2930 வைரங்கள் கொண்ட அபூர்வ வைர நெக்லசை இந்த இந்திய ராஜாதான் வைத்திருந்தார்... இதற்கு என்ன நடந்தது தெரியுமா?

இந்தியாவின் மிகவும் விசித்திரமான அரசர்கள் என்று வரும்போது அதில் மகாராஜா பூபிந்தர் சிங் எப்போதும் முதலிடத்தில் இருப்பார். ஏனெனில் அவரின் வாழ்க்கைமுறை சாதாரண மக்களால் மட்டுமல்ல மற்ற ராஜாக்களால் கூட வாழ முடியாததாகும்.

பல அருங்காட்சியக கண்காட்சிகள் மற்றும் வரலாற்று புத்தகங்களில், பாட்டியாலாவின் மகாராஜா பூபிந்தர் சிங் ஒரு பிரமாண்டமான நெக்லஸால் அலங்கரிக்கப்பட்டிருப்பதைக் காணலாம். உலகளவில் பாட்டியாலா நெக்லஸ் என்று அழைக்கப்படும் இந்த நகை, ஒரு சுவாரஸ்யமான மற்றும் மர்மமான கதையைக் கொண்டுள்ளது.

Photo Credit:

It is a representational image

அதன் பிரமாண்டமான தோற்றத்தைப் போலவே, இந்த நெக்லஸின் மதிப்பு இன்று சுமார் 30 மில்லியன் அமெரிக்க டாலர்கள் என மதிப்பிடப்பட்டுள்ளது. இதன் இந்திய மதிப்பு சுமார் 252 கோடியாகும். இந்த நெக்லஸ் உலகின் மிகப்பெரிய வைர நெக்லஸ்களில் ஒன்றாக அறியப்படுகிறது. பாட்டியாலா நெக்லஸில் 2,930 டி பீர்ஸ் வைரங்கள் இருந்தன, அவை முதலில் தென்னாப்பிரிக்காவில் 1888 இல் கண்டுபிடிக்கப்பட்டு பின்னர் மகாராஜாவால் வாங்கப்பட்டன. பின்னர் அவர் இந்த வைரங்களைப் பயன்படுத்தி புகழ்பெற்ற நெக்லஸை உருவாக்கினார்.

துரதிர்ஷ்டவசமாக, 1948-ல் பாட்டியாலாவின் அரச கருவூலத்தில் இருந்து நெக்லஸ் மர்மமான முறையில் காணாமல் போனது. முப்பத்தி இரண்டு ஆண்டுகளுக்குப் பிறகு, அது ஏலத்தின் போது வெளிவந்தது, அப்போது அதில் இருந்த ஒரு வைரத்தைத் தவிர அனைத்து வைரங்களும் பறிக்கப்பட்டிருந்தது. லண்டனில் உள்ள கார்டியர் ஜூவல்ஸ் அந்த ஏலத்தில் இருந்து எஞ்சியிருந்த ஒற்றை வைரத்தை வாங்கியது, அது இன்றும் பொதுமக்களின் பார்வைக்கு வைக்கப்பட்டுள்ளது.

பாட்டியாலா நெக்லஸ்

பாட்டியாலா நெக்லஸ், கோலியர் டி பாட்டியாலா என்றும் அழைக்கப்படுகிறது, இது 1925 ஆம் ஆண்டில் பாட்டியாலா மகாராஜா பூபிந்தர் சிங்கால் வாங்கப்பட்ட ஒரு அசாதாரண உருவாக்கம் ஆகும். அந்த காலகட்டத்தில், பாரம்பரிய நகைக்கடையில் ஆர்டர் செய்யப்பட்ட மிகவும் விலையுயர்ந்த நகையாகும், இதனை செய்து முடிக்க மூன்று ஆண்டுகள் ஆனது. இந்த நெக்லஸில் 2,930 வைரங்கள் இருந்தன, 234.65 காரட் டி பீர்ஸ் மஞ்சள் வைரம் அதன் மையப் பொருளாக இருந்தது.

பிளாட்டினத்தால் செய்யப்பட்ட ஐந்து அடுக்கு சங்கிலிகள், 18 முதல் 73 காரட் வரை எடையுள்ள ஏழு பெரிய வைரங்கள் மற்றும் பர்மிய மாணிக்கங்களால் அலங்கரிக்கப்பட்டது. இதன் மொத்த எடை 1,000 காரட்டுகளை தாண்டியது, இந்த தலைசிறந்த படைப்பு இதுவரை வடிவமைக்கப்பட்ட உலகின் மிகப்பெரிய நகைகளில் ஒன்றாகும்.

மகாராணிக்கு பரிசு

ஆடம்பரமான ரசனைகளுக்கு பெயர் பெற்ற மகாராஜா பூபிந்தர் சிங், தனது விருப்பமான மனைவியான மகாராணி ஸ்ரீ பக்தவார் கவுர் சாஹிபாவுக்கு இந்த நகையை பரிசாக வழங்க நினைத்தார். அவரது மறைவுக்குப் பிறகு, பாட்டியாலா நெக்லஸை கடைசியாக அவரது மகன் யாதவிந்திர சிங் அணிந்திருந்தார், மேலும் 1948 வரை அரச கருவூலத்தில் இருந்தது, அதன் பிறகு அது மர்மமான முறையில் கிட்டத்தட்ட மூன்று தசாப்தங்களாக காணாமல் போனது. 1982 இல் ஜெனிவா ஏலத்தில் டி பியர்ஸ் வைரம் மீண்டும் வெளிவந்தாலும், அது எப்படி காணாமல் போனது என்று இதுவரை கண்டறியப்படவில்லை.

பின்னர், 1998 ஆம் ஆண்டில், நெக்லஸின் ஸ்கெலடன் லண்டனில் உள்ள ஒரு பழங்கால கடையில் கண்டுபிடிக்கப்பட்டது, அதன் விலைமதிப்பற்ற கற்கள் அகற்றப்பட்டிருந்தன. கார்டியர் லண்டன் இறுதியில் அதை வாங்கியது, க்யூபிக் சிர்கோனியா மற்றும் செயற்கை வைரங்களை மாற்றாக மீட்டமைத்தது.

தற்போது மீட்டெடுக்கப்பட்டுள்ள பாட்டியாலா நெக்லஸ் கார்டியர் காப்பகத்தில் உள்ளது. 2022 ஆம் ஆண்டு மெட் காலாவில் எம்மா சேம்பர்லெய்ன் அதை அணிந்தபோது நெக்லஸ் புதுப்பிக்கப்பட்டது, புதிய பார்வையாளர்களுக்கு அதன் வரலாற்று மற்றும் அழகியல் பாரம்பரியத்தை வெளிப்படுத்தியது.