1 பாக்கெட் மேகி வெச்சு ஒருடைம் தோசை செஞ்சு பாருங்க.. ரவா தோசையே தோத்துப்போயிடும்..

Maggi Dosa Recipe In Tamil: காலையில் தோசை சுட திட்டமிட்டுள்ளீர்களா? ஆனால் வீட்டில் தோசை மாவு தீர்ந்துவிட்டதா? பொதுவாக வீட்டில் இப்படியான சூழ்நிலைகளில மேகி இருந்தால் அதை செய்து சாப்பிடுவோம். ஆனால் அந்த மேகியைக் கொண்டே சூப்பரான தோசை சுடலாம் தெரியுமா?

அதுவும் இந்த மேகி தோசையானது ரவா தோசையையே தோற்கடிக்கும் அளவில் மிகவும் சுவையாகவும், மொறுமொறுப்பாகவும் இருக்கும். முக்கியமாக இந்த தோசை செய்வதற்கு ஒருசில பொருட்களே போதுமானது. காலையில் டக்கென்று ஒரு டிபன்செய்ய நினைத்தால், இந்த மேகி தோசையை செய்யலாம். குறிப்பாக இந்த மேகி தோசையை வெறுமனே சாப்பிடலாம் அல்லது தேங்காய் சட்னியுடன் சாப்பிடலாம்.

உங்களுக்கு மேகி தோசையை எப்படி செய்வதென்று தெரிந்து கொள்ள வேண்டுமா? கீழே மேகி தோசை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* மேகி - 1 பாக்கெட்
* அரிசி மாவு - 3 டேபிள் ஸ்பூன்
* ரவை - 1 டேபிள் ஸ்பூன்
* வெங்காயம் - 1 (பொடியாக நறுக்கியது)
* தக்காளி - 1(பொடியாக நறுக்கியது)
* பச்சை மிளகாய் - 1 (பொடியாக நறுக்கியது)
* இஞ்சி - சிறிய துண்டு (பொடியாக நறுக்கியது)
* சில்லி ப்ளேக்ஸ் - 1/2 டீஸ்பூன்
* உப்பு - சுவைக்கேற்ப
* மேகி மசாலா
* கொத்தமல்லி - சிறிது
* தண்ணீர் - தேவையான அளவு
* எண்ணெய் - தேவையான அளவு

செய்முறை:

* முதலில் மிக்சர் ஜாரில் மேகியைப் போட்டு நன்கு மென்மையாக பொடித்துக் கொள்ள வேண்டும்.
* பின்பு அதில் அரிசி மாவு, ரவை, பொடியாக நறுக்கிய வெங்காயம், தக்காளி, பச்சை மிளகாய், இஞ்சி ஆகியவற்றை சேர்க்க வேண்டும்.
* அதன் பின் சில்லி ப்ளேக்ஸ், சுவைக்கேற்ப உப்பு, மேகி மசாலா, சிறிது நறுக்கிய கொத்தமல்லி, தோசை மாவு பதத்திற்கு தேவையான அளவு நீரை ஊற்றி நன்கு கலந்து கொள்ள வேண்டும்.
* பிறகு ஒரு தோசைக் கல்லை அடுப்பில் வைத்து, கல் சூடானதும், கலந்து வைத்துள்ள மாவை அள்ளி ரவா தோசைக்கு ஊற்றுவது போன்றே ஊற்ற வேண்டும்.
* பின் அதன் மேல் எண்ணெய் ஊற்றி, 2 நிமிடம் வேக வைத்து எடுத்தால், சுவையான மேகி தோசை தயார். இந்த தோசையை திருப்பிப் போட்டு வேக வைக்க வேண்டுமென்ற அவசியம் இல்லை.