சிறுதானியங்களை எப்பவும் கஞ்சி வெச்சு குடிக்காம.. ஒருடைம் இப்படி செஞ்சு சாப்பிடுங்க.. ருசியானதும், சத்தானதும்..

Saamai Patties Recipe In Tamil: நீங்கள் டயட்டில் இருக்கிறீர்களா? உங்களின் தினசரி காலை உணவில் சிறுதானியங்களை அதிகம் சேர்ப்பீர்களா? அதுவும் சிறுதானியங்களை எப்போதும் கஞ்சியாகத் தான் செய்து சாப்பிடுவீர்களா? இப்படி கஞ்சி சாப்பிட்டு போரடித்துவிட்டதா?

அப்படியானால் ஒருமுறை சிறுதானியங்களுள் ஒன்றான சாமையைக் கொண்டு ஒருமுறை கட்லெட் போன்று பாட்டீஸ் செய்து சாப்பிடுங்கள். அதுவும் இந்த சாமை பாட்டீஸை காலை உணவாகவோ அல்லது மாலை வேளையில் ஸ்நாக்ஸாகவோ சாப்பிடலாம். இது மிகவும் சுவையாக இருப்பதோடு, சத்தானதும் கூட.

உங்களுக்கு இந்த சாமை பாட்டீஸை எப்படி செய்வதென்று தெரிந்து கொள்ள வேண்டுமா? கீழே சாமை பாட்டீஸ் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* சாமை அரிசி - 1/2 கப்
* தண்ணீர் -1 கப்
* வேக வைத்த கொண்டைக்கடலை - 1 கப்
* வெங்காயம் - 1 (பொடியாக நறுக்கியது)
* கேரட் - 1 (துருவியது)
* கொத்தமல்லி - சிறிது (பொடியாக நறுக்கியது)
* சீரகம் - 1/2 டீஸ்பூன்
* மல்லித் தூள் - 1/2 டீஸ்பூன்
* மிளகாய் தூள் - 1/2 டீஸ்பூன்
* கடலை மாவு - 2 டேபிள் ஸ்பூன்
* உப்பு - சுவைக்கேற்ப
* எண்ணெய் - 2 டேபிள் ஸ்பூன்

செய்முறை:

* முதலில் 1/2 கப் சாமையை நீரில் 2 முதல் 3 முறை கழுவிவிட்டு, பின் நீரை ஊற்றி, 1/2 மணிநேரம் ஊற வைத்துக் கொள்ள வேண்டும்.
* பின்னர் ஒரு பாத்திரத்தில் 1 கப் நீரை ஊற்றி அடுப்பில் வைத்து, நீர் நன்கு கொதிக்க ஆரம்பித்ததும், அதில் ஊற வைத்த சாமையை நீரை வடிகட்டிவிட்டு சேர்த்து, மிதமான தீயில் வைத்து, நீர் வற்றியதும், அதை இறக்கி குளிர வைக்க வேண்டும்.
* பின்பு 1 கப் வேக வைத்த கொண்டைக்கடலையை ஓரளவு மசித்துக் கொள்ள வேண்டும்.
* பின் அத்துடன் பொடியாக நறுக்கிய வெங்காயம், துருவிய கேரட், பொடியாக நறுக்கிய கொத்தமல்லியை சேர்க்க வேண்டும்.
* அதன் பின் அதில் சீரகம், மல்லித் தூள், மிளகாய் தூள், கடலை மாவு மற்றும் சுவைக்கேற்ப உப்பு சேர்க்க வேண்டும்.
* பிறகு அதில் வேக வைத்த சாமையை சேர்த்து, நீர் எதுவும் சேர்க்காமல் கைகளால் நன்கு பிசைந்து விட வேண்டும்.
* பின் பிசைந்த கலவையை கொஞ்சம் எடுத்து உருட்டி, கட்லெட் போன்ற வடிவில் ஓரளவு தட்டையாக தட்டிக் கொள்ள வேண்டும். இதேப் போன்று அனைத்து கலவையையும் தட்டிக் கொள்ள வேண்டும்.
* இறுதியாக ஒரு பேனை அடுப்பில் வைத்து, அதில் 2 டேபிள் ஸ்பூன் எண்ணெய் ஊற்றி சூடானதும், தட்டி வைத்துள்ளதை போட்டு, முன்னும் பின்னும் பொன்னிறமாக ப்ரை செய்து எடுத்தால், சுவையான சாமை பாட்டீஸ் தயார்.