கோதுமை தோசையை ஒருமுறை முட்டை சேர்த்து இப்படி செஞ்சு பாருங்க.. சுவை அள்ளும்...

Egg Wheat Dosa Recipe In Tamil: காலையில் வீட்டில் தோசை சுட மாவு இல்லையா? வீட்டில் கோதுமை மாவு இருந்தால், அதைக் கொண்டு தோசை சுடுங்கள். அதுவும் வெறும் கோதுமை தோசையை சுடுவதற்கு பதிலாக, முட்டை, தேங்காய் சேர்த்து ஒரு புதுமையான சுவையில் தோசை சுடுங்கள்.

இந்த தோசை வித்தியாசமான சுவையில் இருப்பதோடு, குழந்தைகள் முதல் பெரியவர்கள் வரை அனைவரும் விரும்பி சாப்பிடக்கூடியவாறு இருக்கும். இந்த தோசைக்கு தக்காளி சட்னி, கார சட்னி என்று எது வேண்டுமானாலும் பொருத்தமாக இருக்கும்.

உங்களுக்கு முட்டை கோதுமை தோசையை எப்படி செய்வதென்று தெரிந்து கொள்ள வேண்டுமா? கீழே முட்டை கோதுமை தோசை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* கோதுமை மாவு - 1 கப்
* துருவிய தேங்காய் - 1/4 கப்
* பெரிய வெங்காயம் - 1 (நறுக்கியது)
* முட்டை - 1
* மஞ்சள் தூள் - 1/4 டீஸ்பூன்
* உப்பு - சுவைக்கேற்ப
* தண்ணீர் - 3/4 கப்
* கொத்தமல்லி - 1 கைப்பிடி (பொடியாக நறுக்கியது)
* சீரகம் - 1/2 டீஸ்பூன்

செய்முறை:

* முதலில் மிக்சர் ஜாரில் கோதுமை மாவு, தேங்காய், முட்டை, மஞ்சள் தூள், பெரிய வெங்காயம் மற்றும் சுவைக்கேற்ப உப்பு சேர்த்து, 3/4 கப் நீரை ஊற்றி நன்கு அரைத்துக் கொள்ள வேண்டும்.
* பின் அரைத்த மாவை ஒரு பாத்திரத்தில் எடுத்துக் கொள்ள வேண்டும்.
* மாவு மிகவும் கெட்டியாக இருந்தால், சிறிது நீரை ஊற்றி கலந்து கொள்ளுங்கள்.
* இந்த மாவு மிகவும் நீராகவோ, கெட்டியாகவோ இருக்கக்கூடாது. தோசை மாவு பதத்திற்கு இருக்க வேண்டும். அதன் பின் அதில் சீரகம், பொடியாக நறுக்கிய கொத்தமல்லியை சேர்த்து கலந்து கொள்ள வேண்டும்.
* பின்பு ஒரு தோசை பேனை அடுப்பில் வைத்து சூடானதும், கலந்து வைத்துள்ள மாவை ஒரு கரண்டி ஊற்றி, தோசையாக சுற்றி, எண்ணெய் ஊற்றி, முன்னும், பின்னும் வேக வைத்து எடுத்தால், சுவையான முட்டை கோதுமை தோசை தயார்.

Image Courtesy: Akshaya. com