காலையில் ஒரே மாதிரி தோசை சுடாம.. ஒருடைம் இந்த உடுப்பி தக்காளி தோசையை ட்ரை பண்ணி பாருங்க..

Udupi Tomato Dosa Recipe In Tamil: காலையில் பெரும்பாலும் உங்கள் வீட்டில் தோசை தான் செய்வீர்களா? எப்போதும் வெறும் தோசையை செய்து போரடித்துவிட்டதா? அப்படியானால் ஒருமுறை உடுப்பி தக்காளி தோசையை செய்யுங்கள். இந்த தக்காளி தோசையானது ரவா தோசையைப் போன்றே இருக்கும்.

முக்கியமாக வீட்டில் தோசை மாவு இல்லாத சமயத்தில் டக்குன்னு ஒரு தோசையை சுட்டு சாப்பிட நினைத்தால், இந்த தோசையை செய்து சாப்பிடலாம். இந்த தக்காளி தோசைக்கு தேங்காய் சட்னி அருமையான சைடு டிஷ்ஷாக இருக்கும். முக்கியமாக இது குழந்தைகளும் விரும்பி சாப்பிடக்கூடியவாறு இருக்கும்.

உங்களுக்கு உடுப்பில் தக்காளி தோசையை எப்படி செய்வதென்று தெரிந்து கொள்ள வேண்டுமா? கீழே உடுப்பி தக்காளி தோசை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* தக்காளி - 2
* சின்ன வெங்காயம் - 5-6
* பூண்டு - 4
* கோதுமை மாவு - 1/4 கப்
* அரிசி மாவு - 1/2 கப்
* மிளகாய் தூள் - 1 டேபிள் ஸ்பூன்
* உப்பு - சுவைக்கேற்ப
* கொத்தமல்லி - சிறிது
* சீரகம் - 1/2 டீஸ்பூன்
* தண்ணீர் - தேவையான அளவு
* எண்ணெய் - தேவையான அளவு

செய்முறை:

* முதலில் மிக்சர் ஜாரில் தக்காளியை துண்டுகளாக்கி எடுத்துக் கொள்ள வேண்டும்.
* பின்பு அதில் சின்ன வெங்காயம் மற்றும் பூண்டு பற்களை சேர்க்க வேண்டும்.
* பிறகு அதில் 1/4 கப் கோதுமை மாவு, 1/2 கப் அரிசி மாவு சேர்த்து, 1 டேபிள் ஸ்பூன் மிளகாய் தூள் மற்றும் சுவைக்கேற்ப உப்பு சேர்க்க வேண்டும்.
* பின் அதில் சிறிது நீரை ஊற்றி நன்கு அரைத்துக் கொள்ள வேண்டும்.
* பின்னர் அரைத்ததை ஒரு பாத்திரத்தில் ஊற்றி, அதில் சிறிது பொடியாக நறுக்கிய கொத்தமல்லி மற்றும் 1/2 டீஸ்பூன் சீரகம் சேர்த்து, ரவா தோசை பதத்திற்கு தேவையான அளவு நீரை ஊற்றி நன்கு கலந்து கொள்ள வேண்டும்.
* இறுதியாக ஒரு தோசை கல்லை அடுப்பில் வைத்து, அதில் ரவா தோசையை சுடுவது போன்று கலந்து வைத்துள்ள மாவை கரண்டியில் அள்ளி ஊற்றி, எண்ணெய் ஊற்றி பொன்னிறமாக வேக வைத்து எடுத்தால், சுவையான உடுப்பி தக்காளி தோசை தயார்.

Image Courtesy: Dindigul Food Court