சீன புத்தாண்டு பற்றி உங்களுக்குத் தெரியாத சில சுவாரஸ்யமான விஷயங்கள்!

2022 சந்திர புத்தாண்டு/சீன புத்தாண்டு எப்போது?

சீன புத்தாண்டு/சந்திர புத்தாண்டு இரண்டு நாட்கள் மிகவும் உற்சாகத்துடன் கொண்டப்படுகிறது. அந்த இரண்டு நாட்களாவன இந்த ஆண்டு ஜனவரி 31 (புத்தாண்டு ஈவ்) மற்றும் பிப்ரவரி 01 ஆகும். சந்திர புத்தாண்டு ஒவ்வொரு ஆண்டும் ஒரே தேதியில் கொண்டாடப்படுவதில்லை. சந்திரனின் சுழற்சியைக் கொண்டு இது கொண்டாடப்படுகிறது. வழக்கமாக கிரிகோரியன் நாட்காட்டியின் படி, ஒவ்வொரு ஆண்டும் ஜனவரி 20 முதல் பிப்ரவரி 21 ஆம் தேதிக்குள் கொண்டாடப்படும்.

ஒவ்வொரு ஆண்டும் எலி, எருது, புலி, முயல், டிராகன், பாம்பு, குதிரை, ஆடு, குரங்கு, சேவல், நாய் மற்றும் பன்றி என ஒவ்வொரு விலங்குகளுடனும் தொடர்புடையது அந்த வகையில் 2021 ஆம் ஆண்டு எருது ஆண்டு. 2022 ஆம் ஆண்டு புலி ஆண்டு ஆகும்.

சீன புத்தாண்டு கொண்டாட்டங்கள்

சீன புத்தாண்டை முன்னிட்டு மக்கள் தங்கள் வீடுகளை சுத்தம் செய்வார்கள். இதனால் கடந்த ஆண்டின் துக்கங்கள் மற்றும் துரதிர்ஷ்டங்கள் நீங்கி, அதிர்ஷ்டம் மற்றும் செழிப்பால் ஆசீர்வதிக்கப்படுவதாக நம்புகிறார்கள். முக்கியமாக சீன மக்களுக்கு சிவப்பு நிறம் மிகவும் முக்கியத்துவம் வாய்ந்தது.இந்த புத்தாண்டு அன்று மக்கள் வீடுகளை சிவப்பு நிறத்தால் அலங்கரிப்பார்கள் மற்றும் வீட்டில் உள்ள பெரியோர் குழந்தைகளுக்கு சிவப்பு நிற கவர்களில் பணத்தை வைத்து வழங்குவார்கள். மேலும் பரிசுகளைப் பரிமாறி கொள்வார்கள்,பெரிய விருந்துகளை ஏற்பாடு செய்து விருந்தினர்களை அழைத்து விருந்து உணவு உண்பார்கள், நிறைய பட்டாசுகள், நடனமாடும் டிராகன்கள் மற்றும் சிங்கங்களுடன் தங்கள் புத்தாண்டை விமரிசையாக கொண்டாடி மகிழ்வார்கள்.

முக்கியமாக இந்த சீன புத்தாண்டு கொண்டாட்டம் 2 வாரங்கள் நடைபெறும். இந்த ஆண்டு பிப்ரவரி 15 ஆம் தேதி பௌர்ணமி அன்று அகல் விளக்கு திருவிழாவுடன் இந்த கொண்டாடட்டம் நிறைவடையும்.

வரலாறு மற்றும் முக்கியத்துவம்

சீன புத்தாண்டு கொண்டாடும் பழக்கமானது கி.மு 14 ஆம் நூற்றாண்டைச் சேர்ந்ததாக கூறப்படுகிறது. பழங்காலத்தில் நியான் என்ற அசுரன் இருந்ததாக புராணங்கள் கூறுகின்றன. இந்த அசுரன் மக்களைத் தாக்கி மிகவும் அச்சுறுத்தியது. ஆனால் இந்த அசுரனுக்கு சிவப்பு நிறம், பட்டாசுகளின் சப்தம் மற்றும் பட்டாசு வெடிப்பதைப் பார்த்தால் பயம். ஆகவே மக்கள் இந்த அசுரனை பயமுறுத்தி விரட்டுவதற்கு இவற்றைப் பயன்படுத்தினார்கள். அன்று முதல் மக்கள் சீன புத்தாண்டை கொண்டாடுவதாக கூறப்படுகிறது.

சீன புத்தாண்டு/சந்திர புத்தாண்டைக் கொண்டாடும் பிற நாடுகள்

சீன புத்தாண்டை கிழக்கு ஆசிய நாடுகளும் கோலாகலமாக கொண்டாடி வருகின்றன. மேலும் வியட்நாம், தென்கொரியா, வட கொரியா மற்றும் மங்கோலியா போன்ற நாடுகளும் இந்நாளில் வெவ்வேறு பெயர்கள் மற்றும் பாரம்பரியங்களுடன் இந்த நாளைக் கொண்டாடி வருகின்றன.