பேச்சுலர்களுக்கான ஈஸியான.. மஞ்சள் வெங்காய சட்னி

இன்று இரவு உங்கள் வீட்டில் இட்லி, தோசை செய்ய திட்டமிட்டுள்ளீர்களா? அதற்கு ஒரு வித்தியாசமான, அதே வேளையில் ஈஸியான சைடு டிஷ் செய்ய வேண்டுமா? அப்படியானால் மஞ்சள் வெங்காய சட்னியை செய்யுங்கள். இந்த மஞ்சள் வெங்காய சட்னியை இட்லி, தோசையுடன் மட்டுமின்றி, உங்களுக்கு விருப்பமான பிற உணவுகளுடனும் சேர்த்து சாப்பிடலாம். இந்த சட்னி செய்வதற்கு சுபலமானது என்பதால், காலை வேளையில் இதை முயற்சிக்கலாம். முக்கியமாக பேச்சுலர்கள் செய்வதற்கு ஏற்ற ஈஸியான ரெசிபி.

உங்களுக்கு மஞ்சள் வெங்காய சட்னி எப்படி செய்வதென்று தெரிந்து கொள்ள வேண்டுமா? கீழே மஞ்சள் வெங்கா சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 1 டேபிள் ஸ்பூன்

* வரமிளகாய் - 4-5

* வெங்காயம் - 2 (நறுக்கியது)

* தக்காளி - 1 (நறுக்கியது)

* உப்பு - சுவைக்கேற்ப

* மஞ்சள் தூள் - 2 டீஸ்பூன்

* புளி - 1 சிறிய துண்டு

தாளிப்பதற்கு...

* எண்ணெய் - 2 டேபிள் ஸ்பூன்

* கடுகு - 1 டீஸ்பூன்

* பெருங்காயத் தூள் - 1 சிட்டிகை

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், வரமிளகாய் சேர்த்து பொன்னிறமாக வறுத்து தனியாக எடுத்து வைத்துக் கொள்ள வேண்டும்.

* பின் அந்த எண்ணெயில் வெங்காயத்தைப் போட்டு ஒரு நிமிடம் வதக்க வேண்டும்.

* பின்பு அதில் தக்காளியைப் போட்டு நன்கு வதக்கி, சுவைக்கேற்ப உப்பு, மஞ்சள் தூள் மற்றும் புளியை சேர்த்து நன்கு மென்மையாக வதக்கி இறக்க வேண்டும்.

* அடுத்து, வதக்கியதை நன்கு குளிர வைத்து, பின் மிக்சர் ஜாரில் போட்டு தேவையான அளவு சிறிது நீரை ஊற்றி நன்கு அரைத்து ஒரு பௌலில் எடுத்துக் கொள்ள வேண்டும்.

* பின்னர் ஒரு வாணலியை அடுப்பில் வைத்து, அதில் தாளிப்பதற்கு கொடுத்துள்ள எண்ணெய் ஊற்றி சூடானதும், கடுகு, பெருங்காயத் தூள் சேர்த்து தாளித்து, சட்னியில் ஊற்றி கிளறினால், மஞ்சள் வெங்காய சட்னி தயார்.

Image Courtesy: yummytummyaarthi