1 கப் ரவா இருந்தா இந்த மாதிரி டிபன் செய்யுங்க... டேஸ்ட் பிரியாணிய விட சூப்பரா இருக்கும்...!

Rava Kichadi Recipe in Tamil: பெரும்பாலான வீடுகளில் காலை டிபன் என்றால் அது இட்லி அல்லது தோசையாகத்தான் இருக்கும். ஒரு மாறுதலுக்கு ஏதாவது செய்யலாம் என்றால் உப்புமாதான் எளிய வழி. ஆனால் உப்புமா என்றாலே பயப்படுபவர்கள்தான் அதிகம். ரவாவை வைத்து உப்புமா செய்வது என்றால் பொதுவாக மக்கள் விரும்புவதில்லை என்பது உண்மைதான்.

அதுவே ரவாவை கொஞ்சம் வித்தியாசமாக மற்றும் சுவையாக செய்து கொடுத்தால் பிடிக்காதவர்கள் கூட விரும்பி சாப்பிடுவார்கள். அப்படி ரவாவை எப்படி வித்தியாசமாக செய்து கொடுக்கலாம் என்று நீங்கள் யோசித்தால் அதற்கு இந்த ரவா கிச்சடிதான் எளிதான மற்றும் சுவையான வழியாகும். இஞ்சி, பூண்டு, கிராம்பு, முந்திரி போன்றவை சேர்ப்பதால் இந்த கிச்சடி பிரியாணி சுவையில் இருக்கும். இந்த பதிவில் ரவாவை வைத்து எப்படி சூப்பரான கிச்சடி செய்யலாம் என்று தெரிந்து கொள்ளலாம்.

தேவையான பொருட்கள்:

-1 கப் ரவை
- 1 பெரிய வெங்காயம்
- 1 தக்காளி
- 3 பீன்ஸ்
- 1 கேரட்
- 1/4 கப் பச்சை பட்டாணி
- 1/2 துண்டு இஞ்சி
- 4 பூண்டு பல்
- 4 பச்சை மிளகாய்
- 2 பட்டை துண்டு
- 10 முந்திரி
- 1 பிரியாணி இலை
- 1 ஸ்பூன் சோம்பு
- 1/4 ஸ்பூன் மஞ்சள் தூள்
- உப்பு தேவையான அளவு
- எண்ணெய் தேவையான அளவு
- நெய் தேவையான அளவு
- கொத்தமல்லி சிறிதளவு
- கறிவேப்பிலை சிறிதளவு

செய்முறை:

- முதலில் வெங்காயம், தக்காளி, பீன்ஸ், கேரட், மற்றும் பட்டாணியை தயார் செய்து வைத்துக் கொள்ளவும்.

- இப்பொழுது ஒரு கடாயை அடுப்பில் வைத்து மிதமான சூட்டில் அதில் ஒரு கப் ரவையை போட்டு வறுத்து அடுப்பிலிருந்து இறக்கி தனியாக வைத்து கொள்ளவும்.

- பின்னர் கடாயில் சிறிதளவு எண்ணெய் விட்டு அதில் பிரியாணி இலை, பட்டை, சோம்பு மற்றும் முந்திரியை போட்டு வறுக்கவும்.

- பின்னர் நறுக்கி வைத்துள்ள வெங்காயம் மற்றும் சிறிதளவு கறிவேப்பிலையை சேர்த்து வதக்கவும்.

- பின்னர் அதில் ஒரு ஸ்பூன் இஞ்சி பூண்டு பேஸ்ட்டை சேர்த்து அதன் பச்சை வாசம் போகும் வரை வதக்கவும்.

- அடுத்து அதனுடன் நறுக்கி வைத்துள்ள நறுக்கிய தக்காளி, நறுக்கிய பச்சை மிளகாய், மற்றும் தேவையான அளவு உப்பு சேர்த்து நன்கு கிளறவும்.

- பின்னர் நறுக்கி வைத்துள்ள பீன்ஸ், கேரட், மற்றும் பட்டாணியை இதனுடன் சேர்த்து சுமார் 1 லிருந்து 2 நிமிடம் வரை வதக்கவும்.

- 2 நிமிடம் வதக்கிய பிறகு அதில் மஞ்சள்தூள் சேர்த்து நன்றாக கிளறி விடவும். அடுத்து அரை கப் அளவு தண்ணீர் சேர்த்து காய்கறிகளை வேக விடவும்.

- காய்கறிகள் நன்றாக வெந்ததும் அதில் மேலும் இரண்டரை கப் தண்ணீர் சேர்க்கவும். தண்ணீர் கொதித்த பின் அதில் வறுத்து எடுத்து வைத்திருக்கும் ரவையை சேர்த்து நன்றாக கிளறி விடவும்.

- தண்ணீர் நன்றாக வற்றியதும் அதில் ஒரு மேசைக்கரண்டி நெய் மற்றும் சிறிதளவு கொத்தமல்லி சேர்த்து ஒரு நன்றாக கிளறி அடுப்பிலிருந்து இறக்கவும்.

- இந்த சுவையான மற்றும் ஆரோக்கியமான ரவா கிச்சடிக்கு தேங்காய் சட்னி சூப்பரான சைடிஷாக இருக்கும்.