முட்டை மற்றும் பூண்டு ஃப்ரைடு ரைஸ்

காலையில் எழுந்து ஈஸியாக சமைக்கும் வகையில் என்ன உள்ளது என்று யோசிக்கிறீர்களா? அப்படியானால், வீட்டில் முட்டை மற்றும் பூண்டு இருந்தால், அவற்றைக் கொண்டு ஈஸியான ஒரு ஃப்ரைடு ரைஸ் செய்து பாருங்கள். குறிப்பாக பேச்சுலர்களுக்கு இது ஒரு அருமையான ரெசிபி.

சரி, இங்கு அந்த முட்டை மற்றும் பூண்டு ஃப்ரைடு ரைஸின் செய்முறை கொடுக்கப்பட்டுள்ளது. அதைப் படித்து முயற்சி செய்து பாருங்கள்.

தேவையான பொருட்கள்:

சாதம் - 1 பௌல்
முட்டை - 1 (ஒரு பௌலில் நன்கு அடித்து வைத்துக் கொள்ளவும்)
இஞ்சி விழுது - 1 டீஸ்பூன்
பூண்டு - 2 (தட்டியது)
பச்சை மிளகாய் - 1 (பொடியாக நறுக்கியது)
உப்பு - தேவையான அளவு
மிளகுத் தூள் - தேவையான அளவு
சோயா சாஸ் - 1 டீஸ்பூன்
எண்ணெய் - 2 டீஸ்பூன்
கொத்தமல்லி - 1 டீஸ்பூன் (நறுக்கியது)

செய்முறை:

முதலில் ஒரு வாணலியை அடுப்பில் வைத்து, அதில் எண்ணெய் ஊற்றி காய்ந்ததும், அடித்து வைத்துள்ள முட்டையை ஊற்றி நன்கு கிளறி விட வேண்டும்.

பின்னர் அதில் இஞ்சி, பூண்டு, பச்சை மிளகாய் சேர்த்து பச்சை வாசனை போக பிரட்ட வேண்டும்.

பின்பு சாதத்தை சேர்த்து கிளறி, உப்பு, மிளகுத் தூள் மற்றும் சோயா சாஸ் சேர்த்து நன்கு கிளறி, மேலே கொத்தமல்லியை தூவி இறக்கினால், சுவையான முட்டை மற்றும் பூண்டு ஃப்ரைடு ரைஸ் ரெடி!!!!