இட்லி, தோசைக்கு 10 நிமிஷத்துல சைடு டிஷ் செய்யணுமா? அப்ப இந்த குருமாவை செய்யுங்க...

Instant Idli Kurma Recipe In Tamil: காலையில் உங்கள் வீட்டில் பெரும்பாலும் இட்லி தான் செய்வீர்களா? அந்த இட்லிக்கு எப்போதும் சட்னி, சாம்பார் தான் செய்வீர்களா? இப்படி சட்னி, சாம்பார் செய்து போரடித்துவிட்டதா? சற்று வித்தியாசமான அதே சமயம் 10 நிமிடத்தில் செய்யக்கூடியவாறு சைடு டிஷ் செய்ய நினைக்கிறீர்களா?

அப்படியானால் சட்டென்று செய்யக்கூடியவாறு ஒரு இட்லி குருமாவை செய்யுங்கள். இந்த இட்லி குருமா இட்லி, தோசையுடன் மட்டுமின்றி, இடியாப்பம், அப்பம் போன்றவற்றுடன் சேர்த்து சாப்பிட அற்புதமாக இருக்கும். முக்கியமாக இது வேலைக்கு செல்பவர்கள் டக்கென்று செய்யக்கூடியவாறு செய்வதற்கு ஈஸியாக இருக்கும்.

உங்களுக்கு இட்லி குருமாவை எப்படி செய்வதென்று தெரிந்து கொள்ள வேண்டுமா? கீழே இட்லி குருமா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 3 டீஸ்பூன்
* சோம்பு - 1 டீஸ்பூன்
* பட்டை - 1
* கிராம்பு - 2
* ஏலக்காய் - 2
* வெங்காயம் - 1 (பொடியாக நறுக்கியது)
* கறிவேப்பிலை - சிறிது
* தண்ணீர் - தேவையான அளவு
* உப்பு - சுவைக்கேற்ப

அரைப்பதற்கு...

* சின்ன வெங்காயம் - 10
* தேங்காய் - 1/2 கப்
* பட்டை - 3 துண்டு
* அன்னாசிப்பூ - 1
* கிராம்பு - 3
* பச்சை மிளகாய் - 3
* இஞ்சி - 4 துண்டு
* பூண்டு - 7 பல்
* மிளகு - 1 டீஸ்பூன்
* சீரகம் - 1 டீஸ்பூன்
* முந்திரி - 10
* பொட்டுக்கடலை - 1 டீஸ்பூன்
* தண்ணீர் - சிறிது

செய்முறை:

* முதலில் குக்கரை அடுப்பில் வைத்து, அதில் எண்ணெய் ஊற்றி சூடானதும், சோம்பு, பட்டை, கிராம்பு, ஏலக்காய் சேர்த்து தாளிக்க வேண்டும்.
* பின் அதில் வெங்காயம் மற்றும் கறிவேப்பிலை சேர்த்து பொன்னிறமாக வதக்க வேண்டும்.
* வெங்காயம் வதங்குவதற்குள், மிக்சர் ஜாரில் சின்ன வெங்காயம், தேங்காய், பட்டை, அன்னாசிப்பூ, கிராம்பு, பச்சை மிளகாய், இஞ்சி, பூண்டு, மிளகு, சீரகம், முந்திரி, பொட்டுக்கடலை சேர்த்து, சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* வெங்காயம் வதங்கியதும், அதில் அரைத்து வைத்துள்ள தேங்காய் விழுதை சேர்த்து, 2 நிமிடம் கிளறி விட வேண்டும்.
* பின் அதில் குருமாவிற்கு தேவையான அளவு நீரை ஊற்றி கிளறி, சுவைக்கேற்ப உப்பு சேர்த்து, குக்கரை மூடி 6 விசில் விட்டு இறக்கினால், சுவையான இட்லி குருமா தயார்.

Image Courtesy: Today's Samayal