மீந்து போன சப்பாத்தி இருக்கா? அப்ப இப்படி சில்லி சப்பாத்தி செய்யுங்க.. அல்டிமேட்டா இருக்கும்..

Chilli Chapati Recipe In Tamil: நைட் உங்கள் வீட்டில் செய்த சப்பாத்தி நிறைய மீந்து போயுள்ளதா? அந்த சப்பாத்தியை வீணடிக்காமல் அதைக் கொண்டு ஒரு சூப்பரான டிபனை செய்ய வேண்டுமா? அப்படியானால் சில்லி சப்பாத்தியை செய்து கொடுங்கள். இந்த சில்லி சப்பாத்தி செய்வதற்கு சுலபமாக இருப்பதோடு, மிகவும் சுவையாகவும் இருக்கும். முக்கியமாக இந்த சில்லி சப்பாத்திக்கு சாஸ் எதுவும் தேவையில்லை. நம் வீட்டில் உள்ள மசாலா பொருட்களே போதுமானது. இந்த பக்குவத்தில் சில்லி சப்பாத்தியை செய்யும் போது, ரெஸ்டாரண்ட் சுவையில் பிரமாதமாக இருக்கும்.

உங்களுக்கு இந்த சில்லி சப்பாத்தியை எப்படி செய்வதென்று தெரிந்து கொள்ள வேண்டுமா? கீழே சில்லி சப்பாத்தி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* சப்பாத்தி - 12 (பெரிய சதுர துண்டுகளாக வெட்டியது)
* எண்ணெய் - 2 டேபிள் ஸ்பூன் + 1 டீஸ்பூன்
* பெரிய வெங்காயம் - 1 (பொடியாக நறுக்கியது)
* இஞ்சி பூண்டு பேஸ்ட் - 1 டீஸ்பூன்
* கறிவேப்பிலை - 1 கொத்து
* குடைமிளகாய் - 1 (பெரிய சதுர துண்டுகளாக வெட்டியது)
* உப்பு - சுவைக்கேற்ப
* கறி மசாலா தூள் - 1 1/2 டேபிள் ஸ்பூன்
* மிளகாய் தூள் - 1/2 டீஸ்பூன்
* மஞ்சள் தூள் - 1/4 டீஸ்பூன்
* தக்காளி - 2
* முந்திரி - 4
* சர்க்கரை - 1/2 டீஸ்பூன்
* வெண்ணெய் - 1/2 டீஸ்பூன்
* கொத்தமல்லி - சிறிது

செய்முறை:

* முதலில் சப்பாத்திகளை பெரிய சதுர துண்டுகளாக வெட்டி தனியாக வைத்துக் கொள்ள வேண்டும்.
* பின்னர் ஒரு பேனை அடுப்பில் வைத்து, அதில் 2 டேபிள் ஸ்பூன் எண்ணெய் ஊற்றி, சப்பாத்தி துண்டுகளை சேர்த்து லேசாக ப்ரை செய்து தனியாக எடுத்து வைத்துக் கொள்ள வேண்டும்.
* பின்பு அதே பேனில் 1 டீஸ்பூன் எண்ணெய் ஊற்றி சூடானதும், பொடியாக நறுக்கிய வெங்காயத்தை சேர்த்து நன்கு கண்ணாடி பதத்திற்கு வதக்க வேண்டும்.
* அடுத்து அதில் இஞ்சி பூண்டு பேஸ்ட் மற்றும் கறிவேப்பிலை சேர்த்து, நன்கு பச்சை வாசனை போக வதக்க வேண்டும்.
* பிறகு அதில் நறுக்கிய குடைமிளகாயை சேர்த்து, சுவைக்கேற்ப உப்பு சேர்த்து 2-3 நிமிடம் வதக்க வேண்டும்.
* அதன் பின் அதில் கறி மசாலா தூள், மிளகாய் தூள், மஞ்சள் தூள் சேர்த்து நன்கு 2 நிமிடம் வதக்க வேண்டும்.
* பின்னர் அதில் தக்காளி மற்றும் முந்திரியை நன்கு அரைத்து சேர்த்து கிளறி, சர்க்கரை சேர்த்து 5 நிமிடம் நன்கு வேக வைக்க வேண்டும்.
* அடுத்து வெண்ணெய் சேர்த்து கிளறி, ப்ரை செய்த சப்பாத்தியை சேர்த்து நன்கு கிளறி, 5 நிமிடம் நன்கு வேக வைத்து, கொத்தமல்லியைத் தூவி கிளறி இறக்கினால், சுவையான சில்லி சப்பாத்தி தயார்.