திருமணமாகி ஒரு வருஷம் ஆயிடுச்சா? என்ன பரிசு தரலாம்?

Relationship

oi-Maha

By Maha

Updated: Tuesday, January 1, 2013, 15:59 [IST]

இன்றைய காலத்தில் திருமணமாகி ஓர் ஆண்டு நிறைவானதும், வாழ்ந்த வாழ்க்கைக்கு பிரதிபலிப்பாக ஜோடிகள் பரிசுகளைப் பரிமாறிக் கொள்வது பேஷன் ஆகிவிட்டது. ஏனெனில் இந்த ஓர் ஆண்டில் அவர்கள் இருவரும் ஒருவரை ஒருவர் நன்கு புரிந்து கொண்டு, எந்த பிரச்சனை வந்தாலும், அதனையும் எதிர்கொண்டு, நல்ல படியாக ஒரு வருடத்தை கடந்துவிட்டனர் என்பதை ஊக்குவிக்கும் வகையில், இருவரும் பரிசுகளை பரிமாறிக் கொள்கின்றனர். பொதுவாக அக்காலத்தில் காகித பரிசுகளை ஒரு ஆண்டு நிறைவானதற்கு, பரிசாக வழங்கப்பட்டு வந்தது. ஆனால் இந்த நவீன காலங்களில், வாட்ச், உடைகள் போன்றவை தான் பொருத்தமான பரிசாக கருதப்படுகிறது. ஆகவே ஓராண்டு திருமண நிறைவு விழாவைக் கொண்டாட சிறந்த பரிசை தேர்ந்தெடுக்க வேண்டுமெனில், அவ்வாறு பரிசாகக் கொடுக்கும் பொருளானது சிறந்த நினைவுச் சின்னமாக இருக்க வேண்டும். அதற்கு ஒரு நல்ல சிந்தனை மற்றும் படைப்பாற்றல் வேண்டும். இப்போது அந்த மாதிரி நினைவுச் சின்னமாக இருக்க எந்த பொருட்களை கொடுத்தால், நன்றாக இருக்கும் என்று பார்ப்போமா!!!

1. நம்மிடம் இருக்கும் பணத்தைப் பொறுத்து ஜோடிக்கு பரிசு வழங்க வேண்டும். அதிலும் அவ்வாறு வாங்கும் பொருளானது, அவருக்கு உபயோகப்படுவது போல் வாங்கிக் கொடுத்தால், எந்த அளவு அவரைப் புரிந்துள்ளோம் என்பதை வெளிக்காட்டி, அவர்களுக்கு நம்மேல் இருக்கும் ஆசை இன்னும் அதிகரிக்கும். மேலும் வீட்டில் இருக்கும் பொருளாக வாங்காமல், அர்த்தமுள்ள ஒன்றாக, அவர் மட்டுமே பயன்படுத்தும் வகையில் வாங்கிக் கொடுப்பது நல்லது. முக்கியமாக பணம் உள்ளது என்பதற்காவும், அவர்களுக்கு நம்மீது ஒரு நல்ல அபிப்ராயத்தை ஏற்படுத்துவதற்கு விலையுயர்ந்த பரிசு வாங்க அவசியமில்லை என்பதை நினைவில் கொள்ள வேண்டும்.

2. பாரம்பரியமாக அளிக்கப்படும் காகித பரிசை தேர்வு செய்யலாம். அதாவது உங்கள் துணைவருக்கு ஏதாவது பிடித்த பெயிண்டிங் அல்லது ஒரு வருடம் இருவரும் எடுத்த சில மறக்க முடியாத போட்டோக்களை சேகரித்து, ஆல்பம் போன்று செய்து, கொடுக்கலாம். புத்தகங்கள் படிப்பதில் ஆர்வமுள்ளவர் என்றால், அவருக்கு பிடித்த வாசகர்களின் புத்தகங்களை வாங்கிக் கொடுக்கலாம். சொல்லப்போனால் காகிதத்தில் சிறந்த பரிசு என்றாலே இது கார்டு கொடுப்பது தான், அதிலும் காதலுடன் அழகான வாசகங்கள் அல்லது கவிதைகளை தன் கைகளால் எழுதிக் கொடுப்பது. இது போன்றும் கொடுக்கலாம்.

3. நவீன பரிசுகளான உடை அல்லது கடிகாரம் போன்ற பொருட்களையும் தேர்வு செய்யலாம். பொதுவாக கைக்கடிகாரம் வாங்கிக் கொடுப்பது மிகவும் சிறப்பாக இருக்கும். சிலர் உடைகளை விரும்புவார்கள். எனவே அவர்களின் விருப்பத்திற்கு தகுந்தவாறு வாங்கிக் கொடுக்கலாம்.

4. விளையாட்டுத் துறையில் சிறந்தவர்கள் ஆயின் அவர்களுக்கு பந்து, செஸ், பேட் என்று அவரவர் விளையாட்டை பொறுத்து அவருக்கு இஷ்டமான பரிசுகள் கொடுப்பதன் மூலமும், அவர் மனதில் நீங்கா இடம் பெறலாம். நம் கையால் அவருக்கு பிடித்த உணவு சமைப்பது அல்லது அவர் ஆச்சரியபடும் படி எங்காவது அவரை அழைத்து செல்வது என்று அவருடன் சந்தோஷமாக அந்த நாளை கழிப்பது மற்றும் பிடித்த விஷயங்களை செய்வதும் ஒரு வகையான பரிசு தான்.

5. முக்கியமான டிப்ஸ், அனைத்து பெண்களுக்கும் திருமண நாளன்று தன் கணவர் தனக்கு சேலை மற்றும் ஒரு முழம் மல்லிகைப் பூ வாங்கிக் கொடுத்து, கோவில்களுக்கு அழைத்துச் சென்றால், அதையே அவர்களுக்கு பெரிய பரிசாக நினைப்பர்.

எனவே இத்தகையவாறு நடந்து கொண்டு, அவர்களுக்குப் பிடித்த பொருட்களை, செயல்களை செய்து, சந்தோஷமான வாழ்க்கையை இருவரும் வாழ எங்கள் வாழ்த்துக்கள்.

வேறு என்னவெல்லாம் கொடுக்கலாம் என்று நீங்கள் நினைக்கிறீர்களோ, அதை எங்களுடன் பகிர்ந்து கொள்ளுங்கள்.