முதுகு வலியால் கஷ்டப்படுறீங்களா? அப்ப இந்த ஆசனத்தை தினமும் காலையில செய்யுங்க...

Ardha Pawanmuktasana Benefits In Tamil: தற்போதைய காலகட்டத்தில் பெரும்பாலானோர் நீண்ட நேரம் ஒரே இடத்தில் கம்ப்யூட்டர் முன் உட்கார்ந்து வேலை செய்து வருகிறார்கள். இதன் காரணமாக முதுகு வலியால் தினந்தோறும் ஏராளமானோர் கஷ்டப்பட்டு வருகிறார்கள். நாம் தினமும் ஒரு யோகாசனம் குறித்து காண்கிறோம். அந்த வகையில் இன்று நாம் காணவிருப்பது முதுகு வலியைக் குறைக்க உதவும் அர்த்தபவன முக்தாசனம் குறித்து தான்.

யோகாசனங்கள் முதுகு வலியில் இருந்து நல்ல நிவாரணத்தை அளிக்கும். அதுவும் அர்த்தபவன முக்தாசனம் முதுகு வலியைக் குறைப்பதோடு, வயிறு தொடர்பான பல பிரச்சனைகளைக் குறைக்கவும் உதவும். உங்களுக்கு அர்த்தபவன முக்தாசனம் எப்படி செய்வது, அதன் நன்மைகள் என்ன, யாரெல்லாம் இந்த ஆசனத்தை செய்யக்கூடாது என்பனவற்றை குறித்து தெரிந்து கொள்ள வேண்டுமா? அப்படியானால் இக்கட்டுரையைத் தொடர்ந்து படியுங்கள்.

அர்த்தபவன முக்தாசனம் செய்யும் முறை

* முதலில் தரையில் மல்லாந்து படுத்துக் கொள்ள வேண்டும்.
* இரண்டு கைகளையும் உடலை ஒட்டியவாறு வைத்துக் கொள்ள வேண்டும்.
* பின் மூச்சை உள்ளிழுத்துக் கொண்டு வலது முழங்காலை மடித்து, கைகளால் கோர்த்து இழுத்துப் பிடிக்க வேண்டும். பின் தலையை முன்னோக்கி உயர்த்தி தாடையால் முழங்காலை தொடும் நிலையில் இருக்க வேண்டும்.
* காலை மடக்கி வயிற்றோடு வைக்கும் போது மூச்சை வெளியேற்ற வேண்டும். இந்நிலையில் இடது காலானது தரையில் நீட்டியபடி இருக்க வேண்டும். இப்படி 30 நொடிகள் அல்லது ஒரு நிமிடம் இருக்க வேண்டும்.
* பின் பழைய நிலைக்கு திரும்பி, இடது காலில் இதே முறையை செய்ய வேண்டும்.
* இப்படி ஒவ்வொரு காலில் செய்யும் போதும் ஒரு நிமிடம் இருக்க வேண்டும். இந்த ஆசனத்தை 3-4 முறை செய்ய வேண்டும்.

அர்த்தபவன முக்தாசனம் நன்மைகள்

அர்த்தபவன முக்தாசனத்தை தினமும் செய்து வந்தால், நாம் தினந்தோறும் சந்திக்கும் ஒருசில பிரச்சனைகளில் இருந்து விடுபடலாம். அவை:

* இந்த ஆசனமானது கீழே முதுகு பகுதிக்கு மசாஜ் செய்வது போன்ற உணர்வை அளித்து, கீழ் முதுகு வலியில் இருந்து நிவாரணம் அளிக்கும்.
* செரிமான பிரச்சனைகளை சந்திப்பவர்கள், இந்த ஆசனத்தை செய்யும் போது வயிற்றில் உள்ள அதிகப்படியான வாயு வெளியேற்றப்படும். மேலும் அடிவயிற்றில் அழுத்தம் கொடுக்கப்படுவதால் மலச்சிக்கல் பிரச்சனைகளில் இருந்தும் விடுபட உதவும்.
* பெண்கள் இந்த ஆசனத்தை செய்யும் போது, அது இடுப்பு தசைகள் மற்றும் இனப்பெருக்க உறுப்புகளுக்கு மசாஜ் அளிப்பது போன்று இருக்கும் மற்றும் மாதவிடாய் பிரச்சனைகளைக் குறைக்கும்.
* முக்கியமாக இந்த ஆசனத்தை தினமும் செய்யும் போது, அடிவயிற்றுப் பகுதி, தொடை மற்றும் பிட்டப் பகுதியில் உள்ள அதிகப்படியான கொழுப்புக்கள் குறையும்.

யாரெல்லாம் இந்த ஆசனத்தை செய்யக்கூடாது?

* கர்ப்பிணிப் பெண்கள் இந்த ஆசனத்தை செய்யக்கூடாது.
* பைல்ஸ் அல்லது ஹெர்னியா பிரச்சனையால் அவதிப்படுபவர்கள், இந்த ஆசனத்தை யோகா நிபுணரின் மேற்பார்வையில் மட்டுமே செய்ய வேண்டும்.
* முக்கியமாக இந்த ஆசனத்தை சமீபத்தில் அடிவயிற்றுப் பகுதியில் அறுவை சிகிச்சை செய்தவர்கள் செய்யக்கூடாது. ஏனெனில் இந்த ஆசனமானது அடிவயிற்றுப் பகுதியில் அதிக அழுத்தத்தைக் கொடுக்கும்.

Disclaimer: இந்தக் கட்டுரையில் வழங்கப்பட்ட தகவல்கள் பொதுவான தகவல் மற்றும் கல்வி நோக்கங்களுக்காக மட்டுமே, மேலும் இது தொழில்முறை மருத்துவ ஆலோசனை, நோயறிதல் அல்லது சிகிச்சைக்கு மாற்றா பகிரப்படவில்லை. மருத்துவ நிலை குறித்து உங்களுக்கு ஏதேனும் கேள்விகள் இருந்தால் உங்கள் மருத்துவர் அல்லது தகுதிவாய்ந்த சுகாதார வழங்குநரின் ஆலோசனையைப் பெறவும்.