சிசேரியனுக்குப் பிறகு அதிகரித்த எடையை வேகமாக குறைப்பது எப்படி? விளக்குகிறார் மகப்பேறு மருத்துவர் காயத்ரி...!

கர்ப்பகாலம் என்பது பெண்களின் உடலில் பல மாற்றங்கள் ஏற்படும் காலமாகும். அதில் அனைவரின் கண்களுக்கும் தெரியக்கூடிய ஒன்று பெண்களின் வயிற்றின் அளவு பெரிதாவதுமட்டும்தான். கர்ப்ப காலத்தில் பெண்களின் எடை தாறுமாறாக அதிகரிக்கும். இந்த எடை மிக வேகமாக அதிகரிக்கும், ஆனால் மிகவும் மெதுவாகவே குறையும்.

புதிதாக அம்மாவானவர்கள் இந்த அதிகரித்த எடையால் பல அசௌகரியங்களை அனுபவிப்பார்கள். குறிப்பாக குழந்தை சிசேரியன் செய்து பிறந்திருந்தால், அவர்கள் தங்கள் எடையை அவ்வளவு எளிதில் குறைக்க முடியாது.

எனவே பெண்கள் எதிர்கொள்ளும் இந்த சிக்கலை மனதில் வைத்து, இதற்கான தீர்வுகளை கண்டறிய குழந்தைப்பேறு மருத்துவர் ஒருவரை அணுகிணோம். மகப்பேறு மருத்துவர் காயத்ரி இதற்கான வழிகளை நம்முடன் பகிர்ந்துள்ளார். அவை என்னென்ன என்று இந்த பதிவில் தெரிந்து கொள்ளலாம்.

எலுமிச்சை தண்ணீர்

சிசேரியனுக்கு பிறகு வயிறை சுற்றியுள்ள சதைகளை குறைக்க எலுமிச்சை தண்ணீரை குடிப்பது எடையைக் குறைக்க மிகவும் அவசியமாகும். சூடான நீரை எடுத்துக்கொண்டு அதில் சிறிது எலுமிச்சை சாறையும் தேனையும் கலக்க வேண்டும். இந்த நீரை தினமும் காலையில் குடிக்க வேண்டும். சூடான நீர், எலுமிச்சை சாறு மற்றும் தேன் கலந்த கலவை வயிறை சுற்றியுள்ள சதைகளை எளிதாக குறைக்க உதவும். இதை தொடர்ந்து செய்து வந்தால் விரைவில் மாற்றத்தைக் காணலாம்.

பெல்ட் அணிதல்

சிசேரியனுக்கு பின் எடையை குறைக்கும் பெல்ட் அணிவது வயிற்று சதையை குறைப்பதில் நன்கு உதவுகிறது. இந்த பெல்ட் வயிற்றுத் தசையில் பிணைப்பைப் ஏற்படுத்தி, வயிற்றுத் தசைகளை குறைக்க உதவுகிறது, இதன் மூலம் வயிற்று கொழுப்பைக் குறைத்து, முதுகுவலியையும் குறைக்கிறது. பிரசவத்திற்கு பிறகு வயிறு பகுதியில் இருந்து கொழுப்பு இழக்க விரும்புபவர்களுக்கு இந்த பெல்ட் பரிந்துரைக்கப்படுகிறது.

போதுமான அளவு தண்ணீர் குடித்தல்

போதுமான அளவு தண்ணீர் குடிப்பது பெண்கள் உடலின் நீர் மேலாண்மையை மட்டும் பராமரிப்பதில்லை, உடலில் உள்ள தேவையில்லாத கொழுப்புகளையும் குறைக்க உதவுகிறது. சிசேரியனுக்கு பிறகு அதிக தண்ணீர் குடிப்பது உடலின் நீர் மேலாண்மையை சரி செய்வதோடு அதிக உணவு உண்பதையும் தடுக்கிறது. எனவே சிசேரியனுக்குப் பிறகு வயிறை குறைக்க முதலில் செய்ய வேண்டியது அதிகளவு நீர் குடிக்கப்பதுதான்.

ஒழுங்கான உணவுமுறை

பொதுவாக பெண்களுக்கு நாளொன்றுக்கு 300 முதல் 500 வரை கலோரிகள் தேவைப்படுகிறது. சிசேரியனுக்குப் பிறகு அவர்களால் வழக்கமான உடற்பயிற்சிகளை செய்ய இயலாது. எனவே அளவான உணவை சரியான அளவில் எடுத்துக்கொண்டு நொறுக்கு தீனிகளில் இருந்து விலகி இருக்க வேண்டும். சரியான உணவை எடுத்துக்கொள்வதே உங்களின் வயிற்றை குறைக்க பெரிதளவில் உதவும்.

சிறிய நடைப்பயிற்சி

அறுவைசிகிச்சை காரணமாக அவர்கள் கடுமையான உடற்பயிற்சியிலோ நீண்ட தூர நடைப்பயிற்சியிலோ ஈடுபட இயலாது. ஏனென்றால் அது வயிறையும், வயிற்றை சுற்றியுள்ள பகுதியையும் பெரிதளவில் பாதிக்கும். எனினும், காலையோ, மாலையோ அரைமணி நேரம் நடைப்பயிற்சி செய்வது எடையைக் குறைக்க அவசியம். தினசரி இதுபோன்ற சுறுசுறுப்பான நடைப்பயிற்சி தொப்பையை குறைக்க பெரிதும் உதவும்.