உடுப்பி ஹோட்டல் ஸ்டைல் வெஜிடேபிள் குருமா - சிம்பிளா எப்படி செய்யணும் தெரியுமா?

Udupi Hotel Style Vegetable Kurma Recipe In Tamil: உங்கள் வீட்டில் நைட் சப்பாத்தி செய்யப் போகிறீர்களா? அந்த சப்பாத்திக்கு அருமையான சைடு டிஷ் செய்ய நினைக்கிறீர்களா? உங்கள் வீட்டில் காய்கறிகள் உள்ளதா? அப்படியானால் அவற்றைக் கொண்டு உடுப்பி ஹோட்டல் ஸ்டைல் வெஜிடேபிள் குருமாவை செய்யுங்கள்.

இந்த குருமா சப்பாத்தி, பூரி, இடியாப்பத்துடன் மட்டுமின்றி, சாதத்துடன் சாப்பிடவும் அருமையாக இருக்கும். முக்கியமாக இந்த குருமா செய்வதற்கு மிகவும் சுலபமாக இருக்கும்.

உங்களுக்கு உடுப்பி ஹோட்டல் ஸ்டைல் வெஜிடேபிள் குருமாவை எப்படி செய்வதென்று தெரிந்து கொள்ள வேண்டுமா? கீழே உடுப்பி ஹோட்டல் ஸ்டைல் வெஜிடேபிள் குருமா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

அரைப்பதற்கு...

* கொத்தமல்லி - 1 கையளவு
* புதினா - 1 கையளவு
* பச்சை மிளகாய் - 2
* அன்னாசிப்பூ - 1
* ஏலக்காய் - 2
* பட்டை - 1 துண்டு
* கிராம்பு - 3
* கல்பாசி - 1 துண்டு
* சீரகம் - 1 டீஸ்பூன்
* மிளகு - 1 டீஸ்பூன்
* முந்திரி - 5
* துருவிய தேங்காய் - 1/2 கப்

தாளிப்பதற்கு...

* எண்ணெய் - 1 டேபிள் ஸ்பூன்
* வெங்காயம் - 1 (பொடியாக நறுக்கியது)
* இஞ்சி பூண்டு பேஸ்ட் - 1 டீஸ்பூன்
* பச்சை மிளகாய் - 2
* தக்காளி - 1 (பொடியாக நறுக்கியது)
* மஞ்சள் தூள் - 1/2 டீஸ்பூன்
* உப்பு - சுவைக்கேற்ப
* கேரட் - 1 (நறுக்கியது)
* பீன்ஸ் - 10 (நறுக்கியது)
* உருளைக்கிழங்கு - 1 (துண்டுகளாக்கப்பட்டது)

செய்முறை:

* முதலில் மிக்சர் ஜாரில் அரைப்பதற்கு கொடுத்துள்ள கொத்தமல்லி, புதினா, பச்சை மிளகாய், அன்னாசிப்பூ, பட்டை, ஏலக்காய், கிராம்பு, அன்னாசிப்பூ, சீரகம், மிளகு, முந்திரி மற்றும் துருவிய தேங்காய் சேர்த்து, சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* பின்னர் ஒரு குக்கரை அடுப்பில் வைத்து, அதில் எண்ணெய் ஊற்றி சூடானதும், வெங்காயத்தை சேர்த்து பொன்னிறமாக வதக்க வேண்டும்.
* அதன் பின் அதில் பச்சை மிளகாய் மற்றும் இஞ்சி பூண்டு பேஸ்ட் சேர்த்து பச்சை வாசனை போக வதக்க வேண்டும்.
* பிறகு அதில் தக்காளியை சேர்த்து மென்மையாகும் வரை வதக்க வேண்டும்.
* பின்பு அதில் மஞ்சள் தூள் மற்றும் சுவைக்கேற்ப உப்பு சேர்த்து, வதக்க வேண்டும்.
* அடுத்து அதில் நறுக்கி வைத்துள்ள கேரட், பீன்ஸ் மற்றும் உருளைக்கிழங்கை சேர்த்து 3-4 நிமிடங்கள் நன்கு வதக்கி வேண்டும்.
* அதன் பின் அதில் அரைத்து வைத்துள்ள மசாலாவை சேர்த்து பிரட்டி, 1 கப் நீரை ஊற்றி கிளறி, குக்கரை மூடி 2 விசில் விட்டு இறக்கி, விசில் போனதும் குக்கரைத் திறந்தால், சுவையான உடுப்பி ஹோட்டல் ஸ்டைல் வெஜிடேபிள் குருமா தயார்.