பஞ்சாபி முட்டை மசாலா

முட்டையைக் கொண்டு பலவாறு சமைக்கலாம். அதில் சாதத்திற்கு ஏற்றவாறு முட்டை குழம்பு, முட்டை மசாலா என்று செய்வோம். இப்படி செய்யும் முட்டை மசாலாவில் பல ஸ்டைல்கள் உள்ளன. அந்த வகையில் ஒன்று தான் பஞ்சாபி முட்டை மசாலா. இந்த ரெசிபி செய்வதற்கு மிகவும் ஈஸியாக இருப்பதோடு, மிகுந்த சுவையோடும் இருக்கும்.

சரி, இப்போது அந்த பஞ்சாபி முட்டை மசாலாவை எப்படி செய்வதென்று பார்ப்போமா!!!

தேவையான பொருட்கள்:

முட்டை - 4 (வேக வைத்து தோலுரித்தது)
வெங்காயம் - 1 (நறுக்கியது)
பிரியாணி இலை - 1
சீரகம் - 1 டீஸ்பூன்
தக்காளி சாறு - 1 டேபிள் ஸ்பூன்
மிளகாய் தூள் - 1 டீஸ்பூன்
மல்லி தூள் - 1 டீஸ்பூன்
மஞ்சள் தூள் - 1/2 டீஸ்பூன்
மாங்காய் தூள் - 1 டீஸ்பூன்
காய்ந்த வெந்தய இலை - 1 டேபிள் ஸ்பூன் (கையால் பொடி செய்தது)
உப்பு - தேவையான அளவு
கரம் மசாலா - 1/2 டீஸ்பூன்
எண்ணெய் - 2 டேபிள் ஸ்பூன்
தண்ணீர் - 1 கப்

மசாலா பேஸ்ட்டிற்கு...

வெங்காயம் - 2
பச்சை மிளகாய் - 2
இஞ்சி - 1 இன்ச்
பூண்டு - 5 பற்கள்
கிராம்பு - 2
பட்டை - 1
சோம்பு - 1 டீஸ்பூன்
தக்காளி - 2

செய்முறை:

* முதலில் மசாலா பேஸ்ட்டிற்கு கொடுத்த பொருட்கள் அனைத்தையும் மிக்ஸியில் போட்டு, நன்கு பேஸ்ட் செய்து கொள்ள வேண்டும்.

* பின்பு ஒரு வாணலியை அடுப்பில் வைத்து, அதில் எண்ணெய் ஊற்றி காய்ந்ததும், சீரகம், பிரியாணி இலை, நறுக்கிய வெங்காயம் சேர்த்து, தீயை குறைவில் வைத்து 3-4 நிமிடம் வதக்க வேண்டும்.

* பிறகு மஞ்சள் தூள், மிளகாய் தூள், மல்லி தூள், மாங்காய் தூள், தக்காளி சாறு சேர்த்து 4-5 நிமிடம் வதக்க வேண்டும்.

* பின்னனர் அரைத்து வைத்துள்ள மசாலா பேஸ்ட்டை சேர்த்து, 5-6 நிமிடம் வதக்க வேண்டும்.

* பின் உப்பு, கரம் மசாலா சேர்த்து 2-3 நிமிடம் வதக்கி, தண்ணீர் ஊற்றி, வேக வைத்துள்ள முட்டையை இரண்டாக வெட்டி போட்டு, தீயை குறைவில் வைத்து, 5-6 நிமிடம் கொதிக்க விட்டு, காய்ந்த வெந்தய இலையை தூவி இறக்கினால், சுவையான பஞ்சாபி முட்டை மசாலா ரெடி!!!