வீட்டிலேயே மாம்பழ ஐஸ்க்ரீம்மை ஈஸியாக செய்வது எப்படி-ன்னு பாத்து ஒருடைம் ட்ரை பண்ணுங்க..

Summer Special Mango Ice Cream Recipe In Tamil: கோடைக்காலம் வந்தாலே மாம்பழ சீசனும் தொடங்கிவிடும். இப்படி மாம்பழ சீசனில் மாம்பழங்களை வெறுமனே சாப்பிடாமல், அதைக் கொண்டு என்னென்ன ரெசிபிக்களை செய்ய முடியுமோ, அதை செய்து சுவைத்து பார்த்துவிட வேண்டும். உங்கள் வீட்டில் உள்ளோர் அனைவருமே மாம்பழ பிரியர்களா? அப்படியானால் கொளுத்தும் கோடையில் மாம்பழங்களைக் கொண்டு மில்க்ஷேக், ஸ்மூத்தி, புட்டிங், ஐஸ்க்ரீம் என்று பலவிதமான ரெசிபிக்களை தவறாமல் செய்து சுவைத்துவிடுங்கள்.

இன்று நாம் பார்க்கப் போவது மாம்பழ ஐஸ்க்ரீம் குறித்து தான். இந்த மாம்பழ ஐஸ்க்ரீம்மை செய்வது மிகவும் சுலபம். இதற்கு 4 பொருட்கள் இருந்தாலே போதும், அட்டகாசமான சுவையில் செய்துவிடலாம். குறிப்பாக வீட்டிலேயே ஐஸ்க்ரீம் செய்யும் போது எவ்வளவு வேண்டுமானாலும் சாப்பிடலாம். இந்த மாம்பழ ஐஸ்க்ரீம் குறித்து ஹேமா சுப்ரமணியன் அவர்கள் தனது ஹோம்குக்கிங் தமிழ் என்னும் யூடியூப் தளத்தில் பகிர்ந்துள்ளார்.

உங்களுக்கு வீட்டிலேயே மாம்பழ ஐஸ்க்ரீம்மை எப்படி செய்வதென்று தெரிந்து கொள்ள வேண்டுமா? கீழே மாம்பழ ஐஸ்க்ரீம் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

கண்டென்ஸ்டு மில்க் செய்வதற்கு...

* பால் - 500 மிலி
* குங்குமப்பூ - 1 டீஸ்பூன்
* சர்க்கரை - 1 கப்

ஐஸ்க்ரீம் செய்வதற்கு...

* அல்போன்சா மாம்பழம் - 5
* ஸ்வீட் விப்பிங் க்ரீம் - 400 மிலி

செய்முறை:

* முதலில் ஒரு பாத்திரத்தில் 500 மிலி பாலை ஊற்றி அடுப்பில் வைத்து, அதில் 1 டீஸ்பூன் குங்குமப்பூவை கைகளால் நசுக்கி சேர்க்க வேண்டும்.
* அதன் பின் அதில் 1 கப் சர்க்கரையை சேர்த்து நன்கு கிளறி, மிதமான தீயில் வைத்து, பால் கெட்டியாகும் வரை 15 நிமிடம் கொதிக்க வைக்க வேண்டும்.
* பால் ஓரளவு கெட்டியானதும், அதை இறக்கி குளிர வைத்தால், கண்டென்ஸ்டு மில்க் தயார்.
* பின்பு மிக்சர் ஜாரில் 5 மாம்பழங்களின் தோலை நீக்கிவிட்டு துண்டுகளாக்கி எடுத்துக் கொண்டு, அத்துடன் தயாரித்து வைத்துள்ள கண்டென்ஸ்டு மில்க்கை சேர்த்து நன்கு அரைத்துக் கொள்ள வேண்டும்.
* பின்னர் ஒரு அகலமான பாத்திரத்தில் குளிர்ச்சியான ஸ்வீட் விப்பிங் க்ரீம்மை எடுத்துக் கொண்டு, எலக்ட்ரிக் பீட்டர் கொண்டு நன்கு நுரைக்கும் வரை அடித்துக் கொள்ள வேண்டும்.
* அதன் பின் அதில் அரைத்து வைத்துள்ள மாம்பழத்தை சேர்த்து பீட்டர் கொண்டு நன்கு கலந்து கொள்ள வேண்டும்.
* பிறகு விருப்பமான பாத்திரத்தில் தயாரித்து வைத்துள்ள ஐஸ்க்ரீம்மை சேர்த்து, க்ளிங் வ்ராப் (Cling Wrap) கவர் கொண்டு மூடி, ஃப்ரீசரில் 12 மணிநேரம் வைத்து எடுத்தால், சுவையான மாம்பழ ஐஸ்க்ரீம் தயார்.