறமாக பொரித்து எடுத்தால், சுவையான வெண்டைக்காய் பக்கோடா தயார்.

Image Courtesy: Akshaya. com