சத்தான மிளகு சீரக அடை ரெசிபி - ஒருதடவை செஞ்சு பாருங்க, வித்தியாசமா சூப்பரா இருக்கும்

Milagu Jeeraga Adai Recipe in Tamil: தினமும் இட்லி, தோசை என்று ஒரே மாதிரியான காலை டிபனை சாப்பிட்டு போரடித்துவிட்டதா? சற்று வித்தியாசமான சுவையில், அதே சமயம் சத்தான ஒரு டிபனை செய்து சாப்பிட நினைக்கிறீர்களா? அப்படியானால் மிளகு சீரக அடையை ஒருமுறை செய்து அதனுடன் வெல்லம் அல்லது வெண்ணெயை வைத்து சாப்பிட்டு பாருங்கள். இந்த டிபன் காம்போ சுவையானது மட்டுமின்றி, சத்தானதும் கூட. முக்கியமாக இது குழந்தைகளும் விரும்பி சாப்பிடுமாறு அட்டகாசமான சுவையில் இருக்கும்.

இந்த மிளகு சீரக அடை செய்வதற்கு சுலபமாக இருப்பதுடன், சுவையானதாகவும், ஆரோக்கியமானதாகவும் இருக்கும். ஏனெனில் இதில் மிளகு, சீரகம், உளுந்து மற்றும் தேங்காய் என பல ஆரோக்கியமான பொருட்கள் சேர்க்கப்பட்டு தயாரிக்கப்படுகிறது. இந்த அடை டெல்டா மற்றும்செட்டிநாடு பகுதிகளில் பண்டிகைகளின் பெரும்பாலான மக்களால் விரும்பி செய்யப்படும் ஒரு உணவாகும்.

உங்களுக்கு சத்தான மற்றும் சுவையான மிளகு சீரக அடையை எப்படி செய்வதென்று தெரிந்து கொள்ள வேண்டுமா? கீழே மிளகு சீரக அடை தோசை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- பச்சரிசி - 2 கப்
- கருப்பு உளுந்து - 3/4 கப்
- மிளகு - 2 ஸ்பூன்
- சீரகம் - 1 ஸ்பூன்
- நறுக்கிய தேங்காய் துண்டுகள் - 1/2 கப்
- நறுக்கிய கறிவேப்பிலை - 2 ஸ்பூன்
- நெய் - அடை சுடுவதற்குத் தேவையான அளவு
- உப்பு - தேவையான அளவு
- தண்ணீர் - தேவையான அளவு

செய்முறை:

- முதலில் பச்சரிசியை நன்றாகக் கழுவி, 2 முதல் 4 மணி நேரம் ஊறவைக்கவும். உளுத்தம்பருப்பை ஊறவைக்கத் தேவையில்லை.

- ஒரு மிக்ஸி ஜாரில், கறுப்பு உளுந்து, மிளகு, சீரகம் மற்றும் ஊறவைத்த அரிசியில் பாதியை எடுத்துக்கொள்ளவும்.

- தேவையான அளவு தண்ணீர் சேர்த்து, ரவை போன்ற பதத்தில் சற்று கொரகொரப்பாக அரைத்துக்கொள்ளவும். இதனை ஒரு கிண்ணத்தில் தனியாக எடுத்து வைத்துக்கொள்ளவும்.

- மீதமுள்ள அரிசியையும் அதேபோல சற்று கொரகொரப்பாக அரைத்து, அதே கிண்ணத்தில் சேர்த்துக்கொள்ளவும்.

- இந்த கலவையில் சின்ன சின்ன துண்டுகளாக நறுக்கிய தேங்காய் துண்டுகள் மற்றும் நறுக்கிய கறிவேப்பிலை மற்றும் தேவையான அளவு உப்பு சேர்த்து நன்றாகக் கலக்கவும்.

- இப்போது தோசைக்கல்லைச் சூடாக்கவும். அடை மாவைச் சற்றுத் தடிமனாக கைகளால் கையில் பரப்பவும்.

- இப்போது =நெய்யை கொஞ்சம் தாராளமாக ஊற்றவும்.

- மூடி வைத்து, மிதமான தீயில் பொன்னிறமாகும் வரை வேக வைக்கவும். திருப்பிப் போட்டு, மறுபுறத்தையும் பொன்னிறமாக வேக வைக்கவும்.

- இதை ஒரு தட்டிற்கு மாற்றி வெல்லம் அலல்து வெண்ணெயுடன் சைடிஷாக வைத்து சாப்பிடவும். இதன் சுவை மிகவும் வித்தியாசமாக இருக்கும்.