இந்த 4 நபர்கள் உங்கள் வாழ்க்கையில் இருந்தால் உங்க உயிருக்கு எப்ப வேணாலும் ஆபத்து வரலாம் - சாணக்கிய தந்திரம்

Insync

oi-Saran Raj

By Saran Raj

Published: Thursday, July 16, 2026, 10:22 [IST]

Chanakya Niti: இந்தியாவின் தலைசிறந்த அரசியல் ஞானிகளில் ஒருவரான சாணக்கியர் தன்னுடைய அனுபவங்களை புத்தகமாக தொகுத்ததுதான் சாணக்கிய நீதி. இந்த புத்தகத்தில் சாணக்கியர் வாழ்க்கையை மகிழ்ச்சியாக வாழ்வதற்கான நெறிமுறைகளையும், வெற்றிக்கான வழிகளையும் கூறியுள்ளார்.

இன்றைய பரபரப்பான மற்றும் போட்டி நிறைந்த உலகில், நம் அன்றாட வாழ்க்கையில் நாம் யாரிடம் பழகுகிறோம் என்பது குறித்து மிகவும் கவனமாக இருக்க வேண்டியது அவசியம். நமது வெற்றியும், மகிழ்ச்சியும் நம்மைச் சுற்றியுள்ள மனிதர்களைப் பொறுத்தே அமைகின்றன. இந்தியாவின் தலைசிறந்த இந்தியத் தத்துவஞானியும் ராஜதந்திரியுமான சாணக்கியர், தனது சாணக்கிய நீதியில் இதை கற்பித்துள்ளார்.

மௌரியப் பேரரசர் சந்திரகுப்தரின் ஆலோசகராகவும், புகழ்பெற்ற அரசியல் ராஜதந்திரியாகவும் திகழ்ந்த சாணக்கியர் வழங்கிய அறிவுரைகள் மற்றும் அவரது அனுபவங்களின் போதனைகளின் தொகுப்பே 'சாணக்கிய நீதி' ஆகும். தனது போதனைகளில் ஒன்றில், அன்றாடம் நாம் சந்திக்கும் நான்கு வகையான மனிதர்களிடம் எச்சரிக்கையாக இருக்குமாறு அவர் அறிவுறுத்தியுள்ளார். அவர்களைச் சரியான நேரத்தில் அடையாளம் காணாவிட்டால், அவர்களால் நாம் வாழ்க்கையில் பெரும் சிக்கல்களை ஏற்படுத்தக்கூடும். அவர்கள் யாரென்று இந்த பதிவில் தெரிந்து கொள்ளலாம்.

மோசமான குணமுள்ள மனைவி

தங்கள் கணவனுக்குத் துரோகம் இழைக்கும் அல்லது பிற ஆண்களைப் பற்றிச் சிந்திக்கத் தொடங்கும் ஒரு பெண், ஆண்கள் வாழ்க்கையில் கிடைக்கும் மிகப்பெரிய சாபம் போன்றவர். அப்படிப்பட்ட பெண் தன் கணவருக்குத் துரோகம் இழைத்து, குடும்பத்திற்கு அவப்பெயரைத் தேடித்தருவார். அத்தகைய மனைவியுடன் வாழ்ந்து நரக வேதனையை அனுபவிப்பதை விட, அவரை விட்டு விலகிச் செல்வதே சிறந்தது என்று சாணக்கியர் கூறியுள்ளார். குடும்பத்தை மதிக்காமல் பணத்திற்கு மட்டுமே முக்கியத்துவம் அளிக்கும் ஒரு பெண்ணுடன் வாழ்வதில் எந்தப் பயனும் இல்லை என்று சாணக்கியர் வலியுறுத்துகிறார்.

துரோகம் இழைக்கும் பணியாளர்கள்

தன் முதலாளியின் உத்தரவுகளை மீறும் அல்லது அவரிடமிருந்து திருடத் தொடங்கும் ஒரு பணியாள், எப்போது வேண்டுமென்றாலும் வெடிக்கக் காத்திருக்கும் வெடிகுண்டைப் போன்றவர் என்று சாணக்கியர் கூறுகிறார். அத்தகைய பணியாள், எஜமானரின் நம்பிக்கைக்குத் துரோகம் இழைப்பதன் மூலம் ஒருவரின் வாழ்க்கையில் பெரும் குழப்பத்தையோ அல்லது ஆபத்தையோ ஏற்படுத்தக்கூடும். பண விஷயத்தில் ஒரு பணியாளரின் நடத்தையை கவனிப்பதன் மூலம் அவரது விசுவாசத்தைச் சோதித்துப் பார்க்கலாம் என்று சாணக்கியர் கூறுகிறார்.

போலியான நண்பர்கள்

கடினமான காலங்களில் நமக்குத் துணையாக நிற்பவர்கள் நம்முடைய உண்மையான நண்பர்கள்தான். ஆனால், போலி நண்பரோ நம்மை அவர்களின் நன்மைகளுக்காகப் பயன்படுத்திக்கொண்டு, நம் நம்பிக்கைக்குத் துரோகம் இழைப்பார்கள். தங்களுக்குத் தீங்கு விளைவிக்கக்கூடிய இத்தகைய போலி மற்றும் சூழ்ச்சி நிறைந்த நண்பர்களிடமிருந்து விலகி இருக்குமாறு சாணக்கியர் அறிவுறுத்துகிறார். ஏனெனில் அவர்கள் எப்போது வேண்டுமென்றாலும் ஆபத்தானவர்களாக மாறுவார்கள்.

பாம்பு

பாம்பு பூமியின் மிகவும் ஆபத்தான உயிரினங்களில் ஒன்றாகும். பாம்பு என்பது எப்போது வேண்டுமானாலும் தாக்கக்கூடிய ஒரு ஆபத்தான உயிரினமாகும். பாம்புகள் உள்ள இடத்தில் வாழ்வது மரணத்தை விலைக்கு வாங்குவதைப் போன்றது. பாம்புகள் குறித்து எப்போதும் எச்சரிக்கையாக இருக்க வேண்டும், அவை இருக்க வாய்ப்புள்ள இடங்களைத் தவிர்ப்பது நல்லது சாணக்கியர் மக்களை எச்சரித்துள்ளார்.