30 லட்சம் நாய்களை கொல்வதற்கு முடிவு செய்துள்ள மொராக்கோ அரசாங்கம்... காரணம் என்ன தெரியுமா?

உலகளவில் அதிக ரசிகர்களை கொண்ட விளையாட்டு என்றால் அது கால்பந்துதான். நான்கு ஆண்டுகளுக்கு ஒருமுறை நடைபெறும் FIFA உலகக் கோப்பை, உலகம் முழுவதும் கோடிக்கணக்கான ரசிகர்களை ஈர்க்கும் ஒரு புகழ்பெற்ற விளையாட்டாக உள்ளது. இது கால்பந்து போட்டி என்பதையும் தாண்டி, இது மக்களை இணைக்கும், பன்முகத்தன்மையைக் கொண்டாடும் மற்றும் நாடுகளுக்கு இடையே ஒப்பிடமுடியாத உற்சாகத்தைத் தூண்டும் ஒரு கலாச்சார நிகழ்வாகும்.

நேரடியாகவோ அல்லது தொலைக்காட்சியிலோ அல்லது வேறு வழியிலோ அதைக் காண ஆவலுடன் காத்திருக்கும் ரசிகர்களுக்கு இந்த விளையாட்டு ஒரு உணர்ச்சிபூர்வமான பயணமாகும். இந்த போட்டியின் மீது உலகம் முழுவதும் எதிர்பார்ப்பு இருப்பதால், போட்டியை நடத்தும் நாடுகள் தங்கள் அதற்கான ஏற்பாடுகளை குறைபாடின்றி செய்யும் பொறுப்பை எதிர்கொள்கின்றன. தங்கள் நாட்டிற்கு வரும் லட்சக்கணக்கான மக்களுக்கு, உலகத் தரம் வாய்ந்த அரங்கங்கள் முதல் தங்குமிடம் வரை மறக்க முடியாத அனுபவத்தை உருவாக்க அவர்கள் அதிக முயற்சிகளை மேற்கொள்கிறார்கள்.

சில நாடுகள் தங்கள் கௌரவத்திற்காகவும், மகத்தான பொறுப்பிற்காகவும் சில சர்ச்சைக்குரிய நடவடிக்கைகளில் ஈடுபடுகின்றன. அதன் உச்சமாக அனைவரையும் அதிர்ச்சியாக்கும் படி நாட்டை தூய்மைப்படுத்தும் முயற்சியில், 2030 உலகக் கோப்பையை நடத்துவதற்கு முன்னதாக மொராக்கோ மூன்று மில்லியன் தெருநாய்களைக் கொல்வது குறித்து பரிசீலித்து வருவதாகக் கூறப்படுகிறது. இந்த அறிக்கை பல விலங்கு உரிமை ஆர்வலர்கள் மற்றும் அமைப்புகளிடமிருந்து எதிர்ப்பைத் தூண்டியுள்ளது.

தங்கள் நாட்டின் நகரங்களை கால்பந்து ரசிகர்களுக்கு அழகாகக் காட்டுவதற்காக இந்த தூய்மைப்படுத்தும் முயற்சி மேற்கொள்ளப்படுவதாக தகவல்கள் தெரிவிக்கின்றன. மொராக்கோ 2030 FIFA உலகக் கோப்பையை ஸ்பெயின் மற்றும் போர்ச்சுகலுடன் இணைந்து நடத்தவிருக்கிறது. இந்த மூன்று நாடுகளிலும் போட்டிகள் நடைபெறும், அதனால் அங்கு ஏராளமான சுற்றுலாப் பயணிகள் வருவார்கள். இருப்பினும், இறுதிப் போட்டிக்கான இடம் இன்னும் முடிவு செய்யப்படவில்லை. உலகக்கோப்பை போட்டியின் 100வது ஆண்டு நிறைவைக் குறிக்கும் வகையில் 2030 FIFA உலகக் கோப்பை சிறப்பு முக்கியத்துவம் வாய்ந்தது.

மொராக்கோ ஏற்கனவே போட்டிகளைத் நடத்துவதற்கான தயாரிப்பு பணிகளைத் தொடங்கியுள்ளது, மைதானங்கள் மற்றும் போக்குவரத்து நெட்வொர்க்குகளை FIFA தரநிலைகளுக்கு ஏற்ப மேம்படுத்துகிறது. இந்த சூழலில்தான், மொராக்கோ ஆயிரக்கணக்கான நாய்களை முறையாகக் கொல்லக்கூடும் என்று பல ஊடக ஆதாரங்கள் செய்தி வெளியிட்டுள்ளன.

சர்வதேச விலங்கு கூட்டமைபு, இந்த கொலை "மொராக்கோவின் மோசமான ரகசியம்" என்று கூறியுள்ளது. அவர்களின் அதிகாரப்பூர்வ வலைத்தளத்தில், அந்த அமைப்பு, "மொராக்கோவில் ஒவ்வொரு ஆண்டும் 300,000 தெரு நாய்கள் கொல்லப்படுகின்றன. அரசாங்க அதிகாரிகளால் அவை கொடூரமாக கொல்லப்படுகின்றன. இருப்பினும், 2030 உலகக் கோப்பையை மொராக்கோ ஸ்பெயின் மற்றும் போர்ச்சுகலுடன் இணைந்து நடத்தும் என்று ஃபிஃபா அறிவித்ததிலிருந்து, மனிதாபிமானமற்ற மற்றும் காட்டுமிராண்டித்தனமான கொலைகள் அதிகரித்துள்ளன" என்று கூறுகிறது.

பூச்சிக்கொல்லியாகப் பயன்படுத்தப்படும் மிகவும் நச்சுத்தன்மை வாய்ந்த, நிறமற்ற மற்றும் கசப்பான ரசாயனமான ஸ்ட்ரைக்னைனை ஊசி மூலம் செலுத்தி நாய்கள் கொல்லப்படுவதாகவும் அதில் குறிப்பிடப்பட்டள்ளது. நாய்கள் தெருக்களில் சுடப்படுகின்றன அல்லது அவை படுகொலை செய்யப்படும் இடங்களுக்கு கொண்டு செல்லப்படுகின்றன என்று கூறப்படுகிறது.

மொராக்கோ அதிகாரிகள் 2024 இல் இந்த படுகொலைகள் நிறுத்தப்பட்டதாகக் கூறியிருந்தாலும், 2023 இல் மொராக்கோ FIFA உலகக்கோப்பையை நடத்தும் என்று FIFA அறிவித்த பிறகு இதுபோன்ற வழக்குகள் அதிகரித்துள்ளதாக தகவல்கள் தெரிவிக்கின்றன. விலங்கு உரிமைகள் ஆதரவாளர்கள் இப்போது FIFA நிர்வாகத்தை அணுகி மொராக்கோவிற்கு எதிராக நடவடிக்கை எடுக்க அழைப்பு விடுத்துள்ளனர். ஆனால் இந்த சர்ச்சை குறித்து FIFA இன்னும் எந்த அறிக்கையையும் வெளியிடவில்லை.