கிராமத்து ஸ்டைல் முருங்கைக்காய் பொரிச்ச குழம்பு - எப்படி செய்றதுன்னு பாத்து செஞ்சு பாருங்க..

Village Style Murungakkai Poricha Kuzhambu Recipe In Tamil: உங்கள் வீட்டில் அடிக்கடி முருங்கைக்காய் செய்வீர்களா? அதுவும் எப்போதும் ஒரே மாதிரியான சுவையில் தான் குழம்பு செய்வீர்களா? சற்று வித்தியாசமான ருசியில் முருங்கைக்காயை சமைத்து சாப்பிட நினைக்கிறீர்களா? அப்படியானால் கிராமத்து ஸ்டைல் முருங்கைக்காய் பொரிச்ச குழம்பு செய்யுங்கள். வாய்க்கு ருசியாக ஒரு குழம்பு செய்து சாப்பிட நினைக்கும் போது, இந்த குழம்பை செய்து சாப்பிட்டால் அட்டகாசமாக இருக்கும்.

உங்களுக்கு இந்த கிராமத்து ஸ்டைல் முருங்கைக்காய் பொரிச்ச குழம்பு ரெசிபியை எப்படி செய்வதென்று தெரிந்து கொள்ள வேண்டுமா? கீழே கிராமத்து ஸ்டைல் முருங்கைக்காய் பொரிச்ச குழம்பு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 1 டேபிள் ஸ்பூன்
* கடுகு - 1 டீஸ்பூன்
* வெந்தயம் - 1/4 டீஸ்பூன்
* பூண்டு - 4-5 பல்
* கறிவேப்பிலை - 1 கொத்து
* பெரிய வெங்காயம் - 1 (பொடியாக நறுக்கியது)
* தக்காளி - 3 (பொடியாக நறுக்கியது)
* முருங்கைக்காய் - 2 (துண்டுகளாக்கப்பட்டது)
* மஞ்சள் தூள் - 1/4 டீஸ்பூன்
* குழம்பு மிளகாய் தூள் - 2 டீஸ்பூன்
* தண்ணீர் - தேவையான அளவு
* புளித்தண்ணீர் - 1/4 கப்
* உப்பு - சுவைக்கேற்ப

அரைப்பதற்கு...

* துருவிய தேங்காய் - 1/2 கப்
* சீரகம் - 1 டீஸ்பூன்
* தண்ணீர் - சிறிது

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு, வெந்தயம் ஆகியவற்றை சேர்த்து தாளிக்க வேண்டும்.
* பின்பு அதில் பூண்டு பற்களை தட்டி சேர்த்து, அத்துடன் கறிவேப்பிலை சேர்த்து நன்கு வதக்க வேண்டும்.
* அதன் பின் அதில் பொடியாக நறுக்கிய வெங்காயத்தை சேர்த்து, நன்கு கண்ணாடி பதத்திற்கு வரும் வரை வதக்க வேண்டும்.
* அடுத்து அதில் நறுக்கிய தக்காளியை சேர்த்து, மென்மையாகும் வரை வதக்க வேண்டும்.
* பிறகு அதில் நறுக்கிய முருங்கைக்காயை சேர்த்து, சுவைக்கேற்ப உப்பு சேர்த்து 2 நிமிடம் வதக்க வேண்டும்.
* பின்னர் அதில் மஞ்சள் தூள் மற்றும் குழம்பு மிளகாய் தூளை சேர்த்து மிதமான தீயில் வைத்து நன்கு கிளறி விட வேண்டும்.
* பின் அதில் சிறிது நீரை ஊற்றி கிளறி, மூடி வைத்து 5 நிமிடம் முருங்கைக்காயை வேக வைக்க வேண்டும்.
* அதற்குள் மிக்சர் ஜாரில் தேங்காய், சீரகம் சேர்த்து, சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* அதன் பின் வெந்து கொண்டிருக்கும் முருங்கைக்காயுடன் சிறிது புளித்தண்ணீரை சேர்த்து கலந்து 3 நிமிடம் கொதிக்க வைக்க வேண்டும்.
* அடுத்து அதில் அரைத்து வைத்துள்ள தேங்காயை சேர்த்து, சிறிது நீரை ஊற்றி கிளறி 5 நிமிடம் நன்கு கொதிக்க வைத்து இறக்கினால் சுவையான கிராமத்து ஸ்டைல் முருங்கைக்காய் பொரிச்ச குழம்பு தயார்.