மீன் வறுவலுக்கு வீட்ல இந்த மாதிரி க்ரீன் மசாலாவை செஞ்சு ப்ரை பண்ணுங்க.. டேஸ்ட் வேற லெவல்-ல இருக்கும்..

Green Masala Fish Fry Recipe In Tamil: விடுமுறை நாட்களில் உங்கள் வீட்டில் எப்போதும் மீன் வாங்குவீர்களா? எப்போதும் மீனை ஒரே சுவையில் தான் ப்ரை செய்வீர்களா? இந்த வாரம் மீனை வித்தியாசமான சுவையில் ப்ரை செய்து சாப்பிட விரும்புகிறீர்களா?

அப்படியானால் மீன் வறுவலுக்கு கடைகளில் விற்கப்படும் மசாலாவை வாங்குவதற்கு பதிலாக, வீட்டிலேயே க்ரீன் மசாலாவை தயார் செய்யுங்கள். இந்த மாதிரி மசாலாவை வீட்டில் செய்து மீனை ப்ரை செய்தால், சுவை இன்னும் அற்புதமாக இருக்கும். அதோடு அடுத்தமுறையில் இருந்து இப்படி தான் மீனை சமைப்பீர்கள்.

உங்களுக்கு க்ரீன் மசாலா மீன் வறுவலை எப்படி செய்வதென்று தெரிந்து கொள்ள வேண்டுமா? கீழே க்ரீன் மசாலா மீன் வறுவல் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* மீன்
* சின்ன வெங்காயம் - 10
* பச்சை மிளகாய் - 5
* கொத்தமல்லி - 1 கையளவு
* புதினா - 1 கையளவு
* இஞ்சி - 1 சிறிய துண்டு
* பூண்டு - 6 பல்
* மிளகு - 1/2 டீஸ்பூன்
* சீரகம் - 1/2 டீஸ்பூன்
* எலுமிச்சை - 1/2
* சில்லி ப்ளேக்ஸ் - 1 டீஸ்பூன்
* உப்பு - சுவைக்கேற்ப
* கறிவேப்பிலை - 1 கொத்து
* எண்ணெய் - பொரிப்பதற்கு தேவையான அளவு

செய்முறை:

* முதலில் மீனை நன்கு கழுவிக் கொள்ள வேண்டும்.
* பின் மிக்சர் ஜாரில் சின்ன வெங்காயம், கொத்தமல்லி, புதினா, பச்சை மிளகாய், இஞ்சி, பூண்டு, மிளகு, சீரகம் சேர்த்து நன்கு மென்மையாக அரைத்துக் கொள்ள வேண்டும்.
* பின்பு அரைத்த விழுதை மீனுடன் சேர்த்து, மேலே எலுமிச்சை சாறு, சில்லி ப்ளேக்ஸ் மற்றும் சுவைக்கேற்ப உப்பு சேர்த்து நன்கு பிரட்டி, குறைந்தது 1 மணிநேரம் ஊற வைக்க வேண்டும்.
* பிறகு ஒரு நாண் ஸ்டிக் பேனை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடானதும், கறிவேப்பிலை கொத்து வைத்து, அதன் மேல் மீன் துண்டுகளை ஒவ்வொன்றாக வைத்து, ப்ரை செய்து எடுக்க வேண்டும். இதேப் போல் அனைத்து மீன் துண்டுகளையும் பொரித்து எடுத்தால், சுவையான க்ரீன் மசாலா மீன் வறுவல் தயார்.

Image Courtesy: Hyderabadi Ruchulu