உங்க குடலை சுத்தம் செய்யணுமா? அப்ப இந்த உணவுகளை அதிகம் சாப்பிடுங்க...

குறுக்குவெட்டுக் காய்கறிகள்

குறுக்குவெட்டுக் காய்கறிகளான முட்டைக்கோஸ், காலிப்ளவர், ப்ராக்கோலி போன்றவை உடலுக்கு மிகவும் நல்லது. குறிப்பாக இந்த வகை காய்கறிகள் செரிமான மண்டலத்தின் ஆரோக்கியத்தை மேம்படுத்துபவைகளாகும். முக்கியமாக இந்த வகை காய்கறிகளில் நார்ச்சத்து ஏராளமான அளவில் உள்ளது. இந்த காய்கறிகளை ஒவ்வொரு முறை உட்கொள்ளும் போதும், குடலில் உள்ள டாக்ஸின்கள் மற்றும் கழிவுப் பொருட்கள் வெளியேறி, குடல் சுத்தமாகிக் கொண்டிருக்கும். மேலும் குறுக்குவெட்டுக் காய்கறிகளில் ஆன்டி-ஆக்ஸிடன்ட்டுகள் மிகவும் அதிக அளவில் நிறைந்துள்ளது.

பூண்டு

பூண்டு இதயம் மற்றும் இரத்த ஓட்ட சுழற்சிக்கு மட்டும் உதவுவதில்லை. இதில் உள்ள ஆன்டி-பாக்டீரியல், ஆன்டி-பாராசிடிக் மற்றும் ஆன்டி-வைரல் பொருட்கள், குடலில் இருந்து டாக்ஸின்கள், பூச்சிகள் போன்றவற்றை வெளியேற்ற உதவும். மேலும் பூண்டில் உள்ள சக்தி வாய்ந்த ஆன்டி-ஆக்ஸிடன்ட்டுகள், உடலினுள் இருக்கும் உட்காயங்களைக் குறைக்க உதவும். அதோடு, இது உணவுகளில் உள்ள சத்துக்களை உறிஞ்சும் திறனை மேம்படுத்தும், செரிமானத்தை சீராக்கும் மற்றும் டாக்ஸின்கள் மற்றும் கழிவுகளை நீக்கும்.

சுத்தமான நீர் மற்றும் உப்பு

குடலில் போதுமான அளவு நீர்ச்சத்து இருந்தால், அது ஆரோக்கியமாக இருக்கும். ஆனால் எப்போது நீர்ச்சத்து குறைவாக உள்ளதோ, அதனால் மலச்சிக்கல் ஏற்பட்டு, குடலில் டாக்ஸின்களின் அளவு அதிகரிக்கும். ஆகவே தினமும் போதுமான அளவு நீரைக் குடிக்கும் பழக்கத்தைக் கொள்ளுங்கள். அதிலும் நீருடன் ஒரு சிட்டிகை உப்பு சேர்த்து கலந்து குடித்தால், அதனால் குடலை சுத்தம் செய்யும் செயல்முறையானது வேகப்படுத்தப்படும்.

அவகேடோ

அவகேடோ என்னும் வெண்ணெய் பழம் செரிமானத்திற்கு மட்டுமின்றி, சுத்தம் செய்யும் உதவியாக இருக்கும். இதில் உள்ள கரையக்கூடிய மற்றும் கரையாத நார்ச்சத்துக்கள், குடலியக்கத்தின் ஆரோக்கியம் மற்றும் குடல் சுத்தத்தை ஊக்குவிக்கும். இப்பழத்தில் உள்ள நார்ச்சத்து, குடலில் புற்றுநோய் வரும் அபாயத்தைக் குறைக்கும். முக்கியமாக இதில் உள்ள கரையக்கூடிய நார்ச்சத்து நீரை உறிஞ்சுவதோடு, குடலில் உள்ள இதர பொருட்களுடன் பிணைக்கிறது.

பச்சை இலைக் காய்கறிகள்

பச்சை இலைக் காய்கறிகளான பசலைக்கீரை, கேல் போன்றவை குடலை சுத்தம் செய்வதோடு, செரிமான மண்டலத்திற்கு நல்ல பாதுகாப்பை வழங்கும். இதில் உள்ள கொழுப்பில் கரையக்கூடிய குளோரோபில் குடலின் சுவற்றில் ஒட்டிக் கொண்டு, பாக்டீரியாவின் வளர்ச்சியை முடக்கி, பாக்டீரியாக்களை நீக்கி, குடல் ஆரோக்கியத்தை மேம்படுத்தும். முக்கியமாக இந்த வகை காய்கறிகளில் உள்ள அதிகப்படியான குளோரோபில், குடலை சுத்தம் செய்வதோடு, கல்லீரலையும் சுத்தம் செய்ய உதவும்.

நொதிக்க வைக்கப்பட்ட உணவுகள்

செரிமான மண்டலமானது ஏராளமான நன்மையை வழங்கும் பாக்டீரியாவால் ஆனது. எப்போது செரிமான மண்டலத்தில் நல்ல பாக்டீரியாக்களின் அளவில் ஏற்றத்தாழ்வு ஏற்படுகிறதோ, அப்போது ஒட்டுமொத்த உடல் ஆரோக்கியமும் பாதிக்கப்படும். உடலில் குடல் பகுதியில் தான் 80 சதவீத நோயெதிர்ப்பு மண்டலம் அமைந்துள்ளது. ஆகவே குடல் ஆரோக்கியமாக இல்லாவிட்டால், நோயெதிர்ப்பு மண்டலம் சிறப்பாக செயல்படாமல் போகும். இதனை சரிசெய்வதற்கு நொதிக்க வைக்கப்பட்ட உணவுகளான தயிர், கொம்புச்சா, ஊறுகாய், கிமிச்சி போன்றவற்றை உட்கொள்ள வேண்டும்.

கற்றாழை

கற்றாழை உடலுக்கு மிகவும் நல்லது. முக்கியமாக கற்றாழை உடலினுள் ஏற்படும் உட்காயங்களை சரிசெய்து, செரிமான பிரச்சனைகள் மற்றும் இதரை ஆரோக்கிய பிரச்சனைகளைத் தடுக்க உதவி புரியும். மேலும் கற்றாழை மலச்சிக்கல் பிரச்சனையை எளிதில் நீக்கி, ஒட்டுமொத்த செரிமான மண்டலத்தின் செயல்பாட்டை மென்மையாக்கும். எனவே குடலை சுத்தமாக வைத்துக் கொள்ள நினைத்தால் கற்றாழை ஜூஸைக் குடியுங்கள்.

சியா மற்றும் ஆளி விதைகள்

சியா மற்றும் ஆளி விதைகள் இரண்டிலுமே நார்ச்சத்து, கொழுப்பு மற்றும் ஒமேகா-3 கொழுப்பு அமிலங்கள் நிறைந்துள்ளது. இவை ஆரோக்கியமான செரிமானத்தை ஊக்குவிப்பதோடு, குடலை சுத்தமாக வைத்துக் கொள்ளவும் உதவும். இவற்றில் உள்ள ஒமேகா-3 கொழுப்பு அமிலங்கள், குடலில் உள்ள காயங்களை குறைப்பதோடு, செல் சுவர்களை உறுதிப்படுத்தும். முக்கியமாக இவற்றில் இருக்கும் கரையக்கூடிய நார்ச்சத்து, ஒட்டுமொத்த செரிமான செயல்முறையை சிறப்பாக வைத்துக் கொள்ளும்.

பீன்ஸ் மற்றும் பருப்பு வகைகள்

பீன்ஸ், பருப்பு மற்றும் பயறு வகைகளுக்கு குடலை சுத்தம் செய்யும் திறன் உள்ளது. முக்கியமாக இவைகளில் பைட்டோ-நியூட்ரியண்ட்டுகள் மற்றும் ஆன்டி-ஆக்ஸின்ட்டுகளுடன், நார்ச்சத்தும் ஏராளமான அளவில் உள்ளது. ஒருவர் பீன்ஸ் மற்றும் பருப்பு வகைகளை அடிக்கடி உணவில் சேர்த்து வந்தால், உடலில் இருந்து டாக்ஸின்கள் வெளியேற்றப்படுவதோடு, குடலியக்கமும் சிறப்பாக இருக்கும். குறிப்பாக இந்த உணவுப் பொருட்களை ஒருவர் அதிகம் உட்கொண்டு வந்தால், குடல் சுத்தமாக இருப்பதோடு, நோயெதிர்ப்பு மண்டலத்தின் செயல்பாடு சிறப்பாக இருக்கும்.

ஆப்பிள்

ஆப்பிளில் உள்ள பெக்டின் என்னும் பொருள், உடல் ஆரோக்கியத்தை மேம்படுத்த உதவும். ஆப்பிளில் நார்ச்சத்து அதிகம் உள்ளதால், இது ஆரோக்கியமான செரிமான மண்டலத்திற்கு வழிவகுக்கும். இதில் இருக்கும் பெக்டின், உடலில் இருந்து அனைத்து வகையான டாக்ஸின்களையும் நீக்க வல்லது. ஆகவே உங்கள் குடல் சுத்தமாகவும், ஆரோக்கியமாகவும் இருக்க நினைத்தால், தினமும் ஒரு ஆப்பிள் சாப்பிடும் பழக்கத்தைக் கொள்ளுங்கள்.

க்ரீன் டீ

எடையைக் குறைப்பதோடு, குடலையும் சுத்தம் செய்ய வேண்டுமா? அப்படியானால் க்ரீன் டீ குடியுங்கள். இதில் உள்ள ஆன்டி-ஆக்ஸிடன்ட், குடலியக்கத்தை மேம்படுத்துவதோடு, குடலை சுத்தமாகவும் வைத்துக் கொள்ளும். க்ரீன் டீயில் உள்ள அதிகளவிலான வைட்டமின் சி, நோயெதிர்ப்பு மண்டலத்திற்கு உறுதுணையாக இருக்கும். எனவே தினமும் ஒரு கப் க்ரீன் டீ குடிக்கும் பழக்கத்தைக் கொண்டு, உடல் குடலை சுத்தமாக வைத்துக் கொள்ளுங்கள்.

எலுமிச்சை

எலுமிச்சை கல்லீரலில் பித்தநுர் உற்பத்தியைத் தூண்டி, செரிமான மண்டலத்தின் சிறப்பான செயல்பாட்டிற்கு உதவியாக இருக்கும். ஆகவே தினமும் காலையில் வெதுவெதுப்பான நீரில் எலுமிச்சை ஜூஸ் தயாரித்துக் குடித்து வாருங்கள். இதனால் குடல் மட்டுமின்றி, ஒட்டுமொத்த உடலும் சுத்தமாக இருக்கும்.