சப்பாத்திக்கு பன்னீரை வெச்சு இப்படி சப்ஜி பண்ணுங்க.. 1 சாப்பிடுறவங்க 2 எக்ஸ்ட்ரா வாங்கி சாப்பிடுவாங்க...

Cooker Paneer Sabji Recipe: தற்போது காலநிலை மிகவும் குளிர்ச்சியாக இருப்பதால், நல்ல சுவையான உணவை சமைத்து சாப்பிடத் தோன்றும். உங்களுக்கும் அப்படி தான் உள்ளதா? இன்று இரவு உங்கள் வீட்டில் சப்பாத்தி செய்ய திட்டமிட்டுள்ளீர்களா? அந்த சப்பாத்திக்கு ஒரு அற்புதமான சுவையில் சைடு டிஷ் செய்ய விரும்புகிறீர்களா?

உங்கள் வீட்டில் உள்ளோர் பன்னீரை விரும்பி சாப்பிடுவார்களா? அப்படியானால் அந்த பன்னீரைக் கொண்டு சப்ஜி செய்யுங்கள். இந்த பன்னீர் சப்ஜி செய்வதற்கு ஈஸியாக இருப்பதோடு, குழந்தைகள் முதல் பெரியவர்கள் வரை அனைவரும் விரும்பி சாப்பிடக்கூடியவாறு இருக்கும்.

உங்களுக்கு பன்னீர் சப்ஜியை எப்படி செய்வதென்று தெரிந்து கொள்ள வேண்டுமா? கீழே பன்னீர் சப்ஜி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 2 டேபிள் ஸ்பூன்
* சீரகம் - 1 டீஸ்பூன்
* பூண்டு - 6 பல்
* வெங்காயம் - 3 (நறுக்கியது)
* மஞ்சள் தூள் - 1/2 டீஸ்பூன்
* மிளகாய் தூள் - 1 டீஸ்பூன்
* சீரகத் தூள் - 1/2 டீஸ்பூன்
* மல்லித் தூள் - 1 டீஸ்பூன்
* கரம் மசாலா - 1 டீஸ்பூன்
* உப்பு - சுவைக்கேற்ப
* தக்காளி - 3 (நறுக்கியது)
* தண்ணீர் - 1 கப்
* வெண்ணெய் - 1 டேபிள் ஸ்பூன்
* பன்னீர் - 100 கிராம் (துண்டுகளாக்கப்பட்டது)
* குடைமிளகாய் - 1/2 (துண்டுகளாக்கப்பட்டது)
* இஞ்சி - 1 இன்ச்
* கசூரி மெத்தி - 1 டீஸ்பூன்
* கொத்தமல்லி - சிறிது (நறுக்கியது)

செய்முறை:

* முதலில் குக்கரை அடுப்பில் வைத்து, அதில் 2 டேபிள் ஸ்பூன் எண்ணெய் ஊற்றி சூடானதும், சீரகம் சேர்த்து தாளிக்க வேண்டும்.
* பின் அதில் பூண்டு சேர்த்து 1 நிமிடம் வதக்க வேண்டும்.
* அதன் பின் வெங்காயத்தை சேர்த்து பொன்னிறமாகும் வரை வதக்க வேண்டும்.
* பின் தீயைக் குறைத்து, மஞ்சள் தூள், மிளகாய் தூள், சீரகத் தூள், மல்லித் தூள், கரம் மசாலா மற்றும் உப்பு சேர்த்து நன்கு கிளறி விட வேண்டும்.
* பின்பு தக்காளியை சேர்த்து 2 நிமிடம் வதக்கி, 1 கப் நீரை ஊற்றி கிளறி குக்கரை மூடி 4 விசில் விட்டு இறக்க வேண்டும்.
* விசில் போனது, குக்கரைத் திறந்து மத்து கொண்டு மசித்து விட வேண்டும்.
* பிறகு ஒரு வாணலியை அடுப்பில் வைத்து, அதில் வெண்ணெய் சேர்த்து உருகியதும், பன்னீர் துண்டுகள் மற்றும் குடைமிளகாய் சேர்த்து ப்ரை செய்ய வேண்டும்.
* பின் ப்ரை செய்த பொருட்களை மசித்த சப்ஜியுடன் சேர்த்து கிளறி, அத்துடன் கசூரி மெத்தி மற்றும் கொத்தமல்லயைத் தூவி கிளறி இறக்கினால், சுவையான குக்கர் பன்னீர் சப்ஜி தயார்.

Image Courtesy: hebbarskitchen