ஒரு விஷப்பாம்பு இன்னொரு விஷப்பாம்பை கடித்தால் என்ன நடக்கும் தெரியுமா? ஷாக் ஆகாதீங்க

பாம்புகள் பூமியின் மிகவும் ஆபத்தான உயிரினங்களில் ஒன்றாகும். 'பாம்பென்றால் படையும் நடுங்கும்' என்று கூறுவார்கள், ஏனெனில் எவ்வளவு பெரிய வீரனையும் பாம்பின் விஷயம் வீழ்த்திவிடும். பாம்பு கடித்தால் மனிதர்கள் எளிதில் உயிரிழக்கக்கூடும். ஆனால், ஒரு விஷமுள்ள பாம்பு மற்றொரு விஷப்பாம்பைக் கடித்தால் என்ன நடக்கும் என்று எப்போதாவது சிந்தித்து உள்ளீர்களா? ஒரே இனத்தைச் சேர்ந்த இரண்டு விஷப் பாம்புகள் ஒன்றையொன்று கடித்துக்கொண்டால், அவற்றின் விஷம் இரண்டு பாம்புகளின் உயிரையும் பறிக்குமா? அதேசமயம் ஒரு பாம்பு தன்னைத்தானே கடித்துக்கொண்டால் அது இறந்துவிடுமா? இந்த சுவாரஸ்யமான கேள்விகளுக்கான பதிலை இந்த பதிவில் தெரிந்து கொள்ளலாம்.

ஒரு விஷப்பாம்பு இன்னொரு விஷப்பாம்பை கடித்தால் என்ன நடக்கும்?

பொதுவாக பாம்புகள் தங்கள் இரையைக் கொல்லவோ அல்லது தங்களை எதிரிகளிடமிருந்து தற்காத்துக்கொள்ளவோ ​​விஷத்தைப் பயன்படுத்துகின்றன. ஒரு பாம்பு மற்றொரு பாம்பைக் கடிக்கும்போது, ​​அந்த விஷம் ஏற்படுத்தும் தாக்கம் சில காரணிகளைப் பொறுத்து மாறுபடுகிறது. குறிப்பாக, கடித்த பாம்பு எந்த இனத்தைச் சேர்ந்தது, கடிக்கப்பட்ட பாம்பு எந்த இனத்தைச் சேர்ந்தது மற்றும் எவ்வளவு அளவு விஷம் செலுத்தப்பட்டது ஆகியவையே அவற்றின் பாதிப்பை நிர்ணயிக்கும். ஒரே இனத்தைச் சேர்ந்த இரண்டு பாம்புகளுக்கு இடையே சண்டை ஏற்படும்போது, ​​விஷத்தின் தாக்கம் குறைவாக இருக்கலாம். ஆனால், விஷம் முற்றிலும் பாதிப்பை ஏற்படுத்தாது என்று கூறமுடியாது. கடியினால் ஏற்படும் காயமே கடுமையான பாதிப்பை உண்டாக்கும். அதோடு, விஷமும் அதன் தாக்கத்தை வெளிப்படுத்தவே செய்யும்.

ஒரே இனப் பாம்புகளுக்கு எதிராக விஷம் வேலை செய்யுமா?

சில பாம்புகள் தங்கள் இனத்தின் விஷத்திற்கு எதிராக ஒரு இயற்கையான பாதுகாப்பு அமைப்பைக் கொண்டிருக்கும். ஆராய்ச்சியாளர்கள் இதை விஷ எதிர்ப்புத்திறன் என்று அழைக்கிறார்கள். அவற்றின் உடலுக்குள் இருக்கும் குறிப்பிட்ட புரதங்கள், அபாயகரமான விஷம் செல்களைத் தாக்குவதைத் தடுக்கின்றன. உதாரணமாக, நாகப்பாம்புகளால் தங்கள் இனத்தின் நரம்புகளைச் சேதப்படுத்தும் விஷத்தை எளிதில் எதிர்க்க முடியும். ஆனால் இந்த பாதுகாப்பு அமைப்பு எல்லா பாம்புகளுக்கும் ஒரே மாதிரியாகச் செயல்படாது. எனவே, ஒரு நாகப்பாம்பு மற்றொரு நாகப்பாம்பைக் கடிக்கும்போது அதற்கு எந்த பாதிப்பும் ஏற்படாது என்று கருதுவது முற்றிலும் தவறானது.

வேறு இனப் பாம்பு கடித்தால் அது உயிருக்கு ஆபத்தானதா?

வேறு இனப் பாம்பு கடித்தால் ஒரு பாம்புக்கு நிச்சயம் ஆபத்தை ஏற்படுத்தும். விஷத்தின் தன்மைகள் இனத்திற்கு இனம் மாறுபடுவதால், அந்த விஷம் கடுமையான பாதிப்பை ஏற்படுத்துகிறது. சில விஷங்கள் நரம்பு மண்டலத்தைத் தாக்கும், அதேசமயம் சில விஷம் உடனடியாக இரத்தத்தை உறைய வைக்கும். ஒரு பாம்பு தனது சொந்த விஷத்தை எதிர்க்கக்கூடும், ஆனால் அது பொதுவாக வேறு இனத்தின் விஷத்தைத் தடுக்க முடியாது. உதாரணமாக, அதிக விஷம் கொண்ட ராஜநாகம் வேறு இன பாம்பைக் கடித்தால், அந்த பாம்பு நிச்சயம் இறந்துவிடும். எப்போதும் விஷத்தின் அளவு மற்றும் பாதிக்கப்பட்ட பாம்பின் நோய் எதிர்ப்பு சக்தியைப் பொறுத்தே அமையும்.

பாம்பு தன்னைத்தானே கடித்துக்கொண்டால் என்னவாகும்?

பாம்புகள் பெரும்பாலும் தங்களைத் தாங்களே கடித்துக்கொள்ளாது. ஒரு பாம்பு தற்செயலாகத் தன்னைத்தானே கடித்துக்கொண்டாலும், அதன் விஷத்தாலேயே அது உடனடியாக இறந்துவிடுவதில்லை. சில பாம்புகள் தங்கள் சொந்த விஷத்தைத் தாங்கும் இயற்கையான ஆற்றலைக் கொண்டுள்ளன. இருப்பினும், ஒரு பாம்பு தனது சொந்த விஷத்திற்கு முற்றிலும் எதிர்ப்புத்திறன் கொண்டது என்று கூற முடியாது. இதன் விளைவு, பாம்பு உடலின் எந்தப் பகுதியில் கடித்தது மற்றும் எவ்வளவு விஷம் செலுத்தப்பட்டது என்பதைப் பொறுத்தே அமையும். மேலும், கடியினால் ஏற்படும் காயமும் ஆபத்தை விளைவிக்கும். எனவே, பாம்பு தன்னைத்தானே கடித்துக்கொண்டால் அதற்கு எந்தப் பாதிப்பும் ஏற்படாது என்று கூற முடியாது.