காதல் பூக்கும் இடம் மூளைதானாம்! உங்களுக்குத் தெரியுமா?

ரொமான்ஸ் உணர்வுகள்

நம்முடைய ரொமான்ஸ் உணர்வுகளை நிர்ணயிப்பது நமது மூளையில் உள்ள ஒரு குறிப்பிட்ட பகுதியாம். அயர்லாந்து விஞ்ஞானிகள் இதை ஆய்வின் மூலம் கண்டறிந்து சொல்லியுள்ளனர்.

அதாவது மீடியல் ப்ரீபிரன்டல் கார்டெக்ஸ் என்ற மூளையின் ஒரு பகுதிதான் ரொமான்டிக்கான விஷயங்களை நிர்ணயிக்கும், தீர்மானிக்கும் பகுதியாக இருக்கிறதாம். இது மூளையின் முன் பகுதியில் உள்ளது.

மின்னல் வேகத்தில் முடிவுகளை எடுக்கும் திறமை இந்த ஏரியாவுக்கு இருக்கிறதாம். இதுதான் ஒருவரை நமக்குப் பிடித்திருக்கிறது என்று நமது மனதுக்கு கட்டளை அனுப்புகிறதாம்.

என் உயிர் நீதானே!

ஒரு பெண்ணை பார்த்த உடன் சட்டென்று மின்னல் தோன்றுமே.... மனசுக்குள் மணியடிக்குமே... அதேபோல் பெண்ணுக்கும் ஆணை பார்த்த உடன் இவன்தான் எனக்கானவன் என்று உணர்த்துமாம். இதனை செய்வது கூட இந்த மீடியல் ப்ரீபிரன்டல் கார்டெக்ஸ்தானாம். ரியல்வேர்ல்ட் டேட்டாவைப் பயன்படுத்தி இந்த ஆய்வை நடத்தி முடிவை தெரிவித்துள்ளர்.

மூளையின் தகவல்கள்

இந்த ஆய்விற்காக 78 ஆண்களையும், 73 பெண்களையும் தேர்ந்தெடுத்து உட்படுத்தியுள்ளனர். இவர்களில் தனியாக இருப்போர் மற்றும் ஆண், பெண் உறவில் ஈடுபடுவோர் என சகலரும் அடக்கம். இவர்களை ஜோடி ஜோடியாக ஒரு அறைக்குள் தனியாக அனுப்பி ஐந்து நிமிடம் பேச வைத்துள்ளனர். அப்போது அவர்களின் மூளையின் மீடியல் ப்ரீபிரன்டல் கார்டெக்ஸ் பகுதியை ஆய்வு செய்து புள்ளிவிவரத்தை சேகரித்துள்ளனர். மேலும் ஒவ்வொரு ஜோடியையும் மாற்றி மாறி பேச வைத்து தகவல் சேகரித்துள்ளனர்.

மூளையின் மேப்

இவர்களில் யாரை மீண்டும் பார்க்க விரும்புகிறீர்கள் என்ற தகவலையும் தனித் தனியாக ஒரு விண்ணப்பத்தில் எழுதியும் வாங்கி அதையும் ஆய்வு செய்துள்ளனர்.

இந்த டேட்டிங் ஆய்வுக்கு முன்னதாக இந்த பங்கேற்பாளர்களில் 39 பேரின் மூளைகளை மேப் செய்துள்ளனர். அதாவது எப்எம்ஆர்ஐ மூலம் இந்த மேப்பிங்கை செய்துள்ளனர்.

மின்னல் வேக முடிவு

இந்த ஆய்வின்போது கிடைத்த தகவல்கள் படு சுவாரஸ்யமாக இருந்துள்ளது. ஆய்வில் பங்கேற்ற ஒவ்வொரு ஆண் மற்றும் பெண்ணின் மூளையும் தான் சந்தித்த ஆண் அல்லது பெண் குறித்த முடிவுகளை மின்னல் வேகத்தில் கணித்து எடுத்ததாம். அதாவது இவன் இன்டரஸ்டிங்கா பேசுகிறான், இவனது பேச்சு படு சொதப்பல், இவன் செம மொக்கை, இவன் சூப்பர்ப்பா என்ற முடிவுகளை மூளை எடுத்ததாம்.

மூளையின் சுறுசுறுப்பு

ஆய்வில் கிடைத்த இன்னொரு தகவல் என்னவென்றால், ஒருவரை ஒருவர் சந்திக்கும்போதுதான் இந்த கார்டெக்ஸ் பகுதி படு சுறுசுறுப்பாக செயல்படுகிறதாம். மற்ற நேரத்தில் அவ்வளவு துரிதமான செயல்பாடு இங்கு இல்லையாம். மேலும் தங்களுக்குப் பிடித்தமான ஒரு முகத்தைப் பார்த்ததும் இந்த கார்டெக்ஸ் பகுதியின் செயல்பாடு மேலும் ஆக்டிவாக இருக்கிறதாம்.

இனி காதலின் சின்னம் மூளை

இதன் மூலம் தெரிய வருவது என்னவென்றால், காதல் விசயத்தில் இதயத்தை விட மூளைதான் அதிகம் செயல்படுகிறது. எனவே காதலனுக்கோ, காதலிக்கோ ஆர்ட்டின் வரைந்து அம்பு விடுவதற்கு பதிலாக இனி மூளையை வரைந்து அனுப்புங்க...அதுதானே உங்களவரை உங்களுக்குக் காட்டிக் கொடுத்து, காதல் மலர உதவியது...