உயிருக்கு ஆபத்தான கொழுப்பு கல்லீரல் நோய் ஏற்படுவதற்கு... உங்களோட இந்த பழக்கம்தான் காரணமாம்... ஜாக்கிரதை!

Fatty Liver Disease In Tamil: ஆரோக்கியமற்ற வாழ்க்கை முறையால் பல்வேறு நோய்கள் மக்களை எளிதில் பாதிக்கின்றன. அந்த வகையில், பெரும்பலான மக்களை பாதிக்கும் கொழுப்பு கல்லீரல் நோய், சில நேரங்களில் உயிருக்கு ஆபத்தையும் ஏற்படுத்தலாம். இந்த நோய் எந்த அறிகுறிகளையும் காட்டாது என்பதால், மக்கள் அதில் அதிக கவனம் செலுத்துவதில்லை.

கொழுப்பு கல்லீரல் நோய் என்பது கல்லீரலில் கூடுதல் கொழுப்பு சேமித்து வைப்பதால் ஏற்படும் ஒரு பொதுவான மருத்துவ நிலை. பெரும்பாலான மக்களுக்கு எந்த அறிகுறிகளும் இந்த நோய் ஏற்படுத்தாது. இருப்பினும், சில சந்தர்ப்பங்களில், இது கல்லீரல் சேதத்திற்கு வழிவகுக்கும். இதில் நல்ல செய்தி என்னவென்றால், வாழ்க்கை முறை மாற்றங்களுடன் கொழுப்பு கல்லீரல் நோயை நீங்கள் தடுக்கலாம்.

சிகிச்சையளிக்கப்படாத கொழுப்பு கல்லீரல் நோய் கல்லீரலில் அழற்சியை ஏற்படுத்தும். இது மருத்துவ முறைப்படி ஸ்டீடோஹெபடைடிஸ் என்று அழைக்கப்படுகிறது. அப்போதுதான் கல்லீரலில் உள்ள கொழுப்பு படிவுகள் உடலைத் தொந்தரவு செய்யத் தொடங்குகின்றன. உங்கள் உடலில் கொழுப்பு கல்லீரல் வளரும் அபாயத்தை அதிகரிக்கும் காரணிகள் பற்றி இக்கட்டுரையில் தெரிந்துகொள்ளுங்கள்.

ஸ்டீட்டோஹெபடைடிஸில் என்ன நடக்கிறது?
ஆல்கஹால் கொழுப்பு கல்லீரல் நோய், ஆல்கஹாலிக் ஸ்டீட்டோஹெபடைடிஸ் என்றும் அறியப்படுகிறது, இது அதிகளவில் மது அருந்தும்போது ஏற்படுகிறது. ஸ்டீட்டோஹெபடைடிஸ் அல்லது ஆல்கஹால் அல்லாத ஸ்டீட்டோஹெபடைடிஸ் கல்லீரலை சேதப்படுத்துகிறது. இது கல்லீரல் அழற்சி மற்றும் வடுவுக்கு வழிவகுக்கிறது.

முதுமை மற்றும் நீரிழிவு போன்ற பிற ஆபத்து காரணிகளின் கல்லீரலில் உள்ள கொழுப்பு நிலைமையை மோசமாக்கலாம். எனவே கல்லீரலில் கொழுப்பு படிவதற்கு சாதகமான பழக்கவழக்கங்கள் அல்லது காரணிகளை அடையாளம் காண்பது மிக அவசியம்.

அதிக எடை
அதிக எடையுடன் இருப்பது கல்லீரலில் கொழுப்பு படிவதற்கு முக்கிய காரணமாக கருதப்படுகிறது. உடல் நிறை குறியீட்டெண் எப்போதும் கண்காணிக்கப்பட வேண்டும். பிஎம்ஐ 25க்கு மேல் இருந்தால் கொழுப்பு கல்லீரல் உருவாகும் அபாயம் அதிகம் என சுகாதார நிபுணர்கள் எச்சரிக்கின்றனர். மேலும், இதய நோய், கொலஸ்ட்ரால் மற்றும் சர்க்கரை நோய் ஆகிய உயிருக்கு ஆபத்தான சுகாதார நிலைகள் ஏற்படுவதற்கு அதிகரித்த எடையும் ஓர் முக்கிய காரணம்.

நீரிழிவு நோய்
நீரிழிவு நோய் கொழுப்பு கல்லீரல் அபாயத்தை அதிகரிக்கிறது. டைப் 2 நீரிழிவு நோயால் பாதிக்கப்பட்ட மக்களில் குறைந்தது பாதி பேருக்கு ஆல்கஹால் அல்லாத கொழுப்பு கல்லீரல் நோய் உள்ளது என்று ஓர் ஆய்வு கூறுகிறது.

கொழுப்பு கல்லீரல் நோய் வகை 2 நீரிழிவு நோயில் கூட பங்கு வகிக்கலாம். உங்களுக்கு இந்த இரண்டு ஆபத்தான சுகாதார நிலைகளும் இருந்தால், உங்கள் சர்க்கரை அளவு சரியாக நிர்வகிக்கப்பட வேண்டும். இல்லையெனில், அது கொழுப்பு கல்லீரல் நோயை மோசமாக்கும், உயிருக்கு ஆபத்தை ஏற்படுத்தும்.

உயர் ட்ரைகிளிசரைடுகள் அளவு
உயர் ட்ரைகிளிசரைடுகளின் அளவு ஆல்கஹால் அல்லாத கொழுப்பு கல்லீரல் நோயுடன் தொடர்புடையது. சில சுகாதார அறிக்கைகள் அதிக ட்ரைகிளிசரைடு உங்களுக்கு ஏற்கனவே கொழுப்பு கல்லீரல் நோய் இருப்பதைக் குறிக்கலாம் என்று கூறுகின்றன. அந்த வகையில், ட்ரைகிளிசரைடு அளவு 150 mg/dL க்கும் அதிகமாக இருப்பது உயர்வாகக் கருதப்படுகிறது.

தவறான உணவுப் பழக்கம்
கல்லீரலில் கொழுப்பு படிவதற்கான மற்றொரு காரணம் ஆரோக்கியமற்ற உணவுபழக்கம். தாமதமாகச் சாப்பிடுவது, உணவைத் தவிர்ப்பது, இரண்டு வேளை உணவுகளுக்கு இடையே சரியான இடைவெளி இல்லாதது ஆகியவை கல்லீரலில் பெரும் அழுத்தத்தை ஏற்படுத்தி, கொழுப்பு கல்லீரல் அபாயத்தை அதிகரிக்கும். ஆதலால், எப்போதும் ஆரோக்கியமான மற்றும் சத்தான உணவுகளை தேர்வு செய்ய வேண்டும்.

தூக்கத்தில் மூச்சுத்திணறல்
வியக்கத்தக்க வகையில், நீங்கள் தூங்கிக்கொண்டிருக்கும்போது மூச்சுத்திணறல் ஏற்படுவது, கொழுப்பு கல்லீரல் அபாயத்தை அதிகரிக்கலாம். ஒரு ஆய்வின்படி, தூக்கத்தில் மூச்சுத்திணறல் ஏற்படுவது இன்சுலின் எதிர்ப்பு, டிஸ்லிபிடெமியா மற்றும் அழற்சியை அதிகரிப்பதன் மூலம் ஆல்கஹால் அல்லாத கொழுப்பு கல்லீரல் நோயைத் தூண்டும்.

அவற்றை எப்படி மாற்றுவது?
கொழுப்பு கல்லீரல் நிலை மேம்பட்ட நிலைக்கு முன்னேறாமல் இருக்க இந்த காரணிகளை மாற்றியமைப்பது மிகவும் முக்கியம். எடை மற்றும் உணவு முறையை சரியாக நிர்வகிக்க வேண்டும். ஆரோக்கியமான மற்றும் சத்தான உணவுகளை உணவில் சேர்ப்பதன் மூலம் உங்கள் வாழ்க்கை முறையை சரிபார்க்க வேண்டும்.

பதப்படுத்தப்பட்ட மற்றும் எண்ணெயில் பொரித்த உணவுகளை சாப்பிடுவதை தவிர்க்க வேண்டும். நல்ல எண்ணெய், முழு தானியங்கள் மற்றும் பருவகால காய்கறிகள் கொண்ட ஆரோக்கியமான வீட்டில் சமைத்த உணவுகளை உட்கொள்ள வேண்டும்.

நீரிழிவு மற்றும் கொலஸ்ட்ரால் அளவு போன்ற பிற ஆபத்து காரணிகளுக்கு, மருத்துவ உதவியை எடுத்துக் கொள்ளுங்கள். தேவைப்பட்டால் மருத்துவரை அணுகி மருந்துகளை எடுத்துக் கொள்ளுங்கள். பொதுவாக கொழுப்பு கல்லீரல் நோய் எந்த அறிகுறிகளையும் வெளிப்படையாக காட்டாது. அதனால், இது உடலில் விரைவாக வளர்ந்துவிடும். இந்த நிலை ஏற்படாமல் இருக்க, வாழ்க்கை முறை மாற்றங்களை சரியாக பின்பற்றுங்கள்.

Disclaimer: இந்தக் கட்டுரையில் வழங்கப்பட்ட தகவல்கள் பொதுவான தகவல் மற்றும் கல்வி நோக்கங்களுக்காக மட்டுமே, மேலும் இது தொழில்முறை மருத்துவ ஆலோசனை, நோயறிதல் அல்லது சிகிச்சைக்கு மாற்றா பகிரப்படவில்லை. மருத்துவ நிலை குறித்து உங்களுக்கு ஏதேனும் கேள்விகள் இருந்தால் உங்கள் மருத்துவர் அல்லது தகுதிவாய்ந்த சுகாதார வழங்குநரின் ஆலோசனையைப் பெறவும்.