இந்தியாவின் மார்பக வரி முதல் ஜெர்மனியின் விபச்சார வரி உலக வரலாற்றின் மிக மோசமான வரிகள்... ஷாக் ஆகாதீங்க...!

2025 ஆம் ஆண்டுக்கான பட்ஜெட்தான் இந்தியா முழுவதும் நேற்று முதல் விவாதப் பொருளாக மாறிவருகிறது. இந்திய நிதியமைச்சர் பிப்ரவரி 1 ஆம் தேதி 2025-26 நிதியாண்டுக்கான பட்ஜெட்டை தாக்கல் செய்துள்ளார், இது வரி செலுத்துவோர் மத்தியில் நிவாரணத்திற்கான நம்பிக்கையைத் தூண்டியுள்ளது.

அமெரிக்க ஜனாதிபதி டொனால்ட் டிரம்ப் தனது நாட்டில் வருமான வரியை ஒழிக்க வேண்டும் என்று வாதிட்டுள்ளார், மற்ற நாடுகள் மீது வரிகளை விதிப்பதன் மூலம் தனது நாட்டின் நிதியை உயர்த்த முன்மொழிந்துள்ளார். உலகம் முழுவதும் பட்ஜெட் சீசன் நடந்து வருவதால் உலக வரலாற்றில் இருந்த சில வினோதமான வரிகளைப் பற்றி இந்த பதிவில் தெரிந்து கொள்ளலாம்.

ஜன்னல்களுக்கு வரி

1696 ஆம் ஆண்டு இங்கிலாந்து மற்றும் வேல்ஸின் மன்னர் மூன்றாம் வில்லியம் ஒரு அசாதாரண வரியை அறிமுகப்படுத்தினார். இந்த அறிவிப்பு ஜன்னல்களுக்கு வரி விதித்தது. மக்கள் தங்கள் வீடுகளில் உள்ள ஜன்னல்களின் எண்ணிக்கையின் அடிப்படையில் வரி செலுத்த வேண்டியிருந்தது. ஏனெனில் அரசரின் கருவூலம் காலியாக இருந்தது, அதை நிரப்ப அவர் இந்த வரி விதிப்பைக் கொண்டு வந்தார்.

10 ஜன்னல்களுக்கு மேல் உள்ள வீடுகள் பத்து ஷில்லிங் வரி செலுத்த வேண்டியிருந்தது. வரி செலுத்துவதைத் தவிர்க்க, பலர் தங்கள் ஜன்னல்களை கற்களால் மூடினர், ஆனால் இது அவர்களின் வாழ்க்கை நிலைமையை மோசமாக்கியது. இந்த வரி கிட்டதட்ட 156 ஆண்டுகள் நீடித்தது, இறுதியாக 1851 இல் நீக்கப்பட்டது.

தாடிக்கு வரி

1535 ஆம் ஆண்டில், இங்கிலாந்தின் எட்டாம் ஹென்றி மன்னர் தாடிக்கான வரியை அறிமுகப்படுத்தினார். இந்த வரி ஒரு நபரின் சமூக அந்தஸ்தை அடிப்படையாகக் கொண்டு விதிக்கப்பட்டது. எட்டாம் ஹென்றிக்குப் பிறகு, அவரது மகள் முதலாம் எலிசபெத் மகாராணி, இரண்டு வாரங்களுக்கு மேல் தாடி வைத்திருக்கும் அனைவரும் வரி செலுத்த வேண்டும் என்ற சட்டத்தை இயற்றினார். இதில் கூடுதல் சுவாரஸ்யம் என்னவென்றால், வரி வசூலின் போது யாராவது வீட்டில் இல்லையென்றால், பக்கத்து வீட்டுக்காரர் வரி செலுத்த வேண்டும்.

1698 ஆம் ஆண்டில், ரஷ்யாவின் ஜார் பீட்டர் தி கிரேட் அவர்களும் தாடி வரியை விதித்தார். பீட்டர் ரஷ்ய சமூகத்தை ஐரோப்பிய நாடுகளைப் போல நவீனமயமாக்க விரும்பியதால், தாடி வளர்ப்பதற்கு மக்கள் வரி செலுத்த வேண்டியிருந்தது.

ஆன்மாக்களுக்கு வரி

1718 ஆம் ஆண்டில் பீட்டர் தி கிரேட் "ஆன்மாக்கள்" மீது ஒரு வரியை அறிமுகப்படுத்தினார். இந்த வரி ஆன்மாக்களை நம்புபவர்களுக்குப் பொருந்தும். ஆன்மா மீது நம்பிக்கை இல்லாதவர்கள் கூட மதத்தில் நம்பிக்கை இல்லாததற்காக வரி விதிக்கப்பட்டனர். தேவாலயம் மற்றும் செல்வந்தர்களைத் தவிர கிட்டத்தட்ட அனைவருக்கும் இந்த வரி விதிக்கப்பட்டது. தாடி வரியைப் போலவே, சேகரிப்பின் போது யாராவது இல்லாதிருந்தால், அவர்களின் அண்டை வீட்டார் செலுத்த வேண்டியிருந்தது.

மார்பக வரி

இந்தியாவின் மோசமான கரும்புள்ளிகளில் இந்த வரியும் ஒன்று. 19 ஆம் நூற்றாண்டில், கேரளாவின் திருவிதாங்கூர் மன்னர் சில தாழ்த்தப்பட்ட சாதிகளைச் சேர்ந்த பெண்கள் தங்கள் மார்பகங்களை மறைப்பதற்காக ஒரு வரியை விதித்தார். இந்த அதிக வரியை செலுத்தாத பெண்கள் தங்கள் மார்பகங்களை மறைக்க அனுமதிக்கப்படவில்லை. வரி செலுத்த மறுத்து, எதிர்ப்புத் தெரிவித்து தனது மார்பகங்களை வெட்டிய நங்கேலி என்ற பெண்ணின் துணிச்சலால் இந்த வரி இறுதியாக ரத்து செய்யப்பட்டது. அவர் அதிக இரத்தப்போக்கால் இறந்தார், இதனால் மன்னர் வரியை முடிவுக்குக் கொண்டுவர வேண்டிய கட்டாயம் ஏற்பட்டது.

பேச்சுலர் வரி

ரோமில் 9 ஆம் நூற்றாண்டில், திருமணமாகாத பிரம்மசாரிகளுக்கு ஒரு வரி விதிக்கப்பட்டது. திருமணத்தை ஊக்குவிக்கும் நோக்கில் அகஸ்டஸ் பேரரசரால் இது அறிமுகப்படுத்தப்பட்டது. குழந்தைகள் இல்லாத திருமணமான தம்பதிகள் மீதும் அகஸ்டஸ் ஒரு வரியை விதித்தார். இந்த வரி 20 முதல் 60 வயதுக்குட்பட்ட தனிநபர்களுக்குப் பொருந்தும்.

15 ஆம் நூற்றாண்டில், ஒட்டோமான் பேரரசும் இந்த வரியை விதித்தது. இத்தாலிய சர்வாதிகாரி பெனிட்டோ முசோலினியும் 1924 இல் இந்த வரியை அறிமுகப்படுத்தினார், இது 21 முதல் 50 வயதுக்குட்பட்ட திருமணமாகாத ஆண்கள் மீது விதிக்கப்பட்டது.

பாலியல் வரி

1971 ஆம் ஆண்டில், அமெரிக்காவில் உள்ள ரோட் தீவு கடுமையான நிதி சிக்கல்களை எதிர்கொண்டபோது, ​​ஜனநாயக மாநில சட்டமன்ற உறுப்பினர் பெர்னார்ட் கிளாட்ஸ்டோன், மாநிலத்தில் ஒவ்வொரு பாலியல் உடலுறவுக்கும் இரண்டு டாலர் வரி விதிக்க முன்மொழிந்தார். இது ஒருபோதும் செயல்படுத்தப்படவில்லை என்றாலும், ஜெர்மனியில், 2004 இல் நிறைவேற்றப்பட்ட ஒரு வரிச் சட்டம் ஒவ்வொரு விபச்சாரியும் 150 யூரோக்கள் மாத வரி செலுத்த வேண்டும் என்று கூறியது.

ஜெர்மனியில் விபச்சாரம் சட்டப்பூர்வமானது, ஆனால் அது பாலியல் வரி போன்ற சட்டங்களால் கட்டுப்படுத்தப்படுகிறது. பான் நகரில், விபச்சாரிகள் ஒவ்வொரு நாளும் ஆறு யூரோக்கள் செலுத்த வேண்டும். இந்த பாலியல் வரி நாட்டிற்கு சுமார் ஒரு மில்லியன் யூரோக்கள் ஆண்டு வருமானத்தை பெற்றுத் தருகிறது.

சிறுநீர் வரி

பண்டைய ரோமில், சிறுநீர் ஒரு மதிப்புமிக்க பொருளாகக் கருதப்பட்டது. சிறுநீரில் அம்மோனியா அதிகம் இருந்ததால் துணி துவைப்பதற்கும் பற்களை சுத்தம் செய்வதற்கும் பயன்படுத்தப்பட்டது. பேரரசர் வெஸ்பாசியன் பொது சிறுநீர் கழிப்பிடங்களிலிருந்து சிறுநீர் விநியோகத்திற்கு வரி விதித்தார். அவரது மகன் டைட்டஸ் இந்தக் கொள்கையை கேள்வி எழுப்பியபோது, ​​வெஸ்பாசியன் தனது மூக்கில் ஒரு நாணயத்தை வைத்து, "பணம் நாற்றமடிக்காது" என்று கூறியதாக கூறப்படுகிறது.

உப்பு வரி

14 ஆம் நூற்றாண்டில், பிரான்ஸ் உப்புக்கு வரியை விதித்தது, இது பரவலாக எதிர்க்கப்பட்டது மற்றும் பிரெஞ்சு புரட்சியில் முக்கிய பங்கு வகித்தது. இந்த வரி இரண்டாம் உலகப் போருக்குப் பிறகு 1945 இல் ரத்து செய்யப்படும் வரை தொடர்ந்தது. அதேபோல், ஆங்கிலேயர்கள் இந்தியாவில் உப்பு வரியை விதித்தனர். பிரிட்டிஷ் கிழக்கிந்திய நிறுவனம் முதன்முதலில் 1759 இல் உப்புக்கு வரி விதித்தது, மேலும் அது 1930 இல் மகாத்மா காந்தியின் உப்பு சத்யாகிரகம் வரை நடைமுறையில் இருந்தது.