ஹோட்டல் ஸ்டைல் முந்திரி வெஜ் குருமா ரெசிபி - இந்த மாதிரி குருமா வைச்சு பாருங்க - அருமையா இருக்கும்

Cashew Vegetable Kurma Recipe in Tamil: உங்கள் வீட்டில் அடிக்கடி சப்பாத்தி அல்லது பூரி செய்வீர்களா? அதற்கு என்ன சைடிஷ் செய்வதென்று யோசிக்கிறீர்களா? வழக்கமான உருளைக்கிழங்கு குருமா இல்லாமல் புதிதாக ஏதாவது சைடிஷ் செய்ய விரும்புகிறீர்களா? உங்கள் வீட்டில் உள்ளவர்கள் காய்கறிகளை சாப்பிடமாட்டார்களா? அவர்களை காய்கறிகளை சாப்பிட வைக்க வேண்டுமா?

அப்படியானால் காய்கறிகளையும், முந்திரியையும் வைத்து ஒரு அட்டகாசமான குருமாவை செய்யுங்கள். இந்த முந்திரி காய்கறி குருமா சப்பாத்தி, பூரிக்கு மட்டுமின்றி, இடியாப்பம் மற்றும் தோசையுடன் சாப்பிடவும் அட்டகாசமாக இருக்கும். இந்த குருமா தாபா மற்றும் ரெஸ்டாரண்ட்களில் கிடைக்கும் சுவையில் அருமையாக இருக்கும். முக்கியமாக இது செய்வதற்கு மிகவும் சுலபமாக இருக்கும்.

உங்களுக்கு சுவையான முந்திரி காய்கறி குருமாவை எப்படி செய்வதென்று தெரிந்து கொள்ள வேண்டுமா? கீழே முந்திரி காய்கறி குருமா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

வேகவைக்க வேண்டிய காய்கறிகள்:

- 1 பீட்ரூட் (தோல் நீக்கி நறுக்கியது)
-1 கேரட் (தோல் நீக்கி நறுக்கியது)
- 1 கப் காலிஃபிளவர் (நறுக்கியது)
- 1 உருளைக்கிழங்கு (தோல் நீக்கி நறுக்கியது)
- 1 கப் தண்ணீர்
- 1 ஸ்பூன் உப்பு

மசாலா அரைக்க:

- 50 கிராம் முந்திரி
- 1 பெரிய வெங்காயம் (தோல் உரித்து நறுக்கியது)
- 2 தக்காளி (நறுக்கியது)
- 1 கப் தண்ணீர்

குருமா வைக்க:

- 2 ஸ்பூன் நெய்
- 1 ஸ்பூன் சீரகம்
- 1 ஸ்பூன் காஷ்மீரி மிளகாய் தூள்
- 1 ஸ்பூன் மஞ்சள் தூள்
- 1 ஸ்பூன் கரம் மசாலா தூள்
- 100 கிராம் பனீர் (நறுக்கியது)
- தேவையான அளவு உப்பு
- 1 ஸ்பூன் கசூரி மேத்தி
- 4 ஸ்பூன் கொத்தமல்லி

செய்முறை:

- அனைத்து காய்கறிகளையும் ஒரு பிரஷர் குக்கரில் போட்டு, அதனுடன் உப்பு மற்றும் தண்ணீர் சேர்க்கவும்.

- குக்கரை மூடி, 2 விசில் வரும் வரை வேகவைக்கவும். அடுப்பை அணைத்துவிட்டு, அதிலுள்ள அழுத்தம் தானாகவே வெளியேறும் வரை காத்திருக்கவும். பின்னர் குக்கரை திறந்து தண்ணீரை வடித்து காய்கறிகளைத் தனியாக எடுத்து வைக்கவும்.

- மசாலாவைத் தயாரிக்க ஒரு பாத்திரத்தில் முந்திரி, வெங்காயம் மற்றும் தக்காளி ஆகியவற்றை எடுத்து, அவை மூழ்கும் அளவுக்குத் தண்ணீர் ஊற்றி 10 நிமிடங்கள் வேகவைக்கவும்.

- பின்னர் அடுப்பை அணைத்துவிட்டு, கலவை ஆறும் வரை காத்திருக்கவும். ஆறியதும் அதை ஒரு மிக்ஸி ஜாரில் போட்டு, மென்மையான விழுதாக அரைத்துத் தனியாக எடுத்து வைக்கவும்.

- பின்னர் ஒரு வாணலியில் நெய்யைச் சூடாக்கி, சீரகத்தைச் சேர்த்துப் பொரியவிடவும்.

- சீரகம் பொரிந்ததும் அரைத்து வைத்துள்ள மசாலாவைச் சேர்த்து, அது கெட்டியாகி அதிலிருந்து எண்ணெய் பிரியும் வரை வதக்கவும்.

- பின்னர் உப்பு, மஞ்சள் தூள், கரம் மசாலா மற்றும் மிளகாய் தூள் ஆகியவற்றைச் சேர்த்து நன்றாகக் கலக்கவும்.

- மசாலா பச்சை வாசனை நீங்கியதும் நறுக்கிய பனீர் மற்றும் வேகவைத்த காய்கறிகளை, அவை வெந்த நீரோடு சேர்த்து நன்றாகக் கலக்கவும்.

- உப்பு, காரம் சரிபார்த்து 5 நிமிடங்கள் மிதமான தீயில் கொதிக்கவிடவும்.

- இறுதியாக நறுக்கிய கொத்தமல்லி மற்றும் கசூரி மேத்தி சேர்த்து நன்றாக கிளறி அடுப்பை அணைக்கவும்.

- அவ்வளவுதான் சுவையான முந்திரி காய்கறி குருமா ரெடி. இதை சூடான சப்பாத்தி, பூரியுடன் பரிமாறவும்.