வெள்ளைப்பூசணி இருந்தா.. இப்படி சட்னி செய்யுங்க.. இட்லி, தோசைக்கு வேற லெவல்-ல இருக்கும்..

Vellai Poosani Chutney Recipe In Tamil: கோடையில் வெயில் கொளுத்தும் வேளையில் நீர்ச்சத்து அதிகம் நிறைந்த காய்கறிகள் மற்றும் பழங்களை உட்கொள்ள வேண்டும். அப்படி எடுக்கும் போது உடல் நீரேற்றத்துடன் இருக்கும். அப்படி நீர்ச்சத்து அதிகம் நிறைந்த ஒரு காய்கறி தான் வெள்ளைப் பூசணிக்காய். இந்த வெள்ளைப்பூசணியை பொதுவாக சாம்பார் தான் செய்து சாப்பிடுவோம். ஆனால் அந்த வெள்ளைப் பூசணியைக் கொண்டு சட்னி கூட செய்யலாம் என்பது தெரியுமா?

இந்த சட்னி இட்லி, தோசையுடன் சேர்த்து சாப்பிட அற்புதமாக இருக்கும். உங்களுக்கு தினமும் ஒரே மாதிரியான சட்னியை செய்து போரடித்துவிட்டால், ஒருமுறை இப்படி வித்தியாசமான சட்னியை செய்யுங்கள். நிச்சயம் இந்த சட்னி புதுமையாக இருக்கும். குழந்தைகளும் விரும்பி சாப்பிடுமாறு இருக்கும்.

இந்த வெள்ளைப்பூசணி சட்னி ரெசிபி குறித்து rk_recipes_bowl என்னும் இன்ஸ்டாகிராம் பக்கத்தில் பகிரப்பட்டுள்ளது. உங்களுக்கு இந்த வெள்ளை பூசணி சட்னியை எப்படி செய்வதென்று தெரிந்து கொள்ள வேண்டுமா? கீழே வெள்ளைப்பூசணி சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* வெள்ளைப் பூசணி - 1/2 கிலோ
* தக்காளி - 4 (நறுக்கியது)
* பச்சை மிளகாய் - 2
* பூண்டு - 4 பல்
* சின்ன வெங்காயம் - 1 கையளவு
* தண்ணீர் - சிறிது
* மஞ்சள் தூள் - 1/4 டீஸ்பூன்
* மிளகாய் தூள் - 1 டீஸ்பூன்
* உப்பு - சுவைக்கேற்ப
* கொத்தமல்லி - சிறிது

தாளிப்பதற்கு..

* எண்ணெய் - 1 டீஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்
* சீரகம் - 1/4 டீஸ்பூன்
* வரமிளகாய் - 1
* கறிவேப்பிலை - 1 கொத்து

செய்முறை:

* முதலில் வெள்ளைப் பூசணிக்காயை சிறு துண்டுகளாக்கிக் கொள்ள வேண்டும்.
* பின்னர் குக்கரில் நறுக்கிய வெள்ளைப்பூசணி மற்றும் தக்காளியை சேர்க்க வேண்டும்.
* அதன் பின் அதில் பச்சை மிளகாய், பூண்டு, சின்ன வெங்காயம் சிறிது, தண்ணீரை சேர்க்க வேண்டும்.
* பின்பு அதில் மஞ்சுள் தூள், மிளகாய் தூள் சேர்த்து கிளறி, குக்கரை மூடி 3 விசில் விட்டு இறக்க வேண்டும்.
* விசில் போனதும் குக்கரைத் திறந்து, அதில் சுவைக்கேற்ப உப்பு மற்றும் கொத்தமல்லியை சேர்த்து, மத்து கொண்டு நன்கு மசித்து விட வேண்டும்.
* பிறகு ஒரு வாணலியை அடுப்பில் வைத்து, அதில் தாளிப்பதற்கு எண்ணெய் ஊற்றி சூடானதும், கடுகு, உளுத்தம் பருப்பு, சீரகம், வரமிளகாய் மற்றும் கறிவேப்பிலை சேர்த்து தாளித்து, மசித்து வைத்துள்ள வெள்ளைப்பூசணி சட்னியுடன் சேர்த்து கலந்தால், சுவையான வெள்ளைப்பூசணி சட்னி தயார்.