தாபா ஸ்டைல் முட்டை பட்டாணி மசாலா ரெசிபி - ட்ரை பண்ணி பாருங்க - சப்பாத்தி, பூரிக்கு அட்டகாசமா இருக்கும்

Egg Pattani Masala Recipe in Tamil: உங்கள் வீட்டில் அடிக்கடி முட்டை சமைப்பீர்களா? எப்போதும் முட்டையை ஒரே மாதிரிதான் செய்வீர்களா? அதுவும் சாதத்திற்கு என்று கிரேவி, பொடிமாஸ் என்று தான் செய்வீர்களா? அப்படியானால் ஒருமுறை முட்டையை வைத்து இந்த பட்டாணி முட்டை மசாலாவை செய்யுங்கள். இந்த பட்டாணி முட்டை மசாலா சாதம், சப்பாத்தி, பூரி மற்றும் தோசை என அனைத்திற்கும் செம காம்பினேஷனாக இருக்கும். மேலும் இரண்டுமே புரோட்டின் நிறைந்ததாக இருப்பதால் இது மிகவும் ஆரோக்கியமானதும் கூட.

இந்த பட்டாணி முட்டை மசாலா தாபா ஸ்டைலில் சாப்பிடும் சுவையிலேயே இருக்கும். இப்படி வித்தியாசமான முட்டை மசாலா செய்தால், வீட்டில் உள்ளோர் அடிக்கடி செய்து கொடுக்குமாறு கேட்பார்கள், அந்த அளவிற்கு இது அட்டகாசமான சுவையில் இருக்கும். முக்கியமாக இந்த பட்டாணி முட்டை மசாலா செய்வதற்கு மிகவும் சுலபமாக இருக்கும். அதோடு இது பேச்சுலர்கள் செய்யக்கூடிய வகையில் ஈஸியாக இருக்கும்.

உங்களுக்கு சூப்பரான பட்டாணி முட்டை மசாலாவை எப்படி செய்வதென்று தெரிந்து கொள்ள வேண்டுமா? கீழே பட்டாணி முட்டை மசாலா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

முட்டையை வறுக்க:

- 6 வேகவைத்த முட்டைகள்
- 1 ஸ்பூன் எண்ணெய்
- ¼ ஸ்பூன் மஞ்சள் தூள்
- ½ ஸ்பூன் காஷ்மீரி சிவப்பு மிளகாய் தூள்

மசாலா செய்ய:

- 2 ஸ்பூன் நெய்
- 2 ஸ்பூன் எண்ணெய்
- 1 கப் நறுக்கிய வெங்காயம்
- 1 ஸ்பூன் இஞ்சி பூண்டு விழுது
- 2 ஸ்பூன் நறுக்கிய பச்சை மிளகாய்
- 1 கப் அரைத்த புதிய தக்காளி
- 2 ஸ்பூன் கொத்தமல்லி தூள்
- ½ ஸ்பூன் மஞ்சள் தூள்
-1 ஸ்பூன் காஷ்மீரி சிவப்பு மிளகாய் தூள்
- ½ ஸ்பூன் சீரகத் தூள்
- தேவையான அளவு உப்பு
- 1 ஸ்பூன் கடலை மாவு
- ½ கப் வேகவைத்த பச்சை பட்டாணி
- 1 ஸ்பூன் கசூரி மேத்தி
- ½ ஸ்பூன் கரம் மசாலா தூள்
- 1 ஸ்பூன் எலுமிச்சை சாறு
- 2 ஸ்பூன் நறுக்கிய கொத்தமல்லி

செய்முறை:

- முட்டைகளை வேக வைத்து உரித்து வைத்துக் கொள்ளவும்.

- கத்தியைப் பயன்படுத்தி முட்டையில் சின்ன சின்ன கீறல்களைப் போடவும்.

- ஒரு கடாயில் மிதமான தீயில் எண்ணெயைச் சூடாக்கவும்.

- கடாயில் மஞ்சள் தூள் மற்றும் மிளகாய் தூள் சேர்த்து எண்ணெயுடன் நன்கு கலக்கவும்.

- முட்டைகளை கடாயில் சேர்த்து, அவை எல்லாப் பக்கங்களிலும் பழுப்பு நிறமாகும் வரை வறுக்கவும். முட்டையை அனைத்து பக்கமும் திருப்பி நன்கு வறுத்து ஒரு தட்டிற்கு மாற்றவும்.

- அதே கடாயில் நெய் மற்றும் எண்ணெய் சேர்த்து, மிதமான தீயில் சூடாக்கவும்.

- எண்ணெயும் நெய்யும் சூடானதும், நறுக்கிய வெங்காயத்தைச் சேர்த்து, பொன்னிறமாகும் வரை வதக்கவும்.

- பின்னர் இஞ்சி-பூண்டு விழுது மற்றும் பச்சை மிளகாயைச் சேர்த்து, வெங்காயம் நன்றாகப் பொன்னிறமாகும் வரை வதக்கவும்.

- அதன்பின் அரைத்த தக்காளி விழுதைச் சேர்த்து, நன்கு கிளறவும்.

- பின்னர் மல்லித் தூள், மஞ்சள் தூள், மிளகாய் தூள், சீரகத் தூள், உப்பு மற்றும் கடலை மாவு ஆகியவற்றைச் சேர்த்து ஒரு நிமிடம் வதக்கவும்.

- மசாலா பச்சை வாசனை போனதும் பச்சை பட்டாணி, பொரித்த முட்டைகள் மற்றும் 1 கப் தண்ணீர் சேர்த்து நன்றாகக் கலக்கவும். மிதமான தீயில் கொதிக்க விடவும்.

- கடாயை மூடி வைத்து, பட்டாணி மென்மையாகும் வரை வேக வைக்கவும், இடையிடையே கிளறிவிடவும்.

- இறுதியாக, கசூரி மேத்தி, கரம் மசாலா தூள் மற்றும் எலுமிச்சை சாறு ஆகியவற்றைச் சேர்த்து நன்றாகக் கலக்கவும்.

- இறுதியாக கொத்தமல்லி இலைகளைத் தூவி அலங்கரித்தால் அட்டகாசமான பட்டாணி முட்டை மசாலா ரெடி!