புஜங்காசனம் செய்வது எப்படி? அதன் நன்மைகள் என்ன? யாரெல்லாம் செய்யக்கூடாது?

Bhujangasana Benefits: தற்போது மக்களுக்கு யோகாசனங்களின் மீது ஆர்வம் அதிகரித்துள்ளது. நிறைய பேர் உடல் ஆரோக்கியத்திற்காக தினமும் யோகாசனங்களில் ஈடுபட்டு வருகிறார்கள். யோகாசனங்களில் ஒன்றான புஜங்காசனம் ஒரு எளிமையான மற்றும் சூரிய நமஸ்காரத்தின் 7 ஆவது யோக நிலையாகும். இந்த நிலையானது பாம்பு படமெடுத்து இருப்பது போன்று இருக்கும். சமஸ்கிருதத்தில் புஜங்கா என்றால் பாம்பு என்றும், ஆசனம் என்றால் நிலை என்று பொருள்.

இந்த புஜங்காசனத்தின் போது உடல் முழுவதும் ஸ்ட்ரெட்ச் ஆவதோடு, முதுகு, அடிவயிறு, தோள்பட்டை, மேல் முகுது மற்றும் மார்பு பகுதிகள் அதிகம் வேலை செய்யும். அதாவது புஜங்காசனம் மார்பு, கழுத்து, தோள்பட்டை போன்ற பகுதிகளை விரிவடையச் செய்யும். முக்கியமாக இந்த புஜங்காசனம் செய்வது மிகவும் சுலபம்.

இருப்பினும், இந்த புஜங்காசனத்தை செய்யும் முன், ஒருசில விஷயங்களை தெரிந்து கொள்ள வேண்டியது அவசியம். இப்போது புஜங்காசனத்தை எப்படி செய்வது, அதன் நன்மைகள் என்ன மற்றும் யாரெல்லாம் இந்த ஆசனத்தை செய்யக்கூடாது என்பனவற்றைக் காண்போம்.

புஜங்காசனம் செய்யும் முறை

* முதலில் குப்புற படுத்துக் கொள்ள வேண்டும். கால்களை ஒன்றாக இணைத்து வைத்திருக்க வேண்டும்.

* பின் கைகளை மடக்கி, உள்ளங்கைகளை மார்புக்கு அருகில் இரண்டு புறமும் வைத்துக் கொள்ள வேண்டும்.

* பின்பு மூச்சை உள்ளிழுத்துக் கொண்டே தலை, கழுத்து மற்றும் மார்பு பகுதியை மேலே உயர்த்தி, பின்னோக்கி வளைய வேண்டும். இந்நிலையில் அடிவயிறு தரையில் ஒட்டியிருக்க வேண்டும். இந்த நிலையில் 15-20 நொடிகள் இருக்க வேண்டும்.

* பிறகு மூச்சை வெளிவிட்டுக் கொண்டே மெதுவாக பழைய நிலைக்கு வர வேண்டும்.

* இப்படி 5 முறை செய்ய வேண்டும்.

புஜங்காசனம் செய்வதால் பெறும் நன்மைகள்:

தினமும் புஜங்காசனம் செய்வதால் பின்வரும் நன்மைகள் கிடைக்கும். அவையாவன:

* முதுகு தசைகளில் உள்ள அசௌகரியத்தில் இருந்து நிவாரணம் அளிக்கும். முதுகு வலியைக் குறைக்கும்.

* மன அழுத்தம் மற்றும் பதட்டத்தில் இருந்து விடுவிக்கும்.

* முதுகு கூன் ஏற்படாமல் தடுக்கும்.

* மாதவிடாய் கால வலியில் இருந்து நிவாரணம் அளிக்கும் மற்றும் மாதவிடாய் சுழற்சியை ஒழுங்குபடுத்தும்.

* பிட்டப்பகுதி நல்ல வடிவில் இருக்கும்.

* செரிமானம் சீராகும்.

* உடலில் இரத்த ஓட்டம் மேம்படும்.

* தோள்பட்டை, மேல் முதுகு மற்றும் தண்டுவடம் வலிமையாகும்.

யாரெல்லாம் புஜங்காசனம் செய்யக்கூடாது?

புஜங்காசனம் செய்யும் முன் அவசியம் தெரிந்து கொள்ள வேண்டியவைகள் பின்வருமாறு:

* புஜங்காசனம் செய்யும் போது உடலை இறுக்கமாக வைத்திருக்கக்கூடாது.

* கர்ப்பிணிகள் இந்த ஆசனத்தை செய்யக்கூடாது.

* ஈஸியாக உள்ளது என்று, இந்த ஆசனத்தை அளவுக்கு அதிகமாக செய்யக்கூடாது.

* ஹெர்னியா, பெப்டிக் அல்சர், ஹைப்பர் தைராய்டு அல்லது குடல் காசநோய் உள்ளவர்கள், யோகா நிபுணரை அணுக வேண்டும்.

* இந்த ஆசனம் செய்யும் போது உடலை L-வடிவில் வைக்க முயற்சிக்க கூடாது.

Disclaimer: இந்தக் கட்டுரையில் வழங்கப்பட்ட தகவல்கள் பொதுவான தகவல் மற்றும் கல்வி நோக்கங்களுக்காக மட்டுமே, மேலும் இது தொழில்முறை மருத்துவ ஆலோசனை, நோயறிதல் அல்லது சிகிச்சைக்கு மாற்றா பகிரப்படவில்லை. மருத்துவ நிலை குறித்து உங்களுக்கு ஏதேனும் கேள்விகள் இருந்தால் உங்கள் மருத்துவர் அல்லது தகுதிவாய்ந்த சுகாதார வழங்குநரின் ஆலோசனையைப் பெறவும்.