மனைவிய சந்தோஷமா வைச்சுக்கறது இவ்வளவு ஈஸியா? இது தெரியாம போச்சே...!

காதல் கடிதம்

கடிதங்களை விட காதலை அழகாக சொல்லும் ஊடகம் வேறெதுவும் இல்லை. என்னதான் நேரில் சொன்னாலும் அந்த கணம் கடந்து விடும். ஆனால் உங்கள் காதலை சுமந்து செல்லும் காதல் கடிதம் அதனை ஒவ்வொரு முறை படிக்கும்போதும் உங்கள் மனைவி மீதான உங்கள் காதலை அவர்களுக்கு உணர்த்தும். அது நிச்சயமாக உங்களுக்கிடையேயான அன்பை வலுப்படுத்தும்.

அழகை வர்ணியுங்கள்

சிறு வயது முதலே பெண்கள் அனைவரும் மற்றவரிடம் கேட்கும் கேள்வி " நான் அழகாக இருக்கிறேனா? " என்பதுதான். அவர்கள் அழகைப் பற்றி நீங்கள் காலையில் கூறும் ஒரு வார்த்தை அவர்களை நாள் முழுவதும் உற்சாகமாக வைத்திருக்கும். உங்கள் மனைவியின் கண்களை பார்த்து " நீ அழகாக இருக்கிறாய் " என்று காதலுடன் சொல்லுங்கள். அந்த வார்த்தையே அவர்களை அழகாக மாற்றும்.

புன்னகை

புன்னகையை விட சிறந்த பதில் எதுவுமில்லை. உங்கள் மகிழ்ச்சியின் வெளிப்பாடு உங்கள் புன்னகையில்தான் இருக்கிறது. அடிக்கடி உங்கள் மனைவியைப் பார்த்து சினேகமாக புன்னகையுங்கள். புன்னகைக்கும் போது அவர்களின் கண்களைப் பார்க்க மறந்து விடாதீர்கள். சிலசமயம் உங்களின் அமைதியான புன்னகை அவர்களுக்கு கொடுக்கும் மகிழ்ச்சியை வேறு எந்த பொருளாலும் கொடுத்துவிட முடியாது.

காதலுடன் காபி

இருவரும் வேலைக்குச் செல்பவராக இருந்தாலும் சரி, வீட்டில் இருக்கும் மனைவியாக இருந்தாலும் சரி மாலை வேலையில் அவர்களை வெளியே அழைத்துச் செல்லுங்கள். ஒரு காபியுடன் அன்று நாள் முழுவதும் அவர்கள் என்ன செய்தார்கள் என்று கேளுங்கள், நீங்கள் என்ன செய்தீர்கள் என்பதை சொல்லுங்கள். வெளிப்படையான கணவரைத்தான் எந்த மனைவியும் விரும்புவார்கள். உங்கள் காதலை காபியுடன் பகிர்ந்து கொள்ளுங்கள்.

மன்னிப்பு கேளுங்கள்

ஆண் என்ற அகந்தையை வீட்டிற்குள் வரும்போதே கழட்டி வைத்துவிடுங்கள். உங்கள் மீது தவறு இருந்தால் ஈகோ பார்க்காமல் மன்னிப்பு கேளுங்கள். மனைவியிடம் தோற்றுப்போகிறவர்கள் வாழ்க்கையில் நிச்சயம் ஜெயித்து விடுவார்கள்.

சொல்வதை கவனியுங்கள்

பெண்களின் மகிழ்ச்சியை அதிகரிக்க மிகவும் எளிய வழி அவர்கள் சொல்வதை கவனிப்பதும், அவர்களின் கருத்துக்கு மதிப்பு கொடுப்பதும்தான். நாள் முழுக்க ஒரு விஷயத்தை உங்களிடம் கூறுவதற்காக அவர்கள் காத்திருக்கும் போது நீங்கள் அதனை புறக்கணிப்பது அவர்களை மனதளவில் காயப்படுத்தும். அவர்கள் கூறுவதை கேட்டுவிட்டு உங்கள் வேலையை தொடர்வது இருவரின் மகிழ்ச்சிக்கும் நல்லதாகும்.

பாராட்டுகள்

உங்கள் வாழ்க்கையின் பாதியாக இருக்கும் உங்கள் மனைவி உங்களின் முழுகவனத்தை பெறுவதற்கு அனைத்து தகுதிகளும் உடையவர். எனவே அவரின் செயல்கள், தோற்றங்கள், சமையல் என அனைத்திற்கும் அவர்கள் பாராட்டை எதிர்பார்ப்பார்கள். நேர்மையான பாராட்டு எப்பொழுதும் பெண்களின் மகிழ்ச்சியை இருமடங்காக்கும்.

சிறிய ஆச்சரியங்கள்

உங்கள் காதலை எப்போதும் உயிர்ப்புடன் வைத்திருக்க சின்ன சின்ன ஆச்சரியங்கள் எப்பொழுதும் அவசியமானவை ஆகும். அடிக்கடி பூக்கள் வாங்கிக்கொடுங்கள், குட்டிக் குட்டி பரிசுகள், எதிர்பாராத நேரத்தில் கொடுக்கும் முத்தம் என அனைத்தும் உங்கள் மீதான அவர்களின் காதலை அதிகரிக்கும்.