1/2 கப் ஜவ்வரிசி இருந்தா.. காலையில இப்படி ஒரு டிபன் செய்யுங்க.. டேஸ்ட்டா இருக்கும்..

Javvarisi Adai Dosa Recipe In Tamil: ஒவ்வொரு நாளும் காலையில் என்ன டிபன் செய்வதென்று முடிவெடுப்பதே ஒரு பெரிய வேலையாக உள்ளதா? இன்று காலை என்ன டிபன் செய்வதென்று இன்னும் முடிவெடுக்கவில்லையா?

வீட்டில் ஜவ்வரிசி உள்ளதா? அப்படியானால் அந்த ஜவ்வரிசியைக் கொண்டு ஒரு அடை தோசையை சுடுங்கள். இந்த ஜவ்வரிசி அடை தோசை அடிக்கும் வெயிலுக்கு உடலுக்கு குளிர்ச்சியைத் தரும். இந்த தோசைக்கு தக்காளி சட்னி, தேங்காய் சட்னி என அனைத்துமே நன்றாக இருக்கும்.

உங்களுக்கு ஜவ்வரிசி அடை தோசையை எப்படி செய்வதென்று தெரிந்து கொள்ள வேண்டுமா? கீழே ஜவ்வரிசி அடை தோசை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* ஜவ்வரிசி - 1/2 கப்
* இட்லி மாவு - 3 கப்
* வரமிளகாய் - 3
* பூண்டு - 7 பல்
* சீரகம் - 1/2 டீஸ்பூன்
* உப்பு - சுவைக்கேற்ப
* கறிவேப்பிலை - சிறிது (பொடியாக நறுக்கியது)
* கொத்தமல்லி - சிறிது (பொடியாக நறுக்கியது)
* வெங்காயம் - 1 (பொடியாக நறுக்கியது)
* கேரட் - 1 (துருவியது)
* எண்ணெய் - தேவையான அளவு

செய்முறை:

* முதலில் ஜவ்வரிசியை நீரில் 2-3 மணிநேரம் ஊற வைக்க வேண்டும். 3 மணிநேரம் கழித்து, ஜவ்வரிசியில் உள்ள நீரை வடித்துவிட வேண்டும்.
* பின் மிக்சர் ஜாரில் வரமிளகாய், பூண்டு, சீரகம் சேர்த்து, நீர் சேர்க்காமல் அரைத்துக் கொள்ள வேண்டும்.
* பின்னர் ஒரு பாத்திரத்தில் இட்லி மாவை எடுத்துக் கொள்ள வேண்டும்.
* பின் அதில் கழுவி வைத்துள்ள ஜவ்வரிசியை சேர்த்து, சுவைக்கேற்ப உப்பு சேர்த்துக் கொள்ள வேண்டும்.
* பின்பு அதில் அரைத்து வைத்துள்ள வரமிளகாயை சேர்த்து, அத்துடன் நறுக்கிய கறிவேப்பிலை, கொத்தமல்லி, பொடியாக நறுக்கிய வெங்காயம் சேர்த்து நன்கு கலந்து கொள்ள வேண்டும்.
* மாவானது மிகவும் கெட்டியாக இருந்தால், சிறிது நீரை ஊற்றி கலந்து கொள்ள வேண்டும்.
* அடுத்து துருவிய கேரட்டை சேர்த்து கலந்து கொள்ள வேண்டும்.
* இறுதியாக ஒரு தோசைக்கல்லை அடுப்பில் வைத்து, அதில் மாவை ஊற்றி அடை போன்று சுற்றி, மேலே சிறிது கேரட்டைத் தூவி, எண்ணெய் ஊற்றி, குறைவான தீயில் வைத்து, நன்கு வேக வைத்து எடுத்தால், சுவையான ஜவ்வரிசி அடை தோசை தயார்.

Image Courtesy: Apoorvaa's Nalabagam