தோசை மாவு இல்லாத நேரத்தில் 1 கப் ஜவ்வரிசி இருந்தா.. 15 நிமிடத்தில் மொறுமொறுன்னு தோசை செய்யலாம் தெரியுமா?

Javvarisi Dosa Recipe In Tamil: காலையில் வீட்டில் தோசை சுட மாவு இல்லையா? காலையில் என்ன டிபன் செய்வதென்று யோசித்துக் கொண்டிருக்கிறீர்களா? உங்கள் வீட்டில் ஜவ்வரிசி உள்ளதா? அப்படியானால் அந்த ஜவ்வரிசியைக் கொண்டு அற்புதமான சுவையில் மொறுமொறுவென்று தோசை சுடலாம் தெரியுமா?

இந்த ஜவ்வரிசி தோசை ரவா தோசையைப் போன்றே நல்ல சுவையைக் கொண்டிருக்கும். மேலும் இது குழந்தைகள் முதல் பெரியவர்கள் வரை விரும்பி சாப்பிடக்கூடியவாறும் இருக்கும். முக்கியமாக இந்த ஜவ்வரிசி தோசை செய்வதற்கு மிகவும் ஈஸியாக இருக்கும்.

உங்களுக்கு ஜவ்வரிசி தோசையை எப்படி செய்வதென்று தெரிந்து கொள்ள வேண்டுமா? கீழே ஜவ்வரிசி தோசை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* ஜவ்வரிசி - 1 கப்
* பச்சரிசி மாவு - 1 கப்
* உருளைக்கிழங்கு - 1 (வேக வைத்தது)
* பச்சை மிளகாய் - 1 (பொடியாக நறுக்கியது)
* இஞ்சி - 1 சிறிய துண்டு (பொடியாக நறுக்கியது)
* கொத்தமல்லி - சிறிது (பொடியாக நறுக்கியது)
* வெங்காயம் - 1 (பொடியாக நறுக்கியது)
* கேரட் - 1 (துருவியது)
* உப்பு - சுவைக்கேற்ப
* எண்ணெய் - தேவையான அளவு

செய்முறை:

* முதலில் ஒரு வாணலியை அடுப்பில் வைத்து, அதில் ஜவ்வரிசியை போட்டு மிதமான தீயில் வைத்து நன்கு வெள்ளையாகும் வரை வறுத்து இறக்கி குளிர வைத்து மிக்சர் ஜாரில் போட்டு நன்கு மென்மையாக அரைத்து பொடி செய்து கொள்ள வேண்டும்.
* பின் ஒரு பாத்திரத்தில் அரைத்த ஜவ்வரிசி பொடியை சேர்த்து, அத்துடன் பச்சரிசி மாவையும் சேர்த்துக் கொள்ள வேண்டும்.
* பின்பு வேக வைத்த ஒரு பெரிய உருளைக்கிழங்கை எடுத்து, அதன் தோலை நீக்கிவிட்டு, மிக்சர் ஜாரில் மசித்து போட்டு, சிறிது நீரை ஊற்றி நன்கு மென்மையாக அரைத்து, அதையும் மாவுடன் சேர்த்துக் கொள்ள வேண்டும்.
* பிறகு அதில் கொஞ்சம் கொஞ்சமாக நீரை ஊற்றி நன்கு நீர் போன்று கரைத்துக் கொள்ள வேண்டும்.
* அடுத்து அதில் பொடியாக நறுக்கிய பச்சை மிளகாய், இஞ்சி, கொத்தமல்லி, வெங்காயம், துருவிய கேரட் மற்றும் சுவைக்கேற்ப உப்பு சேர்த்து நன்கு கலந்து கொள்ள வேண்டும்.
* மாவு மிகவும் கெட்டியாக இருந்தால், இன்னும் கொஞ்சம் நீரை ஊற்றி, ரவா தோசை மாவு பதத்திற்கு கலந்து கொள்ள வேண்டும்.
* இறுதியாக ஒரு நாண்ஸ்டிக் தவாவை அடுப்பில் வைத்து, தவா நன்கு சூடானதும் கரைத்து வைத்துள்ள மாவை கல்லில் அள்ளி ஊற்றி, எண்ணெய் ஊற்றி மிதமான தீயில் வைத்து, பொன்னிறமாக வேக வைத்து எடுத்தால், சுவையான ஜவ்வரிசி தோசை தயார்.

Image Courtesy: Apoorvaa's Nalabagam