பூரிக்கு அட்டகாசமாக இருக்கும்.. கர்நாடகா ஸ்டைல் வெஜிடேபிள் குருமா

வெள்ளிக்கிழமைகளில் பலரது வீடுகளில் காலை உணவாக பூரி செய்யும் வழக்கம் இருக்கும். நீங்களும் அப்படி பூரி செய்வீர்களா? அந்த பூரிக்கு வித்தியாசமான மற்றும் சுவையான ஒரு சைடு டிஷ் செய்ய விரும்புகிறீர்களா? அப்படியானால் கர்நாடகா ஸ்டைல் வெஜிடேபிள் குருமா செய்யுங்கள். இந்த வெஜிடேபிள் குருமா செய்வது மிகவும் சுலபம். மேலும் இது பூரிக்கு மட்டுமின்றி, சப்பாத்திக்கும் அட்டகாசமாக இருக்கும். இந்த ரெசிபியின் ஸ்பெஷலே அதன் மசாலா தான்.

உங்களுக்கு கர்நாடகா ஸ்டைல் வெஜிடேபிள் குருமா எப்படி செய்வதென்று தெரிந்து கொள்ள வேண்டுமா? கீழே கர்நாடகா ஸ்டைல் வெஜிடேபிள் குருமா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* காய்கறிகள் - 1 கப் (கேரட், பீன்ஸ், உருளைக்கிழங்கு, பச்சை பட்டாணி)

* பெரிய வெங்காயம் - 1 (நறுக்கியது)

* தக்காளி - 1 (நறுக்கியது)

* உப்பு - தேவையான அளவு

* தண்ணீர் - தேவையான அளவு

அரைப்பதற்கு...

* தேங்காய் - 1/4 கப் (துருவியது)

* பச்சை மிளகாய் - 2

* கசகசா - 1 1/2 டீஸ்பூன்

* பொட்டுக்கடலை - 1 1/2 டீஸ்பூன்

* பெரிய வெங்காயம் - 1/2

* மல்லி - 1/2 டீஸ்பூன்

* இஞ்சி - 1/2 இன்ச்

* பூண்டு - 2 பல்

* சீரகம் - 1/4 டீஸ்பூன்

* பட்டை - 1 இன்ச்

* கிராம்பு - 2

* ஏலக்காய் - 1

* கொத்தமல்லி - சிறிது

தாளிப்பதற்கு...

* எண்ணெய் - 2 டேபிள் ஸ்பூன்

* கடுகு - 1/2 டீஸ்பூன்

* உளுத்தம் பருப்பு - 1 டீஸ்பூன்

* கறிவேப்பிலை - சிறிது

செய்முறை:

* முதலில் காய்கறிகளை நீரில் கழுவி, பொடியாக நறுக்கிக் கொள்ள வேண்டும்.

* பின் அரைப்பதற்கு கொடுத்துள்ள பொருட்களை மிக்சர் ஜாரில் போட்டு, நன்கு மென்மையாக பேஸ்ட் போல் அரைத்துக் கொள்ள வேண்டும்.

* பின்பு குக்கரை அடுப்பில் வைத்து, அதில் எண்ணெய் ஊற்றி சூடானதும், கடுகு, உளுத்தம் பருப்பு, கறிவேப்பிலை சேர்த்து தாளிக்க வேண்டும்.

* பின் அதில் பொடியாக நறுக்கிய வெங்காயம் மற்றும் தக்காளியை சேர்த்து வதக்க வேண்டும். பின் அதில் நறுக்கிய காய்கறிகளை சேர்த்து, சிறிது உப்பு தூவி வதக்க வேண்டும்.

* பிறகு அதில் அரைத்த விழுதை சேர்த்து பச்சை வாசனை போக வதக்க வேண்டும்.

* பின் ஒரு கப் நீரை ஊற்றி, குக்கரை மூடி 1 விசில் விட்டு இறக்கினால், சுவையான கர்நாடக ஸ்டைல் வெஜிடேபிள் குருமா தயார்.

Image Courtesy: chitrasfoodbook