முட்டை மலாய் மசாலா

இன்று இரவு உங்கள் வீட்டில் சப்பாத்தி, புல்கா, நாண் என்று எதையாவது செய்து சாப்பிடலாம் என்று திட்டமிட்டுள்ளீர்களா? அதற்கு என்ன சைடு டிஷ் செய்வதென்று யோசித்துக் கொண்டிருக்கிறீர்களா? உங்கள் வீட்டில் முட்டை இருந்தால், அதைக் கொண்டு ஒரு அற்புதமான மசாலா செய்யுங்கள். அதுவும் வித்தியாசமான முட்டை மசாலா செய்ய நினைத்தால், முட்டை மலாய் மசாலா செய்யுங்கள். இது குழந்தைகள் விரும்பி சாப்பிடும் வகையில் மிகவும் ருசியாக இருக்கும்.

உங்களுக்கு முட்டை மலாய் மசாலா எப்படி செய்வதென்று தெரிந்து கொள்ள வேண்டுமா? கீழே முட்டை மலாய் மசாலா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* வெண்ணெய் - 1 டீஸ்பூன்

* எண்ணெய் - 1 டேபிள் ஸ்பூன்

* முட்டை - 4

* இஞ்சி பூண்டு விழுது - 1 டீஸ்பூன்

* மிளகுத்தூள் - 1/2 டீஸ்பூன்

* பால் - 1 1/2 கப்

* பிரஷ் க்ரீம் - 1/4 கப்

* கொத்தமல்லி - சிறிது

* உப்பு - சுவைக்கேற்ப

* தண்ணீர் - தேவையான அளவு

அரைப்பதற்கு...

* வெங்காயம் - 4

* பச்சை மிளகாய் - 2

மசாலா பொடிகள்...

* மிளகாய் தூள் - 1/2 டீஸ்பூன்

* மல்லித் தூள் - 1/2 டீஸ்பூன்

* சீரகப் பொடி - 1/4 டீஸ்பூன்

* கரம் மசாலா - 1/4 டீஸ்பூன்

செய்முறை:

* முதலில் முட்டையை நன்கு வேக வைத்துக் கொள்ள வேண்டும். பின் அதை இரண்டாக வெட்டிக் கொள்ளவும்.

* பின் மிக்சர் ஜாரில் வெங்காயம் மற்றும் பச்சை மிளகாயை போட்டு நன்கு அரைத்து தனியாக வைத்துக் கொள்ள வேண்டும்.

* பின்னர் ஒரு வாணலியை அடுப்பில் வைத்து, அதில் வெண்ணெய் மற்றம் எண்ணெய் ஊற்றி சூடேற்ற வேண்டும்.

* பின்பு அதில் வெங்காய விழுது சேர்த்து சில நிமிடங்கள் வதக்கி, பின் இஞ்சி பூண்டு விழுது சேர்த்து பச்சை வாசனை போக பொன்னிறமாக வதக்க வேண்டும்.

* பிறகு அதில் மசாலா பொடிகளை சேர்த்து, சுவைக்கேற்ப உப்பு சேர்த்து ஒரு நிமிடம் நன்கு வதக்க வேண்டும்.

* பின் அதில் பாலை ஊற்றி, வேண்டுமானால் சிறிது நீரை சேர்த்து கிளறி, மூடி வைத்து சில நிமிடங்கள் கொதிக்க வைக்க வேண்டும்.

* பின்னர் மூடியைத் திறந்து, அதில் பிரஷ் க்ரீம் சேர்த்து, எண்ணெய் பிரியும் வரை கொதிக்க வைக்க வேண்டும்.

* இறுதியாக வெட்டி வைத்துள்ள முட்டைகளை சேர்த்து, மேலே மிளகுத் தூள் மற்றும் கொத்தமல்லியைத் தூவி, சில நிமிடங்கள் வேக வைத்து இறக்கி, மூடியைத் திறந்து கிளறினால், சுவையான முட்டை மலாய் மசாலா தயார்.

Image Courtesy: sharmispassions