தோசை மாவு இல்லாத சமயத்தில் 1 கப் அரிசி மாவு இருந்தா.. 10 நிமிடத்தில் மொறுமொறு-ன்னு தோசை சுடலாம்...

Crispy Instant Dosa Recipe In Tamil: காலையில் உங்கள் வீட்டில் தோசை சுட மாவு இல்லையா? கவலை வேண்டாம். தோசை மாவு இல்லாமலேயே வீட்டில் உள்ள ஒருசில பொருட்களைக் கொண்டு அற்புதமான மற்றும் மொறுமொறுப்பான தோசை சுடலாம். இந்த இன்ஸ்டன்ட் தோசை சுட 10 நிமிடங்கள் போதுமானது.

இந்த தோசையானது ரவை தோசையைப் போன்றே நல்ல ருசியுடனும், மொறுமொறுவென்றும் இருக்கும். முக்கியமாக இந்த தோசைக்கு சைடு டிஷ் எதுவுமே தேவையில்லை. இருப்பினும், சட்னி ஏதாவது வேண்டுமென்று விரும்பினால், தக்காளி சட்னி, கார சட்னி, தேங்காய் சட்னி என்று அனைத்துமே நன்றாக இருக்கும்.

உங்களுக்கு இந்த இன்ஸ்டன்ட் தோசையை எப்படி செய்வதென்று தெரிந்து கொள்ள வேண்டுமா? கீழே இன்ஸ்டன்ட் தோசையின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* அரிசி மாவு - 1 கப்
* தண்ணீர் - 2 1/2 கப்
* இஞ்சி - 1 துண்டு (பொடியாக நறுக்கியது)
* பச்சை மிளகாய் - 1 (பொடியாக நறுக்கியது)
* கேரட் - 1 (துருவியது)
* வெங்காயம் - 1 (பொடியாக நறுக்கியது)
* கொத்தமல்லி - சிறிது (பொடியாக நறுக்கியது)
* மிளகுத் தூள் - 1/2 டீஸ்பூன்
* உப்பு - சுவைக்கேற்ப
* சில்லி ப்ளேக்ஸ் - 1 டீஸ்பூன்
* எண்ணெய் - தேவையான அளவு

செய்முறை:

* முதலில் மிக்சர் ஜாரில் அரிசி மாவை எடுத்துக் கொள்ள வேண்டும்.
* பின் அதில் 2 கப் நீரை ஊற்றி ஒரு முறை அரைத்து, ஒரு பாத்திரத்தில் ஊற்றிக் கொள்ள வேண்டும்.
* பின்பு அதில் பொடியாக நறுக்கிய இஞ்சி, பச்சை மிளகாய் சேர்த்துக் கொள்ள வேண்டும்.
* பிறகு அதில் துருவிய கேரட், பொடியாக நறுக்கிய வெங்காயம், கொத்தமல்லி, மிளகுத் தூள், சில்லி ப்ளேக்ஸ் மற்றும் சுவைக்கேற்ப உப்பு சேர்த்து நன்கு கலந்து கொள்ள வேண்டும்.
* பின்னர் ஒரு நாண்ஸ்டிக் தவாவை அடுப்பில் வைத்து, கல் சூடானதும், எண்ணெய் ஊற்றி, தயாரித்து வைத்துள்ள மாவை ஒருமுறை கலந்து அப்படியே கரண்டியால் எடுத்து, சுற்றி தோசை போல் ஊற்ற வேண்டும்.
* பின் தோசையைச் சுற்றி எண்ணெய் ஊற்றி, 1 நிமிடம் வேக வைத்து எடுத்தால், மொறுமொறுப்பான இன்ஸ்டன்ட் தோசை தயார்.

Image Courtesy: Akshaya Kitchen Recipes