எப்பவும் ஒரே மாதிரி தோசை சுடாம.. ஒருவாட்டி தேங்காய் சீரக தோசை சுடுங்க.. டேஸ்ட் வேற லெவல்-ல இருக்கும்..

Coconut Jeera Dosa Recipe In Tamil: உங்கள் வீட்டில் அடிக்கடி தோசை செய்வீர்களா? அதுவும் எப்போதும் ஒரே மாதிரி தான் தோசை செய்து சாப்பிடுவீர்களா? அப்படியானால் ஒருமுறை வித்தியாசமான சுவையில் தோசை செய்து சாப்பிடுங்கள். இந்த தோசை செய்ய பச்சரிசியை ஊற வைத்து, பிரஷ்ஷாக மாவை அரைத்து, அத்துடன் ஒருசில பொருட்களை அரைத்து சேர்த்து கலந்து, தோசையாக சுட வேண்டும்.

இப்படி சுடும் தோசையை வெறுமனே சாப்பிடலாம் அல்லது சைடு டிஷ்ஷாக தேங்காய் சட்னி, தக்காளி சட்னியுடன் சேர்த்தும் சாப்பிடலாம். முக்கியமாக இந்த தோசையை காலை வேளையில் மட்டுமின்றி, மாலை நேர ஸ்நாக்ஸாகவும், இரவு டின்னராகவும் சாப்பிடலாம். குறிப்பாக இந்த தோசை குழந்தைகள் விரும்பி சாப்பிடக்கூடியவாறு இருக்கும்.

உங்களுக்கு தேங்காய் சீரக தோசையை எப்படி செய்வதென்று தெரிந்து கொள்ள வேண்டுமா? கீழே தேங்காய் சீரக தோசை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பச்சரிசி - 1 கப்
* உப்பு - சுவைக்கேற்ப
* தண்ணீர் - 1 கப் + தேவையான அளவு
* தேங்காய் - 1/2 கப் (பொடியாக நறுக்கியது)
* சின்ன வெங்காயம் - 10
* சீரகம் - 1/2 டீஸ்பூன்
* வரமிளகாய் - 2
* கறிவேப்பிலை - 1 கொத்து

செய்முறை:

* முதலில் பச்சரிசியை நீரில் 2 முறை கழுவி, நீரை ஊற்றி 3-4 மணிநேரம் ஊற வைத்துக் கொள்ள வேண்டும்.
* பின் மிக்சர் ஜாரில் ஊற வைத்த பச்சரிசியை சேர்த்து, சுவைக்கேற்ப உப்பு சேர்த்து, நீரை ஊற்றி நன்கு மென்மையாக அரைத்துக் கொள்ள வேண்டும்.
* பின்பு அரைத்த மாவை ஒரு பாத்திரத்தில் ஊற்றிக் கொள்ள வேண்டும்.
* பிறகு மிக்சர் ஜாரில் பொடியாக நறுக்கிய தேங்காய், சின்ன வெங்காயம், சீரகம், வரமிளகாய், கறிவேப்பிலை சேர்த்து கொரகொரவென்று அரைத்துக் கொள்ள வேண்டும்.
* அதன் பின் அதை அரைத்து வைத்துள்ள மாவுடன் சேர்க்க வேண்டும்.
* பின்னர் மாவில் நீரை ஊற்றி, நீர் தோசை பதத்திற்கு மாவை தயார் செய்து கொள்ள வேண்டும்.
* இறுதியாக ஒரு தோசைக் கல்லை அடுப்பில் வைத்து, கல் நன்கு சூடானதும், தயாரித்து வைத்துள்ள மாவை ரவா தோசைக்கு அள்ளி ஊற்றுவது போன்று கல்லி ஊற்றி, மூடி வைத்து தோசையை வேக வைத்து, பின் மூடியைத் திறந்து தோசையை எடுக்க வேண்டும். இதேப் போன்று அனைத்து மாவையும் சுட்டு எடுத்தால், சுவையான தேங்காய் சீரக தோசை தயார்.