உலகில் இன்றும் புழக்கத்தில் இருக்கும் பழமையான கரன்சிகள் - எந்த நாட்டு பணம் முதலிடத்தில் இருக்கு தெரியுமா?

பணம் என்ற ஒரு விஷயம் உருவான நாள் முதலே அதுதான் உலகைக் கட்டுப்படுத்தும் சக்தியாக உள்ளது. பல பேரரசுகள் உருவாகவும், பல பேரரசுகள் வீழ்ச்சியடையவும் பணமே காரணாமாக இருந்துள்ளது. பணத்தின் வடிவங்களும், மதிப்பும் மாறலாம், ஆட்சியாளர்கள் கூட மாறலாம். ஆனால் காலத்தை வென்று சில நாணயங்கள் அதிகாரம், வர்த்தகம் மற்றும் அவற்றின் நிலைத்தன்மை குறித்த வரலாற்றைத் தாங்கி பல நூற்றாண்டுகளாகத் தொடர்ந்து பயன்பாட்டில் உள்ளன. இன்று உலகில் சுமார் 180 அதிகாரப்பூர்வ கரன்சி புழக்கத்தில் இருந்தாலும், அவற்றில் வெகுசில நாணயங்களுக்கு மட்டுமே உண்மையான பழமையான பாரம்பரியம் உள்ளது. தற்போதுவரை பயன்பாட்டில் உள்ள உலகின் பழமையான நாணயங்கள் என்னென்ன என்று இந்த பதிவில் தெரிந்து கொள்ளலாம்.

பிரிட்டிஷ் பவுண்ட்

பிரிட்டிஷ் பவுண்ட் என்பது இன்றும் பயன்பாட்டில் உள்ள வரலாற்றின் மிகவும் பழமையான நாணயமாகும். இதன் தொடக்கம் கி.பி. 8-ஆம் நூற்றாண்டில் மன்னர் ஓஃபாவின் (King Offa) ஆட்சிக்காலத்திலிருந்து தொடங்குகிறது. பின்னர் 12-ஆம் நூற்றாண்டில் மன்னர் இரண்டாம் ஹென்றியின் காலத்தில் இது மேம்படுத்தப்பட்டது. ஆயிரம் ஆண்டுகளுக்கும் மேலாக, மன்னராட்சி முறைகள், பேரரசுகள் மற்றும் பொருளாதார அமைப்புகள் பலவற்றைக் கடந்து நிலைத்திருக்கும் இது, இன்றும் உலகின் முக்கியமான மற்றும் சக்திவாய்ந்த நாணயங்களில் ஒன்றாகத் திகழ்கிறது.

செர்பிய தினார்

செர்பிய தினார் முதன்முதலில் 1214-ஆம் ஆண்டில், மன்னர் ஸ்டெஃபான் நெமன்ஜிச்சின் ஆட்சியில் தோன்றியது. இடைக்கால ஆட்சி, ஒட்டோமான் பேரரசின் செல்வாக்கு, யூகோஸ்லாவியா மற்றும் நவீன செர்பியா என அனைத்திலும் தினார் என்ற பெயர் இன்றும் நிலைத்து நிற்கிறது. அரசியல் மாற்றங்கள் மற்றும் நாணய சீர்திருத்தங்கள் இருந்தபோதிலும், தினார் செர்பியாவின் நீண்டகால அரசுரிமையின் சின்னமாகத் திகழ்கிறது.

ரஷ்ய ரூபிள்

'வெட்டுதல்' என்று பொருள்படும் 'ருபிட்' என்ற சொல்லிலிருந்தே 'ருபிள்' என்ற பெயர் உருவானது. ஏனெனில், இது ஆரம்பத்தில் வெட்டப்பட்ட வெள்ளியைக் குறிப்பதாக இருந்தது. 13-ஆம் நூற்றாண்டில் அறிமுகப்படுத்தப்பட்ட ருபிள் நாணயமானது, ஜார் மன்னர்களின் ஆட்சி, பல புரட்சிகள், சோவியத் காலம் மற்றும் நவீன ரஷ்யா எனப் பல்வேறு காலகட்டங்களைக் கடந்து நிலைத்திருப்பதால், உலகில் தொடர்ந்து பயன்பாட்டில் உள்ள மிகப்பழமையான நாணயங்களில் ஒன்றாக உள்ளது.

அமெரிக்க டாலர்

1785-இல் அதிகாரப்பூர்வமாக அறிமுகப்படுத்தப்பட்ட அமெரிக்க டாலர், பவுண்ட் அல்லது ரூபிளுடன் ஒப்பிடும் போது புதியது என்றாலும், உலகின் மிக அதிக அளவில் வர்த்தகம் செய்யப்படும் சக்திவாய்ந்த நாணயமாக மாறியுள்ளது. வர்த்தகம், அந்நியச் செலாவணி கையிருப்பு மற்றும் சரக்குகளுக்கான விலை நிர்ணயம் என உலகம் முழுவதும் பயன்படுத்தப்படும் இந்த கரன்சி, வால் ஸ்ட்ரீட் முதல் உலகின் அனைத்து நாடுகளிலும் காணப்படுகிறது.

ஹைட்டியன் கோர்ட்

ஹைட்டி சுதந்திரம் அடைந்த பிறகு, 1813-ஆம் ஆண்டில் 'ஹைட்டியன் கோர்ட்' அந்நாட்டின் தேசிய நாணயமாக அறிவிக்கப்பட்டது. அரசியல் ஸ்திரமின்மை மற்றும் பொருளாதார நெருக்கடிகளை எதிர்கொண்ட போதிலும், இரண்டு நூற்றாண்டுகளுக்கும் மேலாக புழக்கத்தில் இருந்து வரும் 'கோர்ட்', ஹைட்டியின் இறையாண்மை மற்றும் வாழ்வுரிமையின் அடையாளமாகத் திகழ்கிறது.

ஃபாக்லாண்ட் தீவுகள் பவுண்டு

பிரிட்டிஷ் பவுண்டுடன் இணைக்கப்பட்ட ஃபாக்லாண்ட் தீவுகள் பவுண்டு, 1833-ஆம் ஆண்டு முதல் பயன்பாட்டில் உள்ளது. தென் அட்லாண்டிக் பெருங்கடலில் அமைந்துள்ள இந்தச் சிறிய, தொலைதூரப் பிரிட்டிஷ் பிரதேசத்தில் பயன்பாட்டில் உள்ள இந்த நாணயம், பிரிட்டிஷ் காலனித்துவ வரலாற்றின் நீடித்த தாக்கத்தைப் பிரதிபலிக்கிறது. இருப்பினும், இத்தீவுகளுக்கு வெளியே இதனை பார்ப்பது மிகவும் அரிது.

டொமினிகன் பெசோ

1844-இல் அறிமுகப்படுத்தப்பட்ட டொமினிக்கன் பெசோ, ஹைட்டியிடமிருந்து அந்நாடு சுதந்திரம் பெற்ற அதே காலகட்டத்தில் உருவானது. காலப்போக்கில், இத்தீவின் இசை, கலாச்சாரம் மற்றும் கரீபிய வர்த்தகத் தொடர்புகளைப் போலவே, இந்த நாணயமும் நாட்டின் அடையாளத்தின் ஒரு முக்கிய அங்கமாக மாறியுள்ளது.

கனடிய டாலர்

1871-இல் அறிமுகப்படுத்தப்பட்ட கனடிய டாலர், வர்த்தகத்தை எளிதாக்கும் வகையில் அமெரிக்க டாலருடன் இணக்கமாக இருப்பதற்காக வடிவமைக்கப்பட்டது. இன்று இது "லூனி" என்று அழைக்கப்படுகிறது. மேலும், இது உலகின் மிகவும் நிலையான மற்றும் நம்பகமான நாணயங்களில் ஒன்றாகக் கருதப்படுகிறது.