2023-ல் ஃபிட்டா இருக்கணுமா? அப்ப இத தினமும் ஃபாலோ பண்ணுங்க போதும்...

நோயெதிர்ப்பு சக்தியை அதிகரிக்கவும்

கோவிட் வைரஸ் இன்னும் பரவிக் கொண்டிருக்கும் நிலையில், முதலில் நோயெதிர்ப்பு சக்தியை மேம்படுத்திக் கொள்ள முயற்சிக்க வேண்டும். அதற்கு பழங்கள், காய்கறிகள், நட்ஸ், தானியங்கள் மற்றும் பருப்பு வகைகள் போன்றவற்றை உணவில் அதிகம் சேர்க்க வேண்டும். குறிப்பாக காளான்கள், நட்ஸ், பூசணி விதைகள், எள்ளு விதைகள் மற்றும் பீன்ஸ் ஆகியவற்றில் ஜிங்க் அதிகம் உள்ளது. இவை ஆரோக்கியத்திற்கு மிகவும் இன்றியமையாத மற்றும் அதிக நன்மை பயக்கும் உணவுகளாகும்.

போதுமான வைட்டமின் டி பெற முயற்சிக்கவும்

வைட்டமின் டி சத்தானது எலும்புகளின் ஆரோக்கியம் மற்றும் நோயெதிர்ப்பு மண்டலத்தை ஆதரிப்பது மட்டுமின்றி, நாள்பட்ட ஆரோக்கிய பிரச்சனைகளை தடுக்க உதவும். மேலும் முடியின் வளர்ச்சியைத் தூண்டவும் உதவுகிறது. எனவே தினமும் குறைந்தது 15 நிமிடம் அதிகாலை சூரிய ஒளியில் சிறிது நேரம் உடற்பயிற்சியை செய்யுங்கள். மேலும் வைட்டமின் டி நிறைந்த உணவுகளையும் தினமும் உணவில் சேர்த்து வாருங்கள். இது இதய நோய், சர்க்கரை நோய் மற்றும் சில வகையான புற்றுநோய்களைத் தடுக்க உதவுகிறது.

நல்ல தூக்கத்தை மேற்கொள்ளவும்

தற்போது அதிக வேலைப்பளுவின் காரணமாக பலரால் போதுமான தூக்கத்தைப் பெற முடிவதில்லை. இதனால் அதிகமான தூக்கமின்மை பிரச்சனையை சந்திப்பதோடு, அதிகளவிலான காப்ஃபைன் பானங்களை உட்கொள்ள நேரிடுகிறது. ஒருவருக்கு போதுமான தூக்கம் கிடைக்காமல் போனால், உடல் எப்போதும் சோர்வுடன் இருப்பதோடு, மனநிலை மந்தமாக இருக்கும். எதிலும் கவனம் செலுத்த முடியாமல், தினசரி செயல்பாடுகளை கூட செய்வதில் சிரமத்தை சந்திக்க நேரிடும். குறிப்பாக உடலுக்கு போதுமான ஓய்வு கிடைக்காவிட்டால், நோயெதிர்ப்பு சக்தியானது பலவீனமாகி, பல கடுமையான உடல்நல பிரச்சனைகளுக்கு வழிவகுக்கும். எனவே இந்த 2023-ல் தினமும் குறைந்தது 7-8 மணிநேர தூக்கத்தைப் பெற முயற்சி செய்யுங்கள்.

மன அழுத்தத்தைக் குறைக்க முயற்சிக்கவும்

மன அழுத்தமானது உடல் பருமன், இதய நோய், சர்க்கரை நோய் மற்றும் செரிமான பிரச்சனைகள் உட்பட அனைத்து ஆரோக்கிய பிரச்சனைகளுக்கும் முக்கிய காரணமாகும். எனவே இந்த புத்தாண்டில் நீங்கள் ஆரோக்கியமாக இருக்க நினைத்தால், மன அழுத்தத்தைக் குறைக்க முயற்சி செய்யுங்கள். அதற்கு யோகா, தியானம், மூச்சுப்பயிற்சி மற்றும் விருப்பமான பொழுதுபோக்குகள் போன்றவற்றில் ஈடுபட்டு போக்கலாம்.

அவசியம் உடற்பயிற்சி செய்யுவும்

உடற்பயிற்சி செய்வது உடல் ஆரோக்கியத்தை மேம்படுத்துவதோடு மட்டுமின்றி, ஒருவரை நாள் முழுவதும் உற்சாகமாகவும், சுறுசுறுப்பாகவும் வைத்துக் கொள்ள உதவுகிறது. எனவே தினமும் உடற்பயிற்சி செய்வதை வழக்கமாக கொள்ளுங்கள். ஒருவேளை உங்களால் தினமும் உடற்பயிற்சி செய்ய முடியாவிட்டால், வாரத்தில் 3-4 நாட்கள் 45 நிமிட உடற்பயிற்சியில் ஈடுபட முயலுங்கள். உடற்பயிற்சி செய்வதன் மூலம் ஒட்டுமொத்த உடலிலும் இரத்த ஓட்டம் சீராக இருக்கும் மற்றும் உடலும் ஆரோக்கியமாக ஃபிட்டாக இருக்கும்.