For Quick Alerts
ALLOW NOTIFICATIONS  
For Daily Alerts

கத்திரிக்காய் மசாலா குழம்பு

Posted By:
|

ஒவ்வொரு நாளும் மதிய வேளையில் சாதத்திற்கு என்ன செய்வதென்று யோசித்து அலுத்துவிட்டதா? உங்களுக்காகவே தினந்தோறும் ஒரு அட்டகாசமான மற்றும் வித்தியாசமான ரெசிபிக்களை தமிழ் போல்ட்ஸ்கை வெளியிடுகிறது. இன்று நாம் பார்க்கப் போவது என்னவென்றால், கத்திரிக்காய் மசாலா குழம்பு பற்றி தான். இந்த குழம்பு சாதம் மற்றும் அப்பளத்துடன் சேர்த்து சாப்பிட அற்புதமாக இருக்கும். விருப்பமுள்ளவர்கள், இந்த குழம்புடன் நெய் சேர்த்து சாப்பிட்டால் இன்னும் சூப்பராக இருக்கும்.

சரி, வாருங்கள் இப்போது கத்திரிக்காய் மசாலா குழம்பு எப்படி செய்வதென்று பார்ப்போம். அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* சின்ன வெங்காயம் - 10-15 (பொடியாக நறுக்கவும்)

* சின்ன கத்திரிக்காய் - 5-6 (நறுக்கிக் கொள்ளவும்)

* தக்காளி - 1 (நறுக்கியது)

* மஞ்சள் தூள் - 1/2 டீஸ்பூன்

* எண்ணெய் - 2 டேபிள் ஸ்பூன்

* கறிவேப்பிலை - சிறிது

* கொத்தமல்லி - சிறிது

* மிளகாய் தூள் - 2 டீஸ்பூன்

* சோம்பு - 1/4 டீஸ்பூன்

* உப்பு - சுவைக்கேற்ப

* புளி - சிறு நெல்லிக்காய் அளவு

வதக்கி அரைப்பதற்கு...

* சீரகம் - 1 டீஸ்பூன்

* சோம்பு - 1 டீஸ்பூன்

* வெந்தயம் - சிறிது

* மல்லி விதைகள் - 1 டேபிள் ஸ்பூன்

* கிராம்பு - 3

* பட்டை - 1 இன்ச்

* துருவிய தேங்காய் - 5 டேபிள் ஸ்பூன்

செய்முறை:

* புளியை தேவையான அளவு நீரில் ஊற வைத்து பிசைந்து சாறு எடுத்து தனியாக வைத்துக் கொள்ள வேண்டும்.

* பின்னர் ஒரு வாணலியை அடுப்பில் வைத்து, அதில் ஒரு டீஸ்பூன் எண்ணெய் ஊற்றி சூடானதும், சோம்பு, சீரகம், வெந்தயம், கிராம்பு, பட்டை, மல்லி விதைகளை சேர்த்து ஒரு நிமிடம் நன்கு வதக்கி, பின் துருவிய தேங்காயை சேர்த்து ஒரு நிமிடம் கிளறி இறக்கி குளிர வைக்க வேண்டும்.

* பின் அதை மிக்சர் ஜாரில் போட்டு, தேவையான அளவு நீர் ஊற்றி, நன்கு மென்மையாக அரைத்துக் கொள்ள வேண்டும்.

* பின்பு ஒரு அகலமான வாணலியை அடுப்பில் வைத்து, அதில் எஞ்சிய எண்ணெயை ஊற்றி சூடானதும், சோம்பு, கறிவேப்பிலை சேர்த்து தாளித்து, நறுக்கிய வெங்காயம், பூண்டு சேர்த்து, சிறிது உப்பு தூவி நன்கு மென்மையாக வதக்க வேண்டும்.

* பிறகு அதில் கத்திரிக்காய் மற்றும் தக்காளியை சேர்த்து, கத்திரிக்காயின் நிறம் மாறும் வரை வதக்க வேண்டும்.

* அடுத்து அதில் மிளகாய் தூள், மஞ்சள் தூள் மற்றும் அரைத்து வைத்துள்ள தேங்காய் விழுதை சேர்த்து 2 நிமிடம் நன்கு வதக்க வேண்டும்.

* பின் அதில் புளிச்சாறு மற்றும் ஒரு கப் நீரை ஊற்றி, சுவைக்கேற்ப உப்பு சேர்த்து கிளறி, குறைவான தீயில் 10-12 நிமிடம் நன்கு பச்சை வாசனை போக கொதிக்க வைத்து இறக்கி, மேலே கொத்தமல்லியைத் தூவினால், சுவையான கத்திரிக்காய் மசாலா குழம்பு தயார்.

Image Courtesy: naliniscooking

[ of 5 - Users]
English summary

Kathirikkai Masala Kulambhu Recipe In Tamil

Want to know how to make a brinjal masala kulambhu/kathirikkai masala kulambhu at home? Take a look and give it a try...