லெமன் பெப்பர் சிக்கன்

விடுமுறை நாட்களில் விருப்பமான மற்றும் வித்தியாசமான சில ரெசிபிக்களை செய்து சுவைக்க பலருக்கும் ஆசை இருக்கும். இந்த வாரம் நீங்கள் அப்படி ஏதாவது செய்ய விரும்பினால் லெமன் பெப்பர் சிக்கனை செய்யலாம். சிக்கன் பலருக்கும் பிடித்த அதே சமயம் விலை குறைவான உணவுப் பொருள் என்பதால் வாரந்தோறும் சிக்கனை வாங்குவோர் ஏராளம். அதோடு சிக்கனில் ஏராளமான சத்துக்களும் உள்ளன. முக்கியமாக புரோட்டீன் உள்ளது. எனவே அடிக்கடி சிக்கனை உணவில் சேர்ப்பது மிகவும் நல்லது.

உங்களுக்கு லெமன் பெப்பர் சிக்கனை எப்படி வீட்டிலேயே செய்வதென்று தெரிந்து கொள்ள வேண்டுமா? அப்படியானால் இக்கட்டுரையைத் தொடர்ந்து படியுங்கள். ஏனெனில் கீழே லெமன் பெப்பர் சிக்கனின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் அனுபவத்தைப் பகிர்ந்து கொள்ளுங்கள்.

தேவையான பொருட்கள்:

சிக்கனுக்கு...

* எலும்பில்லாத சிக்கன் - 500 கிராம்

* உப்பு - சுவைக்கேற்ப

* மிளகு தூள் - சுவைக்கேற்ப

* முட்டை - 1

* மைதா - 1/4 கப்

* சோள மாவு - 1/4 கப்

* எண்ணெய் - பொரிப்பதற்கு

சாஸ் செய்வதற்கு...

* எலுமிச்சை சாறு - 3 டேபிள் ஸ்பூன்

* சோயா சாஸ் - 3 டேபிள் ஸ்பூன்

* பூண்டு - 2 டீஸ்பூன் (துருவியது)

* உப்பு - சுவைக்கேற்ப

* சர்க்கரை - 1 டேபிள் ஸ்பூன்

* மிளகுத் தூள் - 1 டீஸ்பூன்

* சோள மாவு - 1 டீஸ்பூன்

* தண்ணீர் - 1/2 கப்

செய்முறை:

* முதலில் சிக்கனை நீரில் கழுவிக் கொள்ள வேண்டும்.

* பின் ஒரு பௌலில் சிக்கனைப் போட்டு, அதில் மிளகுத் தூள், உப்பு, முட்டை, மைதா, சோள மாவு சேர்த்து நன்கு பிசைந்து கொள்ள வேண்டும்.

* பின்பு ஒரு வாணலியை அடுப்பில் வைத்து, பொரிப்பதற்கு தேவையான அளவு எண்ணெய் ஊற்றி சூடானதும், பிரட்டி வைத்துள்ள சிக்கனை போட்டு பொன்னிறமாக பொரித்து, தனியாக வைத்துக் கொள்ளவும்.

* பிறகு ஒரு பௌலில் சாஸ் செய்வதற்கு கொடுத்துள்ள பொருட்களான எலுமிச்சை சாறு, சோயா சாஸ், பூண்டு, உப்பு, சர்க்கரை, மிளகுத் தூள், சோள மாவு, தண்ணீர் சேர்த்து கலந்து கொள்ள வேண்டும்.

* அடுத்து ஒரு வாணலியை அடுப்பில் வைத்து, அதில் 2 டேபிள் ஸ்பூன் எண்ணெய் ஊற்றி சூடானதும், பொரித்து வைத்துள்ள சிக்கனைப் போட்டு ஒரு நிமிடம் வதக்கி, பின் பௌலில் வைத்துள்ள சாஸை சேர்த்து நன்கு கிளறி, 3-5 நிமிடம் குறைவான தீயில் கிளறி விட்டு இறக்கினால், சுவையான லெமன் பெப்பர் சிக்கன் ரெடி!

IMAGE COURTESY