ஒவ்வொரு வீட்டிலும் ஒரு கோடீஸ்வரர் இருக்கும் இந்தியாவின் பணக்கார கிராமம்... எந்த மாநிலத்தில் இருக்கு தெரியுமா?

'இந்தியாவின் முதுகெலும்பு கிராமங்கள்' என்று மகாத்மா காந்தி கூறியுள்ளார். இந்தியாவின் பொருளாதாரம் கிராமங்களை சார்ந்தே உள்ளது. கிராமம் என்றவுடன் நமக்கு முதலில் நினைவிற்கு வருவது பசுமையான விவசாய நிலங்கள், ஆடு, மாடுகள், வெள்ளந்தியான மனிதர்கள் மற்றும் நகரம் போல ஆடம்பர வசதிகள் இல்லாத ஒரு அடிப்படை கட்டுமானம் போன்றவைதான். ஆனால் கிராமங்கள் மீதான நமது ஒட்டுமொத்த கற்பனைகளையும் தவிடு பொடியாக்கும் ஒரு கிராமம் உள்ளது.

இது கிராமம் நவீன வசதிகளைக் கொண்டிருப்பது மட்டுமல்லாமல், பல கோடீஸ்வரர்கள் வசிக்கும் இடமாக உள்ளது. அதனால்தான் இது உலகின் பணக்கார கிராமம் என்று அழைக்கப்படுகிறது. உலகில் பல பணக்கார நாடுகள் இருந்தாலும் இந்த உலகின் பணக்கார கிராமம் இந்தியாவில் அதுவும் குஜராத் மாநிலத்தில் அமைந்துள்ளது. இந்த கிராமத்தின் பெயர் என்ன அது எப்படி உலகின் பணக்கார கிராமமாக மாறியது என்று இந்த பதிவில் தெரிந்து கொள்ளலாம்.

மாதபர் கிராமம்

இந்த கிராமத்தின் பெயர் மாதபர். இந்த கிராமத்தில் 7, 600 வீடுகள் உள்ளது மற்றும் சுமார் 92,000 மக்கள் இந்த கிராமத்தில் வசிக்கிறார்கள். இந்த கிராமத்தின் பொருளாதாரம் ஒட்டுமொத்த இந்தியாவை விட மிகவும் வலுவானது, இந்த கிராமத்தில் மொத்தம் 17 வங்கிக் கிளைகள் உள்ளன. இந்த கிராமவாசிகள் வங்கிகளில் டெபாசிட் செய்துள்ள தொகை மட்டுமே ரூ. 5,000 கோடிக்கு மேல் இருக்கும், இது இந்தியாவின் பல வளர்ந்த நகரங்களை விட அதிகமான தொகையாகும்.

எப்படி உலகின் பணக்கார கிராமமாக மாறியது?

மாதபரில் உள்ள பெரும்பாலான குடும்பங்களின் உறவினர்கள் அமெரிக்கா, இங்கிலாந்து, கனடா, ஆப்பிரிக்க நாடுகள் மற்றும் வளைகுடா போன்ற நாடுகளில் வசிக்கின்றன. இந்த கிராமவாசிகள் வெளிநாடுகளில் கடினமாக உழைத்து, நிறைய பணம் சம்பாதிக்கின்றனர். ஆனால் அவர்கள் தாங்கள் சம்பாதிக்கும் பணத்தை அவர்களுடனேயே வைத்துக் கொள்வதில்லை, அவர்கள் தங்கள் வேர்களை ஒருபோதும் மறக்கவில்லை.

இந்த வெளிநாடு வாழ் இந்தியர்கள் தங்கள் குடும்பத்தினரை நிதிரீதியாக ஆதரிப்பது மட்டுமல்லாமல், கிராமத்தின் வளர்ச்சிக்கும் தீவிரமாக பங்களிக்கின்றனர். அவர்கள் தங்கள் கிராமத்தின் கல்வி, சுகாதாரம், உள்கட்டமைப்பு மற்றும் சமூக திட்டங்களில் முதலீடு செய்கிறார்கள், கிராமத்தின் வளர்ச்சிக்கு நேரடியாக பங்களிக்கிறார்கள்.

மாதபர் கிராமத்தின் வரலாறு

மாதபர் கிராமம் 12 ஆம் நூற்றாண்டில் கட்ச்சின் மிஸ்திரி சமூகத்தினரால் நிறுவப்பட்டது, குஜராத்தில் கோவில்கள் மற்றும் வரலாற்று சின்னங்கள் உட்பட பல முக்கிய கட்டமைப்புகளை உருவாக்கிய இந்த சமூகத்தை சேர்ந்தவர்கள்தான். காலப்போக்கில், பல்வேறு சமூகங்களைச் சேர்ந்த மக்களும் இங்கு குடியேறினர், இன்று இந்த கிராமம் குஜராத்தின் கலாச்சார அடையாளத்தின் ஒரு முக்கிய பகுதியாக மாறியுள்ளது.

நகரத்தை விட சிறந்த கட்டுமானங்கள்

பள்ளிகள், கல்லூரிகள், வங்கிகள், மருத்துவமனைகள், பூங்காக்கள், உயர்தர சாலைகள் என ஒரு வளர்ந்த நகரத்தில் நாம் எதிர்பார்க்கும் அனைத்து வசதிகளையும் மாதபர் கிராமம் கொண்டுள்ளது. உண்மையில், இங்குள்ள மக்களின் வாழ்க்கைத் தரம், வாழ்க்கை முறை மற்றும் சுகாதார நிலை இந்தியாவின் பல வளர்ந்த நகரங்களை விட சிறப்பாக உள்ளன.

கடின உழைப்பு, அர்ப்பணிப்பு மற்றும் தாய்நாடு மீது பற்று இருந்தால், ஒரு சாதாரண கிராமம் கூட உலகளவில் தனக்கென ஒரு அடையாளத்தை உருவாக்கும் என்பதற்கு மாதபர் ஒரு சிறந்த உதாரணமாகும்.