தினமும் இட்லி தோசை செய்யாம.. பாஸ்தா இருந்தா இப்படி செய்யுங்க.. குழந்தைங்க விரும்பி சாப்பிடுவாங்க..

White Sauce Pasta Recipe In Tamil: கோடை விடுமுறை என்பதால் குழந்தைகள் வீட்டிலேயே இருப்பார்கள். இந்நிலையில் காலையில் எப்போதும் ஒரே மாதிரி இட்லி, தோசை என்று செய்து கொடுத்தால், ஒரு கட்டத்தில் அவர்கள் சாப்பிட மறுக்கத் தொடங்கிவிடுவார்கள். இதைத் தவிர்க்க வேண்டுமானால், அவ்வப்போது அவர்களுக்கு சற்று வித்தியாசமான அதே சமயம் அவர்கள் விரும்பி சாப்பிடக்கூடியவாறான ரெசிபிக்களை செய்து கொடுக்க வேண்டும்.

அதுவும் காலையில் என்ன டிபன் வித்தியாசமாக செய்து கொடுப்பது என்று நீங்கள் கேட்டால், உங்கள் வீட்டில் பாஸ்தா இருந்தால், அதைக் கொண்டு ஒயிட் சாஸ் பாஸ்தாவை செய்யுங்கள். இது குழந்தைகள் மட்டுமின்றி, பெரியவர்களும் விரும்பி சாப்பிடக்கூடியவாறு இருக்கும்.

உங்களுக்கு ஒயிட் சாஸ் பாஸ்தாவை எப்படி செய்வதென்று தெரிந்து கொள்ள வேண்டுமா? கீழே ஒயிட் சாஸ் பாஸ்தா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 2 டேபிள் ஸ்பூன்
* பூண்டு - 5-6 பல்
* வெங்காயம் - 1 (பொடியாக நறுக்கியது)
* சிறிய குடைமிளகாய் - 1 (பொடியாக நறுக்கியது)
* உப்பு - 1/2 டீஸ்பூன்
* மிளகுத் தூள் - 1/4 டீஸ்பூன்
* சில்லி ப்ளேக்ஸ் - 1 டீஸ்பூன்

பாஸ்தா வேக வைப்பதற்கு...

* பாஸ்தா/மக்ரோனி - 1 கப்
* தண்ணீர் - 3 கப்
* உப்பு - 1/2 டீஸ்பூன்
* எண்ணெய் - 1 டீஸ்பூன்

ஒயிட் சாஸ் செய்வதற்கு...

* எண்ணெய் - 2 டேபிள் ஸ்பூன்
* மைதா - 2 டீஸ்பூன்
* காய்ச்சி ஆற வைத்த பால் - 100 மிலி
* மிளகுத் தூள் - 1/4 டீஸ்பூன்
* உப்பு - 1/4 டீஸ்பூன்
* சில்லி ப்ளேக்ஸ் - 1 டீஸ்பூன்

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், பூண்டு சேர்த்து பச்சை வாசனை போக வதக்க வேண்டும்.
* பின் அதில் பொடியாக நறுக்கிய வெங்காயம், குடைமிளகாய் சேர்த்து நன்கு மென்மையாகும் வரை வதக்க வேண்டும்.
* பின்பு அதில் மிளகுத் தூள், உப்பு, சில்லி ப்ளேக்ஸ் சேர்த்து கிளறி இறக்கி தனியாக வைத்துக் கொள்ள வேண்டும்.
* பின் மற்றொரு வாணலியை அடுப்பில் வைத்து, அதில் 3 கப் நீரை ஊற்றி, 1/2 டீஸ்பூன் உப்பு மற்றும் 1 டீஸ்பூன் எண்ணெய் சேர்த்து நீர் நன்கு கொதிக்க தொடங்கியதும், பாஸ்தாவை சேர்த்து கிளறி, ஒரு 5 நிமிடம் வேக வைத்து இறக்கி, நீரை வடிகட்டிவிட்டு, குளிர்ந்த நீரில் ஒருமுறை அலசி தனியாக வைத்துக் கொள்ள வேண்டும்.
* பிறகு ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், மைதாவை சேர்த்து பச்சை வாசனை போக கிளறி விட வேண்டும்.
* பின் அதில் காய்ச்சி ஆற வைத்த பாலை சேர்த்து நன்கு கிளறி விட வேண்டும். நன்கு க்ரீமியாக வரத் தொடங்கியதும், அதில் மிளகுத் தூள், உப்பு சேர்த்து கிளறி விட வேண்டும்.
* அடுத்து வேக வைத்துள்ள பாஸ்தாவை சேர்த்து கிளறி, பின் சில்லி ப்ளேக்ஸ் சேர்த்து நன்கு கிளறி மூடி வைத்து மிதமான தீயில் வைத்து 5 நிமிடம் வேக வைத்து இறக்கினால், சுவையான மற்றும் க்ரீமியான ஒயிட் சாஸ் பாஸ்தா தயார்.

Image Courtesy: Akshaya. com