உருளைக்கிழங்கு பீன்ஸ் பொரியல்

பொதுவாக பொரியல் என்பது ஒவ்வொருவரின் விருப்பத்தைப் பொறுத்து செய்யப்படுவதாகும். அப்படி செய்யும் பொரியலில் பெரும்பாலானானோர் விரும்பி சாப்பிடுவது உருளைக்கிழங்கு பொரியல் தான். ஆனால் அந்த உருளைக்கிழங்குடன், பீன்ஸை சேர்த்து பொரியல் செய்தால், அதன் சுவையே தனி தான்.

இங்கு அந்த உருளைக்கிழங்கு பீன்ஸ் பொரியலின் செய்முறை கொடுக்கப்பட்டுள்ளது. அதைப் பார்ப்போமா!!!

தேவையான பொருட்கள்:

உருளைக்கிழங்கு - 5-6 (தோலுரித்து, நறுக்கியது)
பீன்ஸ் - 10-12 (நறுக்கியது)
பச்சை மிளகாய் - 2 (நறுக்கியது)
மஞ்சள் தூள் - 1 டீஸ்பூன்
மல்லி தூள் - 1/2 டீஸ்பூன்
மிளகாய் தூள் - 1 டீஸ்பூன்
சீரகம் - 1 டீஸ்பூன்
உப்பு - தேவையான அளவு
எண்ணெய் - 1 டேபிள் ஸ்பூன்

செய்முறை:

முதலில் ஒரு வாணலியை அடுப்பில் வைத்து, அதில் எண்ணெய் ஊற்றி காய்ந்ததும், சீரகத்தைப் போட்டு தாளிக்க வேண்டும்.

பின்னர் நறுக்கி வைத்துள்ள உருளைக்கிழங்கை சேர்த்து 2 நிமிடம் தீயை குறைவில் வைத்து வதக்க வேண்டும்.

பின்பு பீன்ஸ் மற்றும் பச்சை மிளகாய் சேர்த்து கிளறி, உப்பு மற்றும் மஞ்சள் தூள் சேர்த்து, தட்டு கொண்டு மூடி 10 நிமிடம் காய்கறிகளை வேக வைக்க வேண்டும்.

காய்கறிகளானது நன்கு வெந்த பின்னர், அதில் மிளகாய் தூய் மற்றும் மல்லி தூள் சேர்த்து கிளறி, பச்சை வாசனை போனதும் இறக்கினால், சுவையான உருளைக்கிழங்கு பீன்ஸ் பொரியல் ரெடி!!!