பிரதமர் போலி ப்ரோமொஷனில் சிக்கி சின்னாப்பின்னமாகிய போது... - புகைப்படத் தொகுப்பு!

துப்புரவு செய்யும் மோடி!

மோடி தேநீர் விடுதியில் பணியாற்றியவர் என அவரது பிரச்சாரங்களில் இருந்து, நேரடியாக அவரே பேசியது வரை பெரிதும் அனைவரும் அறிந்துள்ளனர். இதை அவரே பெருமிதமாக கூறிக் கொண்டதும் உண்டு. இந்தியா ஒரு ஜனநாயக நாடு என்பதற்கு உதாரணமாக தன்னையே அடிக்கோடிட்டு காண்பித்துக் கொண்டிருக்கிறார் மோடி அவர்கள்.

அதே சமயத்தில் மோதி அவர்கள் அரசியலில் சேர்ந்த ஆரம்பத்தில் துப்புரவு மற்றும் சமையல் வேலை செய்து வந்ததாக அறியப்படுகிறது. கட்சி வட்டாரங்கள் இதை உண்மை என்று கூறினும், இந்த செய்தியை கூறி பரப்பப்பட்ட இந்த புகைப்படம் முற்றிலும் போலியானது.

நமாஸ்!

துர்க்மெனிஸ்தானின் அதிபரை ஆஷ்காபாத் என்ற இடத்தில் சந்தித்தார் மோடி அவர்கள். அப்போது அவர்கள் நமாஸ் செய்வது போன்ற புகைப்படம் ஒன்று வெளியானது. மோடி அவர்கள் ஆர்.எஸ்.எஸ். ஆதரவாளர், இவரது கட்சி இந்து மதத்தை மட்டுமே சார்ந்திருக்கிறது என்ற செய்திகள் தொடர்ந்து அனைவராலும் கூறப்படும் ஒரு செய்தி.

ஆனால், மோடி துர்க்மெனிஸ்தானின் அதிபருடன் சேர்ந்து நமாஸ் செய்தார் பாருங்கள் என்று இவரது ஆதரவாளர்களால் இப்படியான ஒரு படம் வெளியானது. ஆனால், உண்மையில் மோடி கைக்கட்டி தான் நின்றுக் கொண்டிருந்தார்.

சென்னை வெள்ளம்

2015ல் சென்னையில் பெரும் வெள்ளம் ஏற்பட்டது. மக்கள் தங்கள் அன்றாட வாழ்க்கை பாதிக்கப்பட்டு உண்ண உணவின்று, வெளியே செல்ல முடியாமல் மிகுந்த அவதிக்கு ஆளாகினர்.

அச்சமயத்தில் தேசிய ஊடகங்கள் என்று கூறிக்கொள்ளப்படும் வட நாட்டு ஊடகங்கள் சென்னை வெள்ளத்தை ஆரம்ப நாட்களில் கண்டுகொள்ளவே இல்லை. அப்போது பிரதமர் ஒருநாள் சென்னை வெள்ளத்தை பார்வையிட வான்வழியில் வந்து சென்றார்.

அப்போது அவர் சென்னை வெள்ளத்தை பார்வையிடுவதை போன்ற ஒரு படம் வெளியானது. அதில் ஜன்னல் வழியே சென்னை வெள்ளத்தின் வேறொரு புகைப்படத்தை போட்டோஷாப் செய்து இந்திய அரசின் செய்தி குழுமமே வெளியிட்டது. இது அப்பட்டமாக போலி என தெரியவர... அனைவரும் சகட்டுமேனிக்கு திட்டித் தீர்த்தனர்.

இஸ்ரேலில்!

இது மிஷன் மோடி 2019 எனும் மோடி ஆதரவாளர் பக்கமாகும். இது அதிகாரப் பூர்வமற்ற பக்கம் என்பது குறிப்பிடத்தக்கது. இந்த பக்கத்தில் இஸ்ரேலை சேர்ந்த ஸ்ட்ரீட் ஆர்டிஸ்ட் எனப்படும் கலைஞர்களில் ஒருவர் மோடியின் படத்தை தரையில் வரைந்துக் கொண்டிருப்பது போல பதிவு பகிர பட்டது.

ஆனால், இது விக்கிமீடியாவில் இருந்து எடுக்கப்பட்ட படத்தின் போட்டோஷாப் பிரதி ஆகும். இப்படியாக அரசு ஒருபுறமும், ஆதரவாளர்கள் ஒருபுறமும் மோடியின் பெயரில் போலிகளை வெளியிட்டு ப்ரோமோஷன் செய்து வருகிறார்கள். இதுவும் நான்காண்டு சாதனை பட்டியலில் சேர்க்கப்பட வேண்டிய முக்கியம்சம் ஆகும்.

ஒபாமாவுக்கே!

உண்மையில் ஒபாமா எகிப்திய தலைவர் ஹோஸ்னி முபாரக் என்பவர் பேசுவதை தனது அலுவலகத்தில் இருந்து திரையில் காண்பது போன்ற படமாகும். ஆனால், மோடியின் ஆதரவாளர்கள் மோடியின் பேச்சை ஒபாமா பார்த்துக் கொண்டிருக்கிறார் என்பது போல போட்டோஷாப் செய்து பகிர்ந்தனர். இதில் ஒபாமாவே மோடியின் பேச்சை கேட்கிறார் என்று கேப்ஷன் வேற வைத்திருந்தனர். எதுக்க்க்கு!!!!!

சில முகநூல் பக்கங்கள் வேறு!

இதெல்லாம் போக மோடியின் புகழ் பாடும் சில முகநூல் பக்கங்களும் இருக்கின்றன. அதே போல இதற்கு சமமாக டிரால் செய்யும் பக்கங்களும் இருக்கிறது என்பது வேறு கதை.

சரி நம்ம கதைக்கு வருவோம். இஸ்ரேல் வரலாற்றில், அவர்களது பாராளுமன்றத்தில் இந்தியாவின் கொடியும் சேர்ந்து பறக்கவிடப்பட்டது. மோடியின் வருகையை பாராட்டி அவர்கள் இப்படியான செயலை செய்துள்ளனர் என்று மோடியை புகழந்து, அவரது வரலாற்று சாதனையில் இதை இணைத்தனர் அவர்களது ஆதரவாளர்கள். இதுவும் போலியே...

பிரச்சாரங்களின் போது..

இதெல்லாம் போக... 2014ம் ஆண்டு பிரச்சாரத்தின் போது மோடியின் சாதனைகள், வரலாறு, ஆதரவு பெருங்கூட்டம் என பல போட்டோஷாப் செய்யப்பட்ட படங்கள் அதிகாரப்பூர்வமாகவும், அதிகாரப் பூரவமற்ற பக்கங்களிலும் வெளியாகின.

அதற்கு இதுவும் ஒரு சாம்பிள். கொஞ்சம் நல்ல கம்பெனியா பார்த்து போட்டோஷாப் செய்ய கொடுத்திருக்கலாம். அப்பட்டமா தெரியிற மாதிரியா கொடுக்கிறது...