இந்த கஞ்சியை காலையில 1 கப் குடிச்சா.. ஒரு மாசத்துல 5 கிலோ வரை உடல் எடையை குறைக்கலாம்.. ட்ரை பண்ணி பாருங்க..

Kuthiraivali Pachaipayaru Kanji Recipe In Tamil: நீங்கள் குண்டாக இருக்கிறீர்களா? உங்கள் உடல் எடையைக் குறைக்க பல முயற்சிகளை மேற்கொண்டு வருகிறீர்களா? உடல் எடையைக் குறைக்க வேண்டுமானால், முதலில் உணவில் கவனம் செலுத்த வேண்டும். ஏனெனில் உணவுகளினால் தான் ஒருவரது உடல் எடை அதிகரிக்கிறது. எனவே உண்ணும் உணவை சரிசெய்தால், நல்ல மாற்றத்தை விரைவில் காணலாம்.

அதுவும் உடல் எடையை வேகமாக குறைக்க நினைத்தால், சிறுதானிய கஞ்சி தான் மிகச்சிறந்த காலை உணவு. அதுவும் குதிரைவாலி அரிசியுடன் பச்சை பயறு சேர்த்து கஞ்சி தயாரித்து குடிக்கும் போது, உடல் எடையில் நல்ல மாற்றத்தைக் காணலாம். ஏனெனில் இதில் கலோரிகள் மிகவும் குறைவு. மேலும் இந்த கஞ்சியை ஒரு கப் குடித்தாலே வயிறு நீண்ட நேரம் நிரம்பியிருக்கும்.

உங்களுக்கு இந்த குதிரைவாலி பச்சை பயறு கஞ்சியை எப்படி செய்வதென்று தெரிந்து கொள்ள வேண்டுமா? கீழே குதிரைவாலி பச்சை பயறு கஞ்சி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* குதிரைவாலி அரிசி - 3/4 கப்
* பச்சை பயறு - 1 கப்
* பூண்டு - 5 பல்
* வெந்தயம் - 1/2 டீஸ்பூன்
* உப்பு - சுவைக்கேற்ப
* தண்ணீர் - 5 கப் + தேவையான அளவு
* துருவிய தேங்காய் - 1 கையளவு

செய்முறை:

* முதலில் பச்சை பயறை இரவு தூங்கும் முன் நீரில் ஊற வைத்துக் கொள்ள வேண்டும்.
* மறுநாள் காலையில் குதிரைவாலி அரிசியை குக்கரில் எடுத்து, அதை 4 முறை நன்கு கழுவிக் கொள்ள வேண்டும்.
* பின் கழுவிய குதிரைவாலி அரிசியுடன், ஊற வைத்த பச்சை பயறை சேர்க்க வேண்டும்.
* அதன் பின் பூண்டு பற்கள் மற்றும் வெந்தயத்தை சேர்த்துக் கொள்ள வேண்டும்.
* பின்பு அதில் அரிசியும், பயறும் மூழ்கும் அளவில் ஒரு 5 கப் நீரை ஊற்ற வேண்டும்.
* பிறகு அதில் சுவைக்கேற்ப உப்பு சேர்த்து கலந்து, அந்த குக்கரை அடுப்பில் வைக்க வேண்டும்.
* பின் குக்கரை மூடி, அரிசியும், பருப்பும் நன்கு குலையும் வகையில் ஒரு 7 விசில் விட்டு இறக்கிக் கொள்ள வேண்டும்.
* விசில் போனதும், குக்கரைத் திறந்து நன்கு கலந்து விட வேண்டும்.
* கஞ்சி மிகவும் கெட்டியாக இருந்தால், தேவையான அளவு நீரை ஊற்றி கலந்து விட வேண்டும்.
* இறுதியாக துருவிய தேங்காயை தூவி கிளறினால், சுவையான குதிரைவாலி பச்சை பயறு கஞ்சி தயார்.