ஆந்திரா பூண்டு மிளகு கார குழம்பு ரெசிபி - ட்ரை பண்ணி பாருங்க - சுவையா, ஆரோக்கியமா இருக்கும்

Andhra Poondu Milagu Kulambu Recipe in Tamil: பெரும்பாலான வீடுகளில் சாம்பார் அல்லது புளிகுழம்புதான் தினமும் மதியம் பிரதான குழம்பாக இருக்கும். ஒரே மாதிரியான புளிக்குழம்பு, சாம்பார் செய்வது சாப்பிடுபவர்களுக்கு மட்டுமின்றி சமைப்பவர்களுக்கும் நாளடைவில் போரடித்து விடும். அப்படியானால் புதிதாக ஆந்திரா ரெசிபிக்களை முயற்சி செய்யுங்கள். குறிப்பாக ஆந்திரா ஸ்டைல் பூண்டு மிளகு குழம்பை முயற்சி செய்து பாருங்கள். ஏனெனில் பூண்டு என்பது அனைத்து சமையலறைகளிலும் இருக்கும் ஒரு அத்தியாவசிய பொருளாகும்.

இந்த பூண்டு மிளகு குழம்பு சுவையானது மட்டுமல்ல மிகவும் ஆரோக்கியமானதும் கூட. ஏனென்றால் இதில் சேர்க்கப்படும் பூண்டு, மிளகு இரண்டுமே ஆரோக்கியத்தில் பல அதிசயங்களை செய்யக்கூடிய பொருட்களாகும். இந்த பூண்டு மிளகு குழம்பை ஒரு தடவை வைத்து விட்டால் போதும் 1 வாரம் வரை வைத்து சாப்பிடலாம். இதை சாதத்தில் ஊற்றி பிசைந்து சாப்பிட அவ்வளவு அருமையாக இருக்கும். இது வழக்கமான பூண்டு-மிளகு குழம்பு போல இருக்காது.

உங்களுக்கு ஆந்திரா ஸ்டைல் பூண்டு மிளகு கார குழம்பை எப்படி செய்வதென்று தெரிந்து கொள்ள வேண்டுமா? கீழே ஆந்திரா பூண்டு மிளகு குழம்பு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- 1/2 கப் உரித்த பூண்டு
- 1⁄2 கப் சின்ன வெங்காயம்
- 1 தக்காளி
- 1⁄4 டீஸ்பூன் மஞ்சள் தூள்
- 4 டேபிள் ஸ்பூன் புளி கரைசல்
- தேவையான அளவு உப்பு
- 1⁄4 டேபிள் ஸ்பூன் வெல்லம்
- 1⁄2 கப் தேங்காய்ப்பால்
- 2 டேபிள் ஸ்பூன் நல்லெண்ணெய்
- 1⁄2 டேபிள் ஸ்பூன் கடுகு
- 1⁄4 டீஸ்பூன் வெந்தயம்
- 1⁄4 டேபிள் ஸ்பூன் பெருங்காயத் தூள்

மசாலா விழுது அரைக்க:

- 2 ஸ்பூன் மல்லி
- 4 வர மிளகாய்
- 1 ஸ்பூன் கடலைப்பருப்பு
- 1⁄2 ஸ்பூன் உளுத்தம் பருப்பு
- 1 ஸ்பூன் மிளகு
- 1 ஸ்பூன் சீரகம்
- 1 கொத்து கறிவேப்பிலை

செய்முறை:

- முதலில் ஒரு வாணலியில் எண்ணெய் ஊற்றிச் சூடாக்கவும். பின்னர் அதில் மல்லி விதைகள், வர மிளகாய் மற்றும் கறிவேப்பிலை ஆகியவற்றைச் சேர்க்கவும்.

- மிதமான தீயில் பொன்னிறமாகும் வரை வறுத்து, பின்னர் ஒரு தட்டில் எடுத்து வைக்கவும்.

- அதே வாணலியில் சிறிது எண்ணெய் சேர்த்து, கடலைப்பருப்பு மற்றும் உளுத்தம் பருப்பைச் சேர்க்கவும். அவை லேசான பொன்னிறமாகும் வரை வறுக்கவும்.

- பருப்பு லேசான பொன்னிறமாக மாறியதும், மிளகைச் சேர்த்து வறுக்கவும்.

- இறுதியாகச் சீரகத்தைச் சேர்த்து, அனைத்துப் பொருட்களும் பொன்னிறமாகும் வரை வறுக்கவும்.

- வறுத்த பொருட்கள் அனைத்தையும் ஆறவைத்து, மென்மையான விழுதாக அரைத்து தனியாக எடுத்து வைக்கவும்.

- ஒரு கடாயில் எண்ணெயை சேர்த்துச் சூடாக்கவும். கடுகு சேர்த்து அது வெடிக்க ஆரம்பித்ததும், வெந்தயம் மற்றும் பெருங்காயத் தூள் ஆகியவற்றைச் சேர்க்கவும்.

- பின்னர் தோல் உரித்த பூண்டு மற்றும் சின்ன வெங்காயத்தை வாணலியில் சேர்த்து, மிதமான தீயில் சில நிமிடங்கள் வதக்கவும். வதக்கும்போது 1 ஸ்பூன் உப்பு சேர்க்கவும்.

- பின்னர் நறுக்கிய தக்காளி மற்றும் மஞ்சள் தூள் சேர்க்கவும். தக்காளி நன்றாக வேகும் வரை வதக்கவும்.

- தக்காளி நன்றாக வெந்ததும், அரைத்த மசாலா விழுதைச் சேர்த்து நன்றாகக் கலக்கவும். தீயைக் குறைத்து வைத்துவிட்டு, சில நிமிடங்கள் வதக்கவும்.

- இப்போது தண்ணீர் சேர்த்து, எண்ணெய் பிரிந்து வரும் வரை சில நிமிடங்கள் சமைக்கவும்.

- பின்னர் புளிக்கரைசல், உப்பு மற்றும் சிறிதளவு வெல்லம் ஆகியவற்றைச் சேர்க்கவும்.

- குழம்பு மிகவும் கெட்டியாக இருந்தால், தேவையான பதத்திற்கு வர சிறிது தண்ணீர் மற்றும் தேங்காய்ப்பால் சேர்க்கவும்.

- புளியின் பச்சை வாசனை நீங்கி, எண்ணெய் மேலே பிரிந்து வரும் வரை மிதமான தீயில் 5 நிமிடங்கள் கொதிக்கவிடவும்.

- இறுதியாகக் கறிவேப்பிலையைச் சேர்த்து, பின்னர் அடுப்பை அணைத்துவிடவும்.

- அவ்வளவுதான் சுவையான ஆந்திரா பூண்டு மிளகு குழம்பு ரெடி!